އުސޫލުތަކާއި ހިލާފުވި އިތުރު އުމްރާ ގުރޫޕުތަކަށް ފިޔަވަޅު އަޅަނީ

މީހުން އުމްރާއަށް ގެންދިޔުމުގައި އުސޫލާ ޚިލާފަށް އަމަލުކޮށްފައިވާ އިތުރު ކުންފުނިތައް ފާހަގަވެފައިވާ ކަމަށާއި، އެ ކުންފުނިތަކަށް ފިޔަވަޅު އަޅާނެ ކަމަށް އިސްލާމީ ކަންތައްތަކާބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

އިސްލާމީ ކަންތައްތަކާބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވީ ރާއްޖެއިން މީހުން ޢުމްރާއަށް ދިޔުމާ ގުޅޭގޮތުން މިދިޔަ އަހަރުގެ އޮކްޓޫބަރު މަހުގެ 9ވަނަ ދުވަހު ގެޒެޓްކޮށްފައިވާ އުސޫލާ އެއްގޮތަށް ބައެއް ކުންފުނިތަކުން ޢަމަލުކޮށްފައިނުވާކަން ފާހަގަކުރެވިފައިވާ ކަމަށެވެ.

އަދި ގަވައިދާ ޚިލާފަށް ޢަމަލުކުރި ކުންފުނިތަކުން، އަމަލު ނުކޮށް ދޫކޮށްލި ކަންތައްތަކުގެ ކުޑަބޮޑު މިނަށް ބަލައި، އަންނަ ހަފްތާގައި އުސޫލުގައި ބުނާގޮތުގެ މަތީން ފިޔަވަޅު އަޅާނެކަމަށްވެސް ވަޒީރު ޝަހީމް ވަނީ ވިދާޅުވެފައެވެ.

މީހުން އުމްރާއަށް ގެންދިޔުމުގައި އުސޫލާ ޚިލާފަށް އަމަލުކޮށްފައިވާ އިތުރު ކުންފުނިތަކެއް ފާހަގަވެފައިވާ ކަމަށް ވަޒީރު ޑރ. ޝަހީމު ވިދާޅުވެފައިވާއިރު، މި ނިމުނު ޑިސެންބަރު މަހު އުމްރާއަށް ގެންގޮސް ހާލުގައި ޖެއްސުވި މައްސަލައެއް މިފަހުން ވަނީ ފެންމަތިވެފައެވެ. އެއީ އަލް-ހިޖްރަ ޓްރެވަލް އެންޑް ޓުއާސް ޕްރައިވެޓް ލިމިޑެޓުގެ ހަވާލުގައި އުމްރާއަށް ގެންދިޔަ މީހުންނެވެ. އެ ޤުރޫޕާ މެދު މިހާރު ވަނީ ފިޔަވަޅު އަޅާފައެވެ.

ވަޒީރު ވިދާޅުވީ ދިވެހިންނަށް އެހީތެރިކަން ބޭނުންވާ ދަނޑިވަޅުގައި ދިވެހި ސަރުކާރުން އަބަދުވެސް އިސްކުރާނީ ދިވެހި ރައްޔިތުންގެ ސަލާމަތާއި ރައްކާތެރިކަންކަމަށެވެ. އަދި ރާއްޖެ ނާދެވިފައި ތިބި މީހުން އަނބުރާ ރާއްޖެ ގެނައުމަށް ކޮށްދެވެން އޮތް ހުރިހާ މަސައްކަތެއް ކުރައްވާނެކަމަށްވެސް ވަޒީރު ވިދާޅުވިއެވެ.

މަޢުލޫމާތު ލިބިފައިވާގޮތުގައި މައްކާ ތާށިވެފައިވަނީ އަލްޙިޖްރު ނަމަކަށް ކިޔާ ކުންފުންޏެއްގެ ޙަވާލުގައި ޢުމްރާއަށް ދިޔަ 24 ދިވެއްސެކެވެ. އަދި މި މައްސަލަ ދިމާވީ ޢުމްރާއަށް ދިޔަ މީހުން މާލެ އައުމަށް ޓިކެޓް ނަގަން ހުރި ފައިސާ އެ ކުންފުނިން އެހެންކަންކަމަށް ޚަރަދުކުރުމުންކަމަށްވެސް މަޢުލޫމާތު ލިބެއެވެ.

ޢުމްރާއަށް މީހުން ގެންދިޔުމުގައި އިހުމާލުވާ ކުންފުނިތަކާމެދު އުސޫލުގެ ދަށުން ފިޔަވަޅު އަޅުއްވާނެކަމަށް އިސްލާމީ ކަންތައްތަކާބެހޭ ވުޒާރާއިން ވަނީ މީގެކުރިންވެސް ވިދާޅުވެފައެވެ.