މިހަފްތާގެ ނިޔަލަށް ފަޤީރުންގެ ލިސްޓު އެކުލަވާލާ ނިންމާލެވޭނެކަމަށް މިނިސްޓްރީ އޮފް އިސްލާމިކް އެފެއަރޒް އިން ވިދާޅުވެއްޖެއެވެ.
ފަޤީރުންގެ ލިސްޓުގެ ގޮތުގައި އެކުލަވާލާ ލިސްޓަކީ، ޒަކާތުގެ ގޮތުގައި ލިބޭ ފައިސާ ފަޤީރުންގެ މެދުގައި ބެހުމަށް އެކުލަވާލާ ލިސްޓެކެވެ.
ފަޤީރުންގެ ގޮތުގައި ރާއްޖޭގައި ބައްލަވާ މިންގަނޑަކީ އާމްދަނީގެ ގޮތުގައި ދުވާލަކަށް 44 ރުފިޔާ ނުލިބޭ ކޮންމެ މީހެކެވެ. އެގޮތުން މިފަދަ މީހުންގެ ލިސްޓު އެކުލަވާލެއްވުމުގެ މަސައްކަތް އިސްލާމިކް މިނިސްޓްރީން ކައުންސިލް އިދާރާތަކާއި ގުޅިގެން ދަނީ ކުރައްވަމުންނެވެ. ފަޤީރުންގެ ލިސްޓު އެކުލަވާލެއްވުމަށްޓަކައި ކޮންމެ ރަށެއްގައިވެސް ތިބޭ ފަޤީރުން އެކަމަށް ކަނޑައެޅިފައިވާ ފޯމެއް ފުރިހަމަކޮށް ކައުންސިލް އިދާރާއަށް ހުށައަޅަންޖެހެއެވެ.
އިސްލާމިކް މިނިސްޓަރގެ ނާއިބު އައްޝައިޚް އިބްރާހީމް އަޙުމަދު ވިދާޅުވީ ފަޤީރުންގެ ލިސްޓު މިގޮތަށް އެކުލަވާލަން ނިންމެވީ އެލިސްޓަކީ ސައްޙަ ލިސްޓަކަށް ހެއްދެވުމުގެ ބޭނުމުގައި ކަމަށެވެ. އަދި މި ލިސްޓު އަޕްޑޭޓްކުރެވޭނެ ކަމަށްވެސް އޭނާ ވިދާޅުވިއެވެ. ޝައިޚް އިބްރާހީމް ވިދާޅުވީ، ފަޤީރުންގެ ލިސްޓު އެކުލަވާލާ ފޯމްގައި ހިމެނޭ މަޢުލޫމާތުތަކުގެ ހެކިތައް ލިޔެކިޔުމުން ސާބިތުވާނެގޮތަކަށް ކަނޑައަޅުއްވާފައިވާ ކަމަށެވެ.
ފަޤީރުންގެ ލިސްޓު އެކުލަވާލެއްވުމަށްފަހު ޒަކާތުގެ ގޮތުގައި ލިބޭ ފައިސާ ބެހިގެންދާނީ ލިސްޓުކުރެވޭ ފަޤީރުންގެ މެދުގައެވެ.