ޖަޕާނުގެ ހުޅަނގުދެކުނު ކްޔޫސޫ ސަރަޙައްދަށް ބާރުގަދަ ބިންހެލުމެއް އައުމާ އެކު، ސުނާމީއެއް އުފެދިދާނެ ކަމުގެ އިންޒާރު ކޮށްފިއެވެ. މިޔަޒަކީ ޕްރިފެކްޗަރގެ ކްޔޫސޫއަށް އައި ބިންހެލުން ރެކޯޑު ކުރެވިފައި ވަނީ ރިކްޓަރ މިންގަނޑުން 6.6ގައި ކަމުގައި ވިލާތާއި މެޑިޓެރޭނިޔަން ސަރަޙައްދުގެ ބިންހެލުންތަކާ ބެހޭ އިދާރާ (އީއެމްއެސްސީ)ން ހާމަކުރިއެވެ. ބިންހެލުން އައިސްފައި ވަނީ ބިމުގެ ސަޠުޙަށްވުރެ 37 ކިލޯމީޓަރު ފުނަށެވެ.
އެމެރިކާގެ ބިންހެލުންތަކާ ބެހޭ އިދާރާއިން ބުނީ، އެ ބިންހެލުމުގެ ލޮޅުންތައް ރިކްޓަރ މިންގަނޑުން 6.9ގައި ރެކޯޑު ކުރެވިފައިވާ ކަމުގައެވެ. ބިންހެލުމާ ގުޅިގެން ސުނާމީއެއް އުފެދިދާނެ ކަމުގެ އިންޒާރު ނެރެފައިވާއިރު، ޖަޕާނުގެ މޫސުމާ ބެހޭ އިދާރާއިން ބުނީ އުފެދޭ ސުނާމީއެއްގެ ރާޅުތަކުގެ އުސްމިން 1 މީޓަރަށް އުފުލޭނެ ކަމަށް އަންދާޒާ ކުރެވޭ ކަމުގައެވެ. ސުނާމީގެ ރާޅުތަކުގެ އަސަރު ކުރާނެ ކަމަށް ބެލެވެނީ މިޔަޒަކީއާއި ކޯޗީ ޕްރިފެކްޗަރގެ އައްސޭރިފަށުގެ ސަރަޙައްދުތަކަށް ކަމުގައި ވެސް ޖަޕާނުގެ މޫސުމާ ބެހޭ އިދާރާއިން ހާމަކުރިއެވެ.
ކްޔޫސޫއަށް އައި ބިންހެލުމާ ގުޅިގެން އެ ސަރަޙައްދުގައި ރައްކާތެރި ކަމުގެ ފިޔަވަޅުތައް އަޅާފައިވާ ކަމުގައި ރިޕޯޓުތައް ބުންޏެވެ. ޖަޕާނަކީ އަލިފާންފަރުބަދަތައް ގިނަ، 'ރިންގ އޮފް ފަޔަރ'ގެ ނަން ދީފައިވާ ސަރަޙައްދުގައި އޮންނަ ޤައުމެކެވެ. އެއީ، ބިންހެލުންތަކާއި ލޮޅުންތައް ޢާންމު، ނުރައްކާތެރި ސަރަޙައްދެކެވެ.