ސްޕެނިޝް ސުޕަ ކަޕުގައި ރޭ ބާސެލޯނާ އަތުން 5-2 އިން ރެއާލް މެޑްރިޑް ބަލިވި މެޗުގައި އޭނާގެ ޓީމުން ރަނގަޅަށް ކުޅުނު ހަމައެކަނި ކުޅުންތެރިއަކީ ފޯވަޑް ކީލިއަން އެމްބާޕޭ ކަމަށް ކޯޗު ކާލޯ އަންޗެލޮޓީ ބުނެފި އެވެ.
މެޗަށް ފަހު ވާހަކަ ދައްކަމުން އަންޗެލޮޓީ ބުނީ މެޗުގެ ފުރަތަމަ ގޯލު ޖެހި އެމްބާޕޭ އަކީ އޭނާގެ ޓީމުން މެޗުގެ މޭން އޮފް ދަ މެޗު ކަމަށެވެ.
"ފުރަތަމަ ހާފުގައި އަހަރުމެން ނޫޅޭ ކުޅޭކަށް. ބޮޑު ބޯޅަ ޖެހީ. ދިގު ބޯޅަތަކެއް ކުޅެން އުޅުނީ. އަހަރެން ހާފް ޓައިމްގައި ކުޅުންތެރިން ގާތުގައި ވެސް ބުނިން މި ވާހަކަ. މި ގޮތަށް ކުޅެގެން މޮޅުނުވާނެއޭ. އަހަރުމެން ފުޓްބޯޅަ ކުޅެން އެބަޖެހެއޭ ވިސްނަން،ކާލޯ އަންޗެލޮޓީ
އޭނާ ބުނީ ފުޓްބޯޅައިގައި އޮންނާނީ އަބަދުވެސް ދެ ގޮތް ކަމަށެވެ. މިހެންވެ ރެއާލް މެޑްރިޑުން ފަހަތަށް ނުބަލައި ކުރިއަށްދާން ވިސްނަންޖެހޭ ކަމަށެވެ. މާނައަކީ މި މެޗު ހަނދާން ނައްތާލާފައި ކުރިއަށް ހުރި މެޗުތަކާއިގެން ކުރިއަށްދާންވީ ކަމަށެވެ.
"އަހަރުމެންގެ ޑިފެންސް ކުރުން ވެސް ދިޔައީ ވަރަށް ގޯސްކޮށް. އޭގެ ސަބަބުން އަހަރުމެން ކޮޅަށް ހީނުކުރާ ކަހަލަ ގިނަ ބޯޅަތަކެއް ވަދެފި. އެއީ މެޗުގެ ތަފާތު އެހާ ބޮޑުވި ސަބަބަކީ. ދެން މިއީ ފުޓްބޯޅަ. ބައެއް ފަހަރު މޮޅުވުމުގެ ގާބިލްކަން ހުއްޓަން ބަލިވެގެންދޭ. އަނެއް ބައި ފަހަރު އެއާ ތަފާތުކޮށް ވެސް ނަތީޖާ ފެނޭ،ކާލޯ އަންޗެލޮޓީ
މި މުބާރާތުގެ އެންމެ ކާމިޔާބު ޓީމަކީ ބާސެލޯނާ އެވެ. މިއީ އެ ޓީމުން މި ތަށި ހޯދި 15 ވަނަ ފަހަރެވެ.
ބާސެލޯނާ އަތުން ބޮޑު ތަފާތަކުން ބަލިވުމުން ރެއާލް މެޑްރިޑުގެ ޓީމަށް މިހާރު ކުރިއަށްދާ ޓްރާންސްފާ މާކެޓުގައި ނުވަތަ އަންނަ ޖޫން މަހު ބޮޑު ބަދަލެއް ގެންނާނެ ކަމަށް މިހާރު ވެސް ތަޖުރިބާކާރުން ވަނީ ބުނަން ފަށައިފަ އެވެ.