ބޮޑެތި ބަދަލުތަކާއެކު "އަވަސް އެޕް" އަލުން އިފްތިތާހްކޮށްފި

ބަދަލުތަކާއެކު އަވަސް ރައިޑްގެ އައު އެޕްލިކޭޝަން "އަވަސް އެޕް" އިފްތިތާހްކޮށްފިއެވެ.

އަވަސް އެންޓަޕްރައިސްގެ އަވަސް ރައިޑް އެޕްލިކޭޝަނަކީ މިހާރު ވެސް ގިނަ އަދަދެއްގެ މީހުން ބޭނުންކުރާ އެޕްލިކޭޝަނެކެވެ.

ދަތުރުފަތުރުގެ ޚިދުމަތަށް ބަދަލެއް ގެނައުމަށް މަސައްކަތް ކުރަމުން އަންނަ ދިވެހި، ޒުވާން ޓީމަކާއެކު ހިންގާ އަވަސް ރައިޑަކީ ރާއްޖޭގައި އެންމެ ފުޅާކޮށް ޓެކްސީގެ ޚިދުމަތް ދޭ އެއް އެޕެވެ.

އަވަސް އެޕް ތައާރަފްކުރުމަށްޓަކައި އިއްޔެ ހަވީރުން ފެށިގެން ރޭގަނޑު 9:30އާ ހަމައަށް ހުޅުމާލޭ ސެންޓްރަލް ޕާކްގައި ވަނީ ހަރަކާތްތަކެއް ކުރިއަށް ގެންގޮސްފައެވެ. މިހަރަކާތްތައް ފަށާފައިވަނީ ކުޑަކުދިންގެ ހަވީރުންނެވެ. ކުޑަކުދިންގެ ހަވީރު ކުރިއަށްދިޔައީ ކުޅިވަރުގެ ގިނަހަރަކާތްތަކާއެކުއެވެ. މިހަރަކާތްތަކުގެ ތެރޭގައި ހިމަނައިގެން ރޭ ހަވާވެސް އެރުވިއެވެ.

އަވަސް އެޕް އިފްތިތާހްކުރުމަށް ބޭއްވި ރަސްމިއްޔާތުގައި މިއެޕް ރަސްމީކޮށް އިފްތިތާހްކޮށްދެއްވީ، ބޭންކް އޮފް މޯލްޑިވްސްގެ ސީއީއޯ މުހައްމަދު ޝަރީފެވެ.

މިރަސްމިއްޔާތުގައިވަނީ އަވަސް އެޕް ފޯނަށް ޑައުންލޯޑްކޮށްގެން ގުރުއަތުން ހޮވުނު ފަރާތަށްވަނީ ޕީއެސް 5އެއް ހަދިޔާކޮށްފައެވެ.

އައު ބަދަލުތަކާއެކު އަވަސް އެޕް އިފްތިތާހްކޮށްފައިވާއިރު، މިއެޕް މެދުވެރިކޮށް އޮންލައިންކޮށް ގިނަ ޚިދުމަތްތައް ލިބެއެވެ. މި އެޕާއެކު ރައްޔިތުންނަށް މިހާރަށް ވުރެ ރައްކާތެރި އަދި ފަސޭހަ ޚިދުމަތެއް ދެވޭނެކަމަށް އަވަސް އެންޓަޕްރައިސަސްއިން ފާހަގަކުރެއެވެ.

އަވަސް ރައިޑުގެ ޚިދުމަތް އެންމެ ފުރަތަމަ ފެށީ 2019 ވަނަ އަހަރު މާލެސިޓީންނެވެ. ނަމަވެސް މިއަދު އަވަސް ރައިޑުގެ ޚިދުމަތް ރާއްޖޭގެ އެކި ކަންކޮޅުތަކުގައި ދެއެވެ. އަވަސް އެޕްގައި 3،000 އަށްވުރެ ގިނަ އުޅަނދު ރަޖިސްޓްރީވެފައިވާކަމަށް އަވަސް އެންޓަޕްރައިސަސްއިން ފާހަގަކުރެއެވެ.