ސޫރިޔާގެ ވެރިރަށް ދިމިޝްޤުގެ ރަށްބޭރުގައި ހުންނަ، محمد رسول اللهގެ ދޮށީ ދަރިކަނބަލުން ޒައިނަބުގެފާނުގެ ޒިޔާރަތަށް އައިއެސް ޖަމާޢަތުން ދޭން މަސައްކަތް ކުރި ނިރުބަރި ޙަމަލާއެއް ނާކާމިޔާބުކޮށްލާފައިވާ ކަމަށް، ސޫރިޔާ ޖާސޫސީ އިދާރާ، ޖެނެރަލް އިންޓެލިޖެންސް ޑިރެކްޓޮރޭޓުން ބުނެފިއެވެ.
އެ އިދާރާއިން ބުނީ، ޒަޔިނަބުގެފާނުގެ ޒިޔާރަތުގެ އެތެރޭގައި ބޮމެއް ގޮއްވައިލަން އުޅެނިކޮށް އެ ޙަމަލާ ހުއްޓުވައި، އެ ކަމުގައި ބައިވެރިވި އައިއެސް ޖަމާޢަތުގެ ހަނގުރާމަވެރިން ހައްޔަރުކޮށްފައިވާ ކަމަށެވެ. އެއާ އެކު ސޫރިޔާގެ ރައީސް ބައްޝާރު އަލް-އަސަދުގެ ވެރިކަން ވެއްޓުމާ އެކު، އައިސް ޖަމާޢަތުން ސޫރިޔާއަށް އަނެއްކާވެސް އަތްގަދަކުރަން މަސައްކަތް ކުރާ ކަމުގެ ބިރު އެ ޒިޔާރަތަށް ދޭން އުޅުނު ޙަމަލާއާ އެކު ވަނީ އިތުރަށް ބޮޑުވެފައެވެ.
ސޫރިޔާގައި ވެރިކަމާ ވަގުތީ ގޮތުން ހަވާލުވެފައިވާ ތަޙްރީރް އަލް-ޝާމް (އެޗްޓީއެސް)އަކީ ސުންނީ މުސްލިމުންނަށް ނިސްބަތްވާ ޖަމާޢަތެކެވެ. އެހެންކަމުން، ސޫރިޔާގެ ޝިޔަޢީންނާއި ނަޞާރައިން ފަދަ ބައިމަދު ދަރިކޮޅުތަކުގެ މީހުންނާ މެދު ތަފާތު ކުރުން ގެންގުޅެފާނެ ކަމުގެ ކަންބޮޑުވުން ދަނީ ފާޅުކުރަމުންނެވެ.
ނަމަވެސް، ޝިޔަޢީންގެ މެދުގައި މަޤްބޫލް ޒިޔާރަތަކަށް ދޭން އުޅުނު ޙަމަލާއެއް ނާކާމިޔާބުކޮށްލާފައި ވަނީ، ސޫރިޔާގެ ހުރިހާ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރާނެ ކަމަށް އެޗްޓީއެސުން ބުނަމުންދާ ދަނޑިވަޅެއްގައެވެ.
"ޖެނެރަލް އިންޓެލިޖެންސް ޑިރެކްޓަރޭޓުން ދަނީ ހުރިހާ ދީންތަކާއި ނަޞްލުތަކެއް ހިމެނޭ ގޮތަށް، ސޫރިޔާގެ ރައްޔިތުންނަށް އަމާޒުކޮށްގެން ކުރާ މިފަދަ ހުރިހާ މަސައްކަތަކާ ދެކޮޅަށް ހުރިހާ ވަޞީލަތްތަކެއް ބޭނުން ކުރަމުން،" އެ އިދާރާއިން ބުންޏެވެ.
މިސްކިތަކާ އެކު ބިނާކޮށްފައިވާ ޒައިނަބުގެފާނުގެ ޒިޔާރަތަށް އައިއެސްގެ ޙަމަލާތައް މީގެ ކުރިން ވެސް އަމާޒުކޮށްފައިވެއެވެ. މި ގޮތުން، 2017 ވަނަ އަހަރު މި ޒިޔާރަތުގައި ބޮމެއް ގޮއްވާލައިގެން ދިން ޙަމަލާގައި 40 މީހުން ވަނީ މަރުވެފައެވެ.
އަސަދުގެ 13 އަހަރުގެ ދިގު ވެރިކަމުގައި، އެ ޒިޔާރަތުގެ ދިފާޢުގައި ޝިޔަޢީންގެ ހަނގުރާމަވެރި ޖަމާޢަތްތައް އެ ސަރަޙައްދަށް ޖަމާވިއެވެ. ނަމަވެސް، އަސަދުގެ ވެރިކަން ވެއްޓުމަށްފަހު، އެ ޖަމާޢަތްތަކުގެ ބާރު އެ ސަރަޙައްދުގައި ވަނީ ފަނޑުވެފައެވެ.