ލޮސް އެންޖެލެސްގެ އަގުބޮޑު އަވަށްތައް އަނދާ އަޅިއަށް، 100،000 މީހުން ރައްކާތެރި ސަރަޙައްދުތަކަށް
އެމެރިކާގެ ލޮސް އެންޖެލެސްގެ ޖަންގަލިތަކެއްގައި ރޯވެ ޢާންމުން ދިރިއުޅޭ ސަރަޙައްދަށް ހަލުވިކަމާއެކު ފެތުރެމުންދާ ތިން އަލިފާންގަނޑުގެ ސަބަބުން ފަސް މީހުން މަރުވެ އެތައް ސަތޭކަ އިމާރާތެއް އަނދާ ހުލި ވެއްޖެއެވެ.
ޖަނަވަރީ މަހުގެ 7ވަނަ ދުވަހު ރޯވި އަލިފާންގަނޑުތައް ނިއްވާލުމުގައި ގަދަ ވައިގެ ސަބަބުން ބޮޑެތި ދަތިތަކާ ވަނީ ކުރިމަތި ވެފައެވެ. ވައި ގަދަވުމުގެ ސަބަބުން އަލިފާންގަނޑު އިތުރަށް ފެތުރުމަށް ވަނީ މެދުވެރިވެފައެވެ. އަލިފާނުގެ ސަބަބުން 100,000އަށްވުރެ ގިނަ މީހުން ގެދޮރު ދޫކޮށް ރައްކާތެރި ސަރަޙައްދުތަކަށް ދިއުމަށް ރަސްމީ އިދާރާތަކުން ވަނީ އަންގައިފައެވެ. އަލިފާންގަނޑުތައް ނިއްވައިލުމުގައި ފެނުގެ ދަތިކަން ވެސް މިހާރު ވަނީ ކުރިމަތިވެފައެވެ.
ތިން އަލިފާންގަނޑުގެ ތެރެއިން އެންމެ ބޮޑު ހުޅުގަނޑު ފެތުރެމުން ދަނީ ލޮސް އެންޖެލެސްގެ އިރުމަތީގައި އޮންނަ ޕެސިފިކް ޕެލިސޭޑްސް ކިޔައި ރީތި އަދި އަގުބޮޑު އަވަށެއްގައެވެ. އެ އަލިފާންގަނޑު މިހާތަނަށް 6,406 ހެކްޓަރަށް ވަނީ ފެތުރިފައެވެ. އެ ސަރަޙައްދުގައިވާ 1,000އަށް ވުރެ ގިނަ އިމާރާތް އަނދައި ބޮޑެތި ގެއްލުންތަކެއް ވަނީ ލިބިފައެވެ.
ދެވަނަ އަލިފާންގަނޑު ފެތުރެމުން ދަނީ ޕެސަޑީނާ ކައިރީގައި އޮންނަ އޮލްޓަޑީނާ ކިޔާ އަވަށެއްގައެވެ. އީޓަންގެ ނަން ދީފައިވާ އެ އަލިފާންގަނޑު 4,289 ހެކްޓަރުގެ ބޮޑު ސަރަޙައްދަކަށް ފެތުރިފައި ވެއެވެ. އެ ސަރަޙައްދުގައި ވެސް 1,000އަށް ވުރެ ގިނަ އިމާރާތް ވަނީ އެއްކޮށް އަންދައިފައެވެ. އެ ހުޅުގަނޑުގައި މިހާތަނަށް ފަސް މީހުން ވަނީ މަރުވެފައެވެ. އަލިފާނުގެ ގެއްލުން މިހާރު ވެސް 50 މިލިއަން ޑޮލަރަށް ވުރެ އިތުރު ވާނެ ކަމަށް ބެލެވެއެވެ.
އޭގެ އިތުރުން ލޮސް އެންޖެލެސްގެ ހުޅަނގު އުތުރުގައި އޮންނަ ސެން ފާނަންޑޯ ވެލީގެ ސިލްމާގައި ފެތުރެމުންދާ ހާސްޓު އަލިފާންގަނޑު މިހާތަނަށް 500 އަކަމީޓަރުގެ ސަރަޙައްދަކަށް ވަނީ ފެތުރިފައެވެ. ތިން އަލިފާންގަނޑު ވެސް އެއްވެސް މިންވަރަކަށް ކޮންޓްރޯލު ކުރެވިފައި ނުވާކަމަށް ރަސްމީ އިދާރާތަކުން ބުނެއެވެ.
އަލިފާނުގެ ސަބަބުން ޢާންމުންނަށް ބޮޑެތި އަނިޔާތަކެއް ދަނީ ވަމުންނެވެ. އެ ގޮތުން ރައްކާތެރި ސަރަޙައްދުތަކަށް ބަދަލުވާން އަންގާފައި ނުވާ ގިނަ ޢަދަދެއްގެ މީހުން ވެސް ޒަޚަމް ވެފައި ވެއެވެ. ކުރިއަށް އޮތް ދުވަހު ވެސް ވައި މަޑުނުވާނެ ކަމަށް ބެލެވޭތީ އަދި އޭގެ ސަބަބުން ހުޅުގަނޑު ފެތުރޭ މިންވަރު އިތުރަށް ހަލުވި ވަމުން ދާތީ އަލިފާންގަނޑު ފެތުރެމުންދާ ސަރަޙައްދުތަކުގައި ތިބި މީހުން ރައްކާތެރި ސަރަޙައްދުތަކަށް ދިއުން އަވަސް ކުރުމަށް ރަސްމީ އިދާރާތަކުން ދަނީ ގޮވައިލަންމުންނެވެ.
އަލިފާންގަނޑުތަކާ ގުޅިގެން ލޮސް އެންޖެލެސް ހިމެނޭ ކެލިފޯނިޔާ ސްޓޭޓުގެ ގަވަރުނަރު ގާވިން ނިއުސަމް ވަނީ އެ ސްޓޭޓުގައި ކުއްލި ނުރައްކަލުގެ ޙާލަތު އިޢުލާނު ކުރައްވައިފައެވެ. މުޅި ސަރަޙައްދު ދުމުން ފުރި އުޑުމަތި ރަތްވެފައިވާއިރު އަލިފާންގަނޑުން ސަލާމަތް ވުމަށް ރައްކާތެރި ސަރަޙައްދުތަކަށް ދަތުރުކުރަމުންދާ ކާރާއި އެހެން އުޅަނދުތަކުގެ ސަބަބުން މަގުތައް ވަނީ އެއްކޮށް ތޮށްޖެހި ބާރުބޮޑުވެފައެވެ. އުޅަނދުތައް ޓްރެފިކުގައި ތާށިވުމުގެ ސަބަބުން އެއް ބަޔަކު ދަނީ މަގުމައްޗަށް އުޅަނދުތައް ދޫކޮށް ސަލާމަތް ހޯދުމަށް އެހެން ގޮތްގޮތުން މަސައްކަތް ކުރަމުންނެވެ. ކުއްލި ޙާލަތުގައި މަސައްކަތްކުރާ ފަރާތްތަކުން ދަނީ ގޭގެއިން މީހުން ހުސްކުރުމުގެ ޢަމުރުތައް ހިފައިގެން ދޮރުން ދޮރަށް ހިނގަމުންނެވެ. އަލިފާނުގެ ސަބަބުން އެއް މިލިއަނަށް ވުރެ ގިނަ ގެދޮރާއި ވިޔަފާރިން ކަރަންޓުގެ ޚިދުމަތް ވެސް ވަނީ ކެނޑިފައެވެ.
ޕެސިފިކް ޕެލިސޭޑްސްއަކީ އެމެރިކާގެ އެންމެ އަގުބޮޑު އެއް އަވަށެވެ. ގިނަ ޢަދަދެއްގެ މަޝްހޫރު ފަންނާނުން ދިރިއުޅޭ އެ އަވަށުގެ ގެއެއްގެ އަގު އާންމުކޮށް 3.7 މިލިއަން ޑޮލަރަށް އަރައެވެ. އަގުބޮޑެތި ގެތައް ދޫކޮށް ޢާންމުން އެ ސަރަޙައްދު ދޫކޮށް ދަމުންދާއިރު އަލިފާނުގެ ސަބަބުން ލިބޭ ގެއްލުމުގެ އަގު އެތައް މިލިޔަނަކަށް އަރާނެ ކަމަށް ބެލެވެއެވެ. ޕެސަޑީނާ ސަރަޙައްދުގައި ވެސް ގޭގެއާއި ފައްޅިތަކާއި ވިޔަފާރިތައް ވަނީ އަލިފާނުގައި އަނދައި ގޮސްފައެވެ.
އަލިފާންގަނޑުތައް ފެތުރެން ފެށުމުގެ ކުރިން އެމެރިކާގެ ޤަައުމީ މޫސުމާ ބެހޭ ޚިދުމަތުން ވަނީ ހިކިފައިވާ ބޯގަސްތަކާއި ވައިގެ ތެތްކަން ދަށްވުމުގެ ސަބަބުން ބޮޑެތިި އަލިފާންގަނޑުތައް ރޯވެ ފެތުރޭނެ ކަމުގެ އިންޒާރު ދީފައެވެ. ލޮސް އެންޖެލެސްގެ އަލިފާންގަނޑުތަކަކީ ފަހުގެ ތާރީޚެއްގައި ހިނގި އެންމެ ބޮޑު އެއް ކާރިޘާއެވެ. އަލިފާންގަނޑުތައް ކޮންޓްރޯލް ކުރުމަށް އެއްގަމު މަގުންނާއި ވައިގެ މަގުން ވެސް ގިނަ މަސައްކަތްތަކެއް ދަނީ ކުރަމުންނެވެ. ނަމަވެސް މިހާތަނަށް ކޮށްފައިވާ އެއްވެސް މަސައްކަތެއް އަދި އެއްވެސް މިންވަރަކަށް ކާމިޔާބު ވެފައެއް ނުވެއެވެ.