ޢާންމުކޮށް އިޢުލާނު ކުރުމަކާ ނުލައި ރަށްތަކާއި ބިމާއި ފަޅު ފަތުރުވެރިކަމަށް ކުއްޔަށް ދެވޭ ގޮތަށް ރައްޔިތުންގެ މަޖިލީހުން މިއަދު ފާސްކުރައްވައިފިއެވެ. ޓޫރިޒަމާބެހޭ ޤާނޫނަށް މި އިޞްލާޙު ހުށައެޅުއްވީ ރައްޔިތުންގެ މަޖިލީހުގެ މެޖޯރިޓީ ލީޑަރު، ވިލިމާލެ ދާއިރާގެ މެމްބަރު އަޙްމަދު ނިހާން ޙުސައިން މަނިކެވެ.
ޓޫރިޒަމާ ބެހޭ ޤާނޫނުގައި މިހާރު ބުނެފައިވާ ގޮތުން ޓޫރިސްޓް ރިސޯޓު ހެދުމަށް ރަށްރަށާއި ބިން ކުއްޔަށް ދޫކުރަން ވާނީ، މިނިސްޓްރީ އޮފް ޓޫރިޒަމުން އާންމުކޮށް އިއުލާންކޮށްގެން، ކަނޑައެޅިފައިވާ އުސޫލެއްގެ މަތިން، އެކަށީގެންވާ އެންމެ ރަނގަޅު ހުށަހެޅުމެއް ހުށަހަޅާ ފަރާތަކަށް ކަމަށެވެ. ނަމަވެސް ޓޫރިޒަމާ ބެހޭ ޤާނޫނަށް ވިލިމާލެ ދާއިރާގެ މެމްބަރު އަޙްމަދު ނިޙާން ޙުސައިން މަނިކު ހުށައަޅުއްވާފައިވާ އިޞްލާޙުގައި ވަނީ ޢާންމުކޮށް އިޢުލާނު ކުރުމަކާ ނުލައި ފަތުރުވެރިކަމާބެހޭ ކަންކަމަށް ރަށް، ނުވަތަ ބިން ނުވަތަ ފަޅު ކުއްޔަށް ދޫކުރެވޭނެ ކަމަށެވެ.
އެގޮތުން އެތަނެއް ކުއްޔަށް ދެވޭނީ އެތަނެއް ހިންގުމަށް ތިމާވެށީގެ ގޮތުން އެކަށީގެންވާ ތަނަކަށްވުމާއި، އެކުއިޒިޝަން ފީ އެކީ އެއްފަހަރާ ދައްކާފައިވުމާއި، މާލީ ގޮތުންނާއި ފަންނީ ގޮތުން ޤާބިލް ފަރާތަކަށް ވުމުންކަމަށް ފާސްކުރެއްވި އިޞްލާޙުގައިވެއެވެ. އަދި އެތަނެއް ކުއްޔަށް ދޫކުރުމުގެ ކުރިން ރައީސްޖުމްހޫރިއްޔާގެ އޮފީހުން ހުއްދަ ހޯދަންޖެހޭނެކަމަށްވެސް ބަޔާންކުރައްވާފައިވެއެވެ. މި ބިލަށް މަޖިލީހުގެ ތަޅުމުން އިދިކޮޅު މެމްބަރުން 6 އިޞްލާޙެއް ހުށައެޅުއްވިއެވެ. ނަމަވެސް އެ އިޞްލާޙުތައް ބަލައިގަންނަން ފާސްވެފައެއް ނުވެއެވެ. މި ބިލާމެދު ވާހަކަދައްކަވަމުން ނިހާން ވިދާޅުވީ އިޢުލާން ކުރުމަކާ ނުލައި ރަށްތައް ކުއްޔަށްދެވޭނެ ގޮތް ހެދުމަކީ އަލަށް ކުރައްވާކަމެއް ނޫންކަމަށާއި، މިއީ ޤާނޫނަށް މިކަން ފައްތައި، އިމުގެ ތެރެއަށް އެކަން ގެނައުމަށް ހުށައެޅުއްވި އިޞްލާހެއް ކަމަށެވެ. މި އިޞްލާޙު ފާސްކުރުމަށް ވޯޓު ނުދިނުމަށް ޕީޕީއެމްގެ ރައީސް މައުމޫން ޢަބްދުލްޤައްޔޫމް ވަނީ ޕާލިމަންޓް މެމްބަރުންނަށް ގޮވާލައްވާފައެވެ. ނަމަވެސް ރައީސް މައުމޫން ފާޅުކުރެއްވީ އެމަނިކުފާނު ދެކެވަޑައިގަންނަވާ ގޮތް ކަމަށް ވިދާޅުވެ، ނިހާން ވަނީ ރައީސް މައުމޫނުގެ އެދިވަޑައިގަތުމަށް ފުރިހަމައަށް އިހުތިރާމް ކުރައްވާ ކަމަށް ވިދާޅުވެފައެވެ. މި މަސައްކަތުގެ ސަބަބުން ޕީޕީއެމްގެ ތެރޭގައި ޚިޔާލު ތަފާތުވުން އުފެދޭނެކަމަށް ޤަބޫލް ނުކުރައްވާ ކަމަށާއި، ވޭތުވެދިޔަ ތިން ސަރުކާރުން ވެސް ބިޑު ކުރުމެއް ނެތި، ފަތުރުވެރިކަމާ ބެހޭ ކަންކަމަށް ރަށްތަކާއި ފަޅުތައް ދޫކުރައްވާފައިވާކަމަށް ނިހާން ވިދާޅުވިއެވެ. މި އިޞްލާހަށް ސަރުކާރަށް ތާއީދުކުރާ މެމްބަރުން ތާއީދުކުރެއްވި ނަމަވެސް އިދިކޮޅު މެމްބަރުން މި އިޞްލާހަށް ވަނީ ދެކޮޅު ހައްދަވާފައެވެ.
މި ޤާނޫނަށް ނިހާން ހުށައަޅުއްވާފައިވާ މިއަދު ފާސްކުރައްވާފައިވާ އިތުރު އިޞްލާޙުތަކުގެ ތެރޭގައި ފަތުރުވެރިކަމަށް ކުއްޔަށް ދީފައިވާ ރަށްތަކާއި ބިންތައް ކުއްޔަށް ދޫކޮށްފައިވާ މުއްދަތު އަލުން ހުޅުވާލައި ކުއްޔަށް ދޫކުރައްވާފައިވާ މުއްދަތު އިތުރުކުރުމަށް ދައްކަންޖެހޭ ފީ ދެއްކުމަށް އައު މުއްދަތެއް ވަނީ ކަނޑައަޅުއްވާފައެވެ. އެގޮތުން 36 މަސްދުވަހުގެ ތެރޭގައި މުއްދަތު އިތުރުކޮށް ނިންމަންވާނެ ކަމަށް މިއަދު ފާސްކުރެއްވި އިޞްލާޙުގައިވެއެވެ. އަނެއް އިޞްލާޙުގައި ވަނީ، ފަތުރުވެރިކަމާބެހޭ ކަންކަމާ ގުޅިގެން ޓޫރިޒަމާބެހޭ މިނިސްޓްރީން ދެއްވާ ޚިދުމަތްތަކަށް ޚިދުމަތުގެ ފީއެއް ނެގޭނެ ކަމަށެވެ. އެގޮތުން ޤާނޫނަށް ޢަމަލުކުރަން ފަށާ ތާރީޚުން ފެށިގެން 3 މަސްދުވަހުގެ ތެރޭގައި ފީ ނެގޭނެ ޤަވާއިދު ހަދައި، ގެޒެޓް ކުރަންވާނެކަމަށް ބިލްގައި ބަޔާން ކުރައްވާފައިވެއެވެ.