ވަޢުދުތައް ފުއްދަވާނެކަން ރައީސް ގެންދަވަނީ ސާބިތުކޮށްދެއްވަމުން: މަޖިލިސް ރައީސް
-
ރައީސް ޑރ. މުޢިއްޒުއަކީ މީހުންނާ ގުޅޭ ބޭފުޅެއް
-
ރައީސަށް ފުރިހަމަ އިތުބާރު އެބައޮތް ކަމަށް ވިދާޅުވި
ވެވަޑައިގަންނަވާ ވައުދުތައް ފުއްދަވާނެކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންދަވަނީ ސާބިތުކޮށްދެއްވަމުންކަމަށް ރައްޔިތުންގެ މަޖިލިސް ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ. ޢަބްދުއްރަޙީމް މިހެން ވިދާޅުވީ ދިވެހިރާއްޖޭގެ އަޑަށް ދެއްވި ޚާއްސަ ބަސްދީގަތުމެއްގައެވެ.
ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަކީ ރާއްޖޭގައި މިހާތަނަށް ވެރިކަން ކުރެއްވި އެހެން ރައީސުންނާ ތަފާތު ބޭފުޅެއް ކަމަށެވެ. އެމަނިކުފާނަކީ އަޚްލާގު ރަނގަޅު، އެކުގައި މަސައްކަތް ކުރައްވާ ބޭފުޅުންގެ އަގުވަޒަންކުރައްވާ ބޭފުޅެއް ކަމަށާއި ޢިލްމީގޮތުން އަދި ސިޔާސީ ގޮތުންވެސް ތަޖުރިބާ ހުންނެވި ބޭފުޅެއް ކަމަށެވެ.
ރައީސް ޑރ. މުޢިއްޒުއަކީ މީހުންނާ ގުޅޭ ބޭފުޅެއްކަން ފާހަގަކުރައްވައި ޢަބްދުއްރަޙީމް ވިދާޅުވީ 2023ވަނަ އަހަރު ރިޔާސީ ކެންޑިޑޭޓަކަށް އެމަނިކުފާނުގެ ނަން ހުށަހެޅުއްވީވެސް ރާއްޖެ އޭރު އޮތް ހާލަތުން ރައްޔިތުން އެންމެ ބަލައިގަންނާނީ އެމަނިކުފާނުކަމަށް ފެނިވަޑައިގެންނެވުމުން ކަމަށެވެ. ރައީސް ޑރ. މުޢިއްޒު ހައުސިންގ މިނިސްޓަރުކަމާއި އަދި މާލޭގެ މޭޔަރުގެ މަގާމުގައި ހުންނަވައިގެން މަސައްކަތް ކުރެއްވިގޮތަށް ބަލާއިރުވެސް އެމަނިކުފާނު ވެވަޑައިގަންނަވާ ވައުދެއް ފުއްދަވާނެ ކަމުގެ ފުރިހަމަ ޔަގީންކަން އެބައޮތް ކަމަށް ޢަބްދުއްރަހީމް ވިދާޅުވިއެވެ.
"އަޅުގަނޑަށް ވަރަށް ކަމުދިޔަ ރައީސް މަސައްކަތް ކުރައްްވާ ގޮތް. މީހުންނާ އެބާއްވާ ގާތްކަން. މީހުންނަށް ކުރައްވާ އިތުބާރު. މި ހުރިހާ ކަމަކަށް ބަލާއިރު އަޅުގަނޑު ދަންނަވާނީ އެދުވަހެކޭ މިއަދެކޭ ތަފާތެއް ނެތޭ. ރައީސް ޑރ. މުޙައްމަދު މުޢިއްޒު ހައުސިން މިނިސްޓަރަކަށް ހުންނެވިއިރުވެސް އަދި މާލޭގެ މޭޔަރަކަށް ހުންނެވިއިރުވެސް އެމަނިކުފާނު މަސައްކަތް ކުރެއްވި ގޮތަށް ބަލާއިރު އަޅުގަނޑަށް ޔަގީންކަން އެބައޮތް އިރާދަކުރެއްވިއްޔާ ވެވަޑައިގެންނެވި ވައުދުތައް ފުއްދަވާނެކަން." ޢަބްދުއްރަހީމް ވިދާޅުވިއެވެ.
ޢަބްދުއްރަޙީމް ވިދާޅުވީ ރައީސުލްޖުމްހޫރިއްޔާ އާއި އެމަނިކުފާނާ ދެމެދު އޮތް ގުޅުން ހީނަރުކުރުމަށް ބައެއް ފަރާތްތަކުން މަސައްކަތް ކުރި ނަމަވެސް އެކަން ކާމިޔާބު ނުވާނެ ކަމަށެވެ. އަދި އެމަނިކުފާނަށް ފުރިހަމަ އިތުބާރު އެބައޮތް ކަމަށްވެސް ރައްޔިތުންގެ މަޖިލީހުގެ ރައީސް ޢަބްދުއްރަހީމް ޢަބްދުﷲ ވިދާޅުވިއެވެ.