ވަރުގަދަ ޓީމެއް އެކުލަވާލައި ޗެމްޕިއަންސް ޓްރޮފީގައި ވާދަކުރާ އަފްގާނިސްތާން ޓީމުގެ ކެޕްޓަންކަން ހަޝްމަތުﷲ ޝާހިދީ އަށް ދީފި އެވެ.
އަންނަ މަހު ފަށާ މުބާރާތަށް އަފްޢާނިސްތާން ޓީމު ދާނީ އެންމެ ފަހުން ދެ މުބާރާތުގައި ވެސް މޮޅު ކުޅުމެއް ދެއްކުމަށްފަހު އެވެ. 2023ގެ ވޯލްޑްކަޕާއި މިދިޔަ އަހަރުގެ ޓުވެންޓީ20 ވޯލްޑްކަޕުގައި އެމީހުން ވަނީ ސެމީ ފައިނަލް ކުޅެފަ އެވެ.
މި ފަހަރުގެ ޓީމަށް ނެގި އެންމެ ފާހަގަކޮށްލެވޭ އެއް ކުޅުންތެރިއަކީ އިބްރާހީމް ޝަޒްރަން އެވެ. އޭނާ އަކީ ކަކުލަށް ލިބުނު އަނިޔާއަކަށް ފަރުވާ ހޯދުމަށްފަހު މިދިޔަ އަހަރު މޮޅަށް ކުޅެން ފެށި ކުޅުންތެރިއެކެވެ. އޭނާއާއެކު އޯޕަނިންސް ބެޓްސްމަނަކަށް އަރާނީ ރަހުމަތުﷲ ގުރުބާޒެވެ. އޭގެ ފަހަތުން ކެޕްޓަން ހަޝްމަތުﷲ އާއި ރަހުމަތު ޝާހު ހިމެނުމުން ބެޓިންގެ ފުރަތަމަ ހަތަރެއް ކުރިއަށްވުރެ ވަރުގަދަވާނެ އެވެ.
ކުރިއާ އަޅާ ބަލާއިރު ބޯލިން ޓީމު ވެސް ވަނީ ވަރުގަދަކޮށްފަ އެވެ. އެންމެ މޮޅު އުކުންތެރިޔާ ރާޝިދު ހާން ޓީމުގައި ހިމަނާފައިވާއިރު އޯލްރައުންޑަރު މުހައްމަދު ނާބީ އާއި ފަޒަލްހަގް ފާރޫގީ އަކީ އެންމެ ފުރަތަމަ ތިން ބޯލަރުން ކަމަށް ވަނީ ނިންމައިފަ އެވެ.
މި ފަހަރުގެ ޓީމުން އުނިކުރި އެންމެ މަޝްހޫރު ކުޅުންތެރިއަކީ މުޖީބުއްރަހުމާނެވެ. އަފްޢާނިސްތާނުގެ އިންޓަރިމް ޗީފް ސެލެކްޓަރު އަހުމަދު ސުލިމާން ހިލް ބުނީ މުޖީބުއްރަހުމާން ޓީމަށް ނުނެގީ މެޑިކަލް ސަބަބަކާހެދި ކަމަށެވެ. އޭނާ އަށް ލިބިފައިވާ އަނިޔާ މުޅިން ރަނގަޅުނުވާތީވެ ޑޮކްޓަރު ވަނީ ޓުވެންޓީ20 މެޗުތަކަށް ހާއްސަވާން އަންގާފަ އެވެ.
މުބާރާތަށް ދިއުމުގެ ކުރިން އަފްޢާނިސްތާން ޓީމު ޒިމްބާބުވޭއާއެކު މެޗުތަކެއް ކުޅޭނެ އެވެ. މި މެޗުތަކަށް ދާނީ ފައިނަލްކުރި 15 ކުޅުންތެރިންނާއި ރިޒާވް ތިން ކުޅުންތެރިން ވެސް ގޮވައިގެންނެވެ.
ޗެމްޕިއަންސް ޓްރޮފީގައި އަފްޢާނިސްތާން ހިމެނެނީ ސައުތު އެފްރިކާ އާއި އިންގްލޭންޑް އަދި އޮސްޓްރޭލިޔާއާ އެއްގްރޫޕެއްގަ އެވެ.