ސައްޙަ ނޫން ފޯމް ހުށަހަޅާ މައްސަލަ ހައްލުކުރަން ފިޔަވަޅުތައް ހަރުދަނާކުރާނަން: އިލެކްޝަންސް
-
މަޖިލިސް މެމްބަރެއްގެ ނަމުގައި ސައްޙަ ނޫން ފޯމެއް ހުށަހެޅި މައްސަލަ ވަނީ ފެންމަތިވެފައި
ސިޔާސީ ޕާޓީތަކަށް މީހުން ވެއްދުމަށް ސައްޙަ ނޫން ފޯމް ހުށަހަޅާ މައްސަލަ ހައްލުކުރެއްވުމަށް އިދާރީގޮތުން ފުރިހަމަކުރަންޖެހޭ ކަންކަން އިތުރަށް ހަރުދަނާކުރައްވާނެކަމަށް އިލެކްޝަން ކޮމިޝަނުން ވިދާޅުވެއްޖެއެވެ.
އިލެކްޝަން ކޮމިޝަނުން މިހެން ވިދާޅުވީ ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސެއިން ޒިޔާދަށް ނޭނގި އޭނާ ނިސްބަތްވާ ސިޔާސީ ޕާޓީ ބަދަލުކުރުމަށް އިލެކްޝަންސް ކޮމިޝަނަށް ފޯމެއް ހުށަހެޅި މައްސަލާގައެވެ.
އިލެކްޝަންސް ކޮމިޝަނުން ވިދާޅުވީ އެމްޑީޕީގެ މެމްބަރެއްގެ ގޮތުގައި ހުންނެވި މެމްބަރު ޒިޔާދު އެހެން ޕާޓީއަކަށް ރަޖިސްޓްރީކުރުމަށް ސައްޙަ ނޫން ފޯމެއް ހުށަހެޅި މައްސަލަ އެކޮމިޝަނުގެ ސަމާލުކަމަށް އައުމާއި ގުޅިގެން އެ ފޯމް ބާތިލުކޮށްފައިވާކަމަށެވެ. އަދި މެމްބަރު ޒިޔާދުގެ މެމްބަރޝިޕް ހައިޞިއްޔަތަށް އެއްވެސް ބަދަލެއް އައިސްފައިނުވާކަމަށްވެސް އިލެކްޝަންސް ކޮމިޝަނުން ވިދާޅުވެއެވެ.
https://t.co/JJJwxNsZch pic.twitter.com/N801mIP5At
— Elections Commission (@ElectionsMv) January 13, 2025
އިލެކްޝަންސް ކޮމިޝަނުން ވިދާޅުވީ މެމްބަރު ޒިޔާދަށް އެނގިވަޑައިގަތުމެއްނެތި، އޭނާ އެހެން ސިޔާސީ ޕާޓީއަކަށް ރަޖިސްޓްރީކުރުމަށް ފޯމް ހުށަހެޅުމުގައި ޒިންމާވާ ފަރާތްތަކުގެ މައްސަލަ އިތުރަށް ބަލައި، ފިޔަވަޅު އަޅުއްވާނެކަމަށެވެ. އަދި މިކަަމާއި ގުޅިގެން އިދާރީ ފިޔަވަޅުތައް ހަރުދަނާކޮށް، މިފަދަ ކަމެއް އިތުރަށް ތަކުރާރުނުވާނޭ ފަދައިން އިދާރީ އަދި ޤާނޫނީ އިންތިޒާމްތައް ހަމަޖައްސަވާނޭކަމުގެ ޔަގީންކަން ދެއްވާކަމަށްވެސް އިލެކްޝަންސް ކޮމިޝަނުން ވިދާޅުވެއެވެ.
ރައްޔިތުންގެ މަޖިލީހުގެ މެމްބަރެއްގެ ނަމުގައި އިލެކްޝަންސް ކޮމިޝަނަށް ސައްޙަ ނޫން ފޯމެއް ހުށަހަޅާފައިވާއިރު ބައެއް އާއްމު ރައްޔިތުންގެ ނަމުގައިވެސް ސައްޙަ ނޫން ފޯމްތައް ހުށަހަޅާ މައްސަލަ ވަނީ ފެންމަތިވެފައެވެ. އެފަދަ މައްސަލަތައް ފެންމަތިވުމުން އެކަމާއި ގުޅިގެން އަޅުއްވަންޖެހޭ ފިޔަވަޅުތައް އިލެކްޝަންސް ކޮމިޝަނުން ދަނީ އަޅުއްވަމުންނެވެ.