މެންޗެސްޓަރ ސިޓީގެ އިނގިރޭސި ޑިފެންޑަރ ކައިލް ވޯކާ އެ ކްލަބުން ދޫކޮށްލަން ބޭނުންވާކަން އެ ކްލަބަށް އަންގާފައިވާކަމަށް ކޯޗު ޕެޕް ގަޑިއޯލާ ބުނެފި އެވެ.
އެފްއޭ ކަޕްގެ ތިންވަނަ ބުރުގައި ސެލްފޯޑް އާއި ދެކޮޅަށް ކުޅުނު މެޗަށްފަހު ނޫސްވެރިންނާ ވާހަކަ ދައްކަމުން ގަޑިއޯލާ ބުނެފައިވަނީ ކައިލް ވޯކާ މިދިޔަ ބުރާސްފަތި ދުވަހު އެ ކްލަބުގެ ޑިރެކްޓަރ އޮފް ފުޓްބޯލް ސިކީ އާއި ބައްދަލުކޮށް އޭނާ އެ ކްލަބު ދޫކޮށް އެހެން ކްލަބަކަށް ދިއުމަށް އޮތް ފުރުސަތުތައް ބަލަމުންދާ ކަމަށް ބުނެފައިވާ ކަމަށެވެ.
ތިންވަނަ ޑިވިޝަނުގެ ސެލްފޯޑް އަތުން ސިޓީ 8-0 ގެ ނަތީޖާއަކުން މޮޅުވި މެޗުގެ ސްކޮޑުގައިވެސް ވޯކާ ހިމަނާފައެއް ނުވެއެވެ.
ސިޓީ އާއި ވޯކާ އާއި ދެމެދު ހަދާފައިވާ އެއްބަސްވުމުގައި ބާކީ 18 މަސް ދުވަސް އޮތްއިރު އުމުރުން 34 އަހަރުގެ ޑިފެންޑަރ ދިއުމަށް މަސައްކަތް ކުރަމުންދަނީ ޖަރުމަނުގެ ބަޔާން މިއުނިކަށެވެ.
ގަޑިއޯލާ އިތުރަށް ބުނެފައިވަނީ 2023 ވަނަ އަހަރުގެ ސީޒަނަށްފަހުވެސް ވޯކާ ހޯދުމަށް ބަޔާން މިއުނިކް އިން މަސައްކަތް ކުރި ކަމަށާއި ނަމަވެސް އޭރު ސިޓީން އޭނާ ވިއްކާލުމަށް ބުނި އަގު ބޮޑުވުމުގެ ސަބަބުން ބަޔާން މިއުނިކް އިން ވަނީ އެ މަޝްވަރާތައް ހުއްޓާލާފަ އެވެ.
މި ސީޒަނުގައި އެދެވޭ ނަތީޖާތަކެއް ހޯދިފައިނުވާ މެންޗެސްޓަރ ސިޓީން ދަނީ މިހާރު ކުރިއަށްދާ ޖެނުއަރީ ޓްރާންސްފަރ ޕީރިއަޑްގައި އެ ކްލަބް އިތުރަށް ވަރުގަދަ ކުރުމުގެ ގޮތުން ކުޅުންތެރިން ހޯދުމުގެ މަސައްކަތް ފަށާފަ އެވެ.
އެގޮތުން ފްރާންސްގެ ލެންސް އަށް ކުޅެމުންދާ އުޒްބެކިސްތާނުގެ ޑިފެންޑަރ އަބްދުކާދިރު ހުސަނޯވް ހޯދުމަށް ދެ ކްލަބުން ވަނީ 33.6 މިލިއަން ޕައުންޑުގެ ފީއަކަށް އެއްބަސްވެފަ އެވެ.