ކުޅިވަރު ދާއިރާއަށް ޚިދުމަތްކުރިއިރު އެންމެ ބޮޑަށް ދަސްވެގެންދިޔައީ އެތުލީޓެއްގެ ނަޒަރުން ވިސުނުމުގެ މުހިންމުކަން ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމް އިން ގެނެސްދިން "ފެށުން" ޕްރޮގްރާމުގައި ވާހަކަދައްކަވަމުންނެވެ.
ކުޅިވަރުގެ ދާއިރާގައި ކުރެވުނު ތަޖުރިބާގެ ވާހަކަތައް ހިއްސާކުރައްވަމުން ވަޒީރު ވިދާޅުވީ ކޮންމެ ކުޅިވަރެއްގައި އުޅުނު ނަމަވެސް އެއްގޮތް ކަންތައްތަކެއް ހުންނަ ކަމަށެވެ. އެ ކަންތައްތައް ދަނެގަނެވުމާއެކު، އެތުލީޓުންނަށް އެހީތެރިކަން ފޯރުކޮށްދެވޭނެ ބައިވަރު ގޮތްތައް އެނގިގެން ދިޔަ ކަމަށް ވަޒީރު ވިދާޅުވިއެވެ.
"މީގަ އުޅުނީމަ އެނގިގެން ދިޔަ އެއްޗަކީ އަޅުގަނޑުމެންގެވެސް ލިމިޓޭޝަންތަކެއް ހުރިކަން. އަޅުގަނޑުގެވެސް ލިމިޓޭޝަންތަކެއް އެބަހުރި. އަޅުގަނޑުމެން ސިސްޓަމުގައިވެސް ލިމިޓޭޝަންތަކެއް އެބަހުރި. މުޅި ކުޅިވަރުގައިވެސް ކުޅޭއިރުވެސް ލިމިޓޭޝަންތައް އެބަހުރި." ވަޒީރު ރާފިޢު ވިދާޅުވިއެވެ.
ވަޒީރު ވިދާޅުވީ މިހާތަނަށް ރާއްޖޭގެ ކުޅިވަރު ދާއިރާ ކުރިއަށްދިޔައީ ވަކި ލިމިޓޭޝަންތަކާ އެކުގައި ކަމަށެވެ. ނަމަވެސް އެކަންކަން ކުރެވޭނެ މަގު ފަހިކުރުމަކީ މުހިންމު ކަމެއް ކަމަށާއި، އެކަން އެނގިއްޖެ ނަމަ އެކަންކަމަށް ހައްލު ހޯދުމަށް ފަސޭހަވެގެންދާނެ ކަމަށްވެސް ވިދާޅުވިއެވެ. އޭގެ ސަބަބުން ރާއްޖޭގެ އެތުލީޓުން އިތުރަށް ޕާފޯމް ކުރުމާއި، މޮޅެތި އެތުލީޓުންނަށް ހަދަން ގިނަކަންކަން ކުރަން ޖެހޭކަން ދަސްވެގެންދިޔަ ކަމަށް ވަޒީރު ވިދާޅުވިއެވެ.
ވަޒީރު ރާފިޢު ވިދާޅުވީ ކުޅިވަރަކީ ބޮޑު އާއިލާއެއް ކަމަށާއި، އެ އާއިލާގެ ތެރެއިން ދަސްވީ ކޮންމެ ކުޅިވަރެއްގައި އުޅުނު ނަމަވެސް، އުފަލާ މަޖަލުގެ ތެރެއިން ޓީމެއްގެ ގޮތުގައި މަސައްކަތް ކުރެވޭނެކަން ކަމަށެވެ.
"އަޅުގަނޑުމެންނަށްވެސް އަދި އެތުލީޓުންނަށްވެސް މީގެ ތެރެއިން ރަނގަޅު އެއްޗެހިތަކެއް ދަސްވޭ. މިސާލަކަށް ބަންގްލަދޭޝްގައި ބޭއްވި އަޅުގަނޑުމެންނަށް ތަށި ލިބުނު ސާފް ޗެމްޕިއަންޝިޕްގައި އޭރުގެ ކެޕްޓަނަކަށް އަކުރަމް ހުރީ، އަޅުގަނޑުމެން އެއް ޓީމެއްގެ ގޮތުގައި ރެޕްރެޒެންޓް ކުރީ އިނގޭތޯ." އެންމެ ފަހުން 2018 ގެ ސާފް ޗެމްޕިއަންޝިޕުގެ ތަށި ހޯދި ގައުމީ ޓީމުގެ ހަނދާންތައް އައުކުރައްވަމުން ރާފިޢު ވިދާޅުވިއެވެ.
ޓީމެއްގެ ގޮތުގައި މަސައްކަތް ކުރެވިއްޖެ ކަމަށް ވާނަމަ، ކުޅިވަރުގެ ތެރެއިން ރަނގަޅު އަޚުލާގު ދަސްވެ، އެ ސިފަ އަށަގަނެވިގެންދާނެ ކަމަށް ވަޒީރު ވިދާޅުވިއެވެ. މިހާތަނަށް އައިރު ރާއްޖޭގެ ކުޅިވަރުގެ މަތީ ފަޑީގައި ތިބި ބޭފުޅުންނާއި، އެތުލީޓުންނަށް ވަރަށް ރަނގަޅު ކަންތައްތަކެއް ދަސްވެފައިވާކަން ވަޒީރު ފާހަގަކުރެއްވިއެވެ. ނަމަވެސް އެކަންކަން އުނގެނި ދަސްވެގެން ދިޔައީ ވަރަށް ގިނަ ދުވަސްތަކަކަށްފަހު ކަމަށާއި، ކުޅިވަރުގެ ތެރެއިން ހޯދުނު ކޮންމެ ކާމިޔާބީއެއްވެސް ހޯދިފައިވަނީ ވަރަށް ގިނަ މީހުންގެ ހިއްސާއާއެކު ކަމަށް ވަޒީރު ރާފިޢު ވިދާޅުވިއެވެ.