ރާއްޖޭގެ ބްރޯޑްކާސްޓިންގެ ދާއިރާގައި ހަރަކާތްތެރިވަމުންދާ ފަރާތްތަކާއި، މި ދާއިރާއަށް އަލަށް ވަންނަން ބޭނުންވާ ޒުވާނުންނަށް، ތައުލީމާ ތަމްރީނުގެ ފުރުސަތުތައް ފަހިކޮށްދިނުމުގެ ގޮތުން، މޯލްޑިވްސް ބްރޯޑްކާސްޓިން ކޮމިޝަނާ، ޕަބްލިކް ސަރވިސް މީޑިޔާއާއި، ދެމެދު އެއްބަސްވުމެއްގައި މިއަދު ސޮއިކޮށްފިއެވެ.
މި އެއްބަސްވުމުގައި ބްރޯޑްކާސްޓިން ކޮމިޝަންގެ ފަރާތުން ސޮއިކުރެއްވީ، ކޮމިޝަންގެ ރައީސް މުހައްމަދު ޝަހީބެވެ. ޕީ.އެސް.އެމްގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ އިބްރާހީމް ޚަލީލެވެ.
ބްރޯޑްކާސްޓިން ކޮމިޝަންގެ ރައީސް މުހައްމަދު ޝަހީބު ވިދާޅުވީ، މީޑިޔާތަކަކީ ގައުމެއްގެ އެންމެ ނުފޫޒުގަދަ އެއް ބަޔަށް ވާއިރު، މީޑިޔާ ތަކަކީ ޒިންމާދާރު ކަމާއެކު ކުރިއަށްދާ ބަޔަކަށް ހެދުމަށް ކަމާގުޅޭ އިލްމީ އަދި ފަންނީ ތަޖުރިބާ ހުރުމަކީ މުހިންމު ކަމެއް ކަމަށެވެ.
ޕީ.އެސް.އެމްގެ މެނޭޖިން ޑިރެކްޓަރ އިބްރާހީމް ޚަލީލް ދެއްކެވި ވާހަކަފުޅުގައި، މީޑިޔާއަކީ ހަމައެކަނި ނޫސްވެރިން ނޫން ކަމަށާއި، މީޑިޔާ އަކީ ބްރޯޑްކާސްޓިން ދާއިރާގައި ޙަރަކާތްތެރިވާ އެންމެން ކަމަށް ވިދާޅުވިއެވެ. އަދި ރާއްޖޭގައި މީޑިޔާތައް ފުޅާ ވެފައިވީ ނަމަވެސް، އެކަށީގެންވާ ތަމްރީން ލިބިފައިވާ ޒުވާނުން މަދުކަން ފާހަގަކުރައްވަމުން، އެ ފަދަ ޒުވާނުންގެ ބިންގާ އަޅައިދިނުމަށް ޕީ.އެސް.އެމުން ތައްޔާރަށް އޮތް ކަމަށް ވިދާޅުވިއެވެ.
ދައުލަތުގެ މީޑިޔާގެ ހައިސިއްޔަތުން، ޕަބްލިކް ސަރވިސް މީޑިޔާ، ޕީ.އެސް.އެމުން މިހާރުވެސް އަންނަނީ، މޯލްޑިވްސް މީޑިޔާ އިންސްޓިޓިއުޓްގެ ނަމުގައި، އުފައްދާފައިވާ އިންސްޓިޓިއުޓް މެދުވެރިކޮށް، މީޑިޔާގެ ދާއިރާގައި މީހުން ބިނާ ކުރުމަށް ގިނަ މަސައްކަތްތަކެއް ކުރައްވަމުންނެވެ. މި އިންސްޓިޓިއުޓު އުފެއްދިތާ އަހަރެއް ފާއިތުވެ ދިޔައިރު، ރޭޑިޔޯ ބްރޯޑްކާސްޓިން، ޓީވީ ބްރޯޑްކާސްޓިން، އަދި ޓެކްނިކަލް މީހުންނާއި، ކެމެރާމަނުން ބިނާ ކުރުމުގެ، ގައުމީ ސަނަދުތަކުގެ ސެޓްފިކްޓް އޮނިގަނޑަށް ފެތޭ ކޯސްތަކެއް ވަނީ ކުރިއަށްގެންދަވާފައެވެ.
މޯލްޑިވްސް ބްރޯޑްކާސްޓިން ކޮމިޝަނަކީ ބްރޯޑްކާސްޓަރުންގެ ބެލެނިވެރި ފަރާތް ކަމަށްވީއިރު، އެ ކޮމިޝަނާ، ޕީ.އެސް.އެމް އާ ދެމެދު ވެވުނު މި އެއްބަސްވުމުގެ ދަށުން، ރާއްޖޭގެ ބްރޯޑްކާސްޓިން ދާއިރާގައި ހަރަކާތްތެރިވާ ފަރާތްތަކާއި، މި ދާއިރާއާ އަލަށް ގުޅެން ބޭނުންވާ ޒުވާނުންނަށް، މޯލްޑިވްސް މިޑިޔާ އިންސްޓިޓިއުޓުން އެ ދާއިރާތަކުން ތައުލީމާ، ތަމްރީންގެ ޕްރޮގްރާމްތަކާ، ޑިގްރީ އަދި މާސްޓަރސް ލެވެލްގެ ކޯސްތަކުގައި ބައިވެރިވުމުގެ ފުރުސަތު ލިބިގެންދާނެއެވެ.