ޓިބެޓަށް އައި ބާރުގަދަ ބިންހެލުމުގައި، ވެއްޓިފައިވާ އިމާރާތްތަކުގެ ދަށުން މީހުން ސަލާމަތް ކުރުމުގެ މަސައްކަތް ގަދަ ފިނީގައި ކުރަމުންދާއިރު، މިހާތަނަށް 400އަށްވުރެ ގިނަ މީހުން ސަލާމަތް ކުރެވިފައިވާ ކަމަށް ޗައިނާއިން ބުނެފިއެވެ.
ބިންހެލުން އައިސްފައި ވަނީ އުތުރުން ހިމާލަޔާ ސަރަޙައްދަށް ވަދެވެން އޮންނަ މަގާ ދިމާލުން ބިމުގެ 10 ކިލޯމީޓަރު އަޑިންނެވެ. އެއީ ދުނިޔޭގެ އެންމެ އުސް ފަރުބަދަ ކަމަށްވާ ހިމާލަޔާއާ 80 ކިލޯމީޓަރު ދުރު ސަރަޙައްދެކެވެ. ރިކްޓަރ މިންގަނޑުން 7.1ގެ ބާރުގަދަ ބިންހެލުމުގެ ލޮޅުމުގެ އަސަރު އިންޑިޔާއާއި ނޭޕާލާއި ބޫޓާނަށް ވެސް ކުރިއެވެ.
ފިނިމޫސުމުގައި އެ ސަރަޙައްދުގެ ފިނިހޫނުމިން ވަނީ މައިނަސް 18 ޑިގްރީ ސެލްސިއަސްއަށް ވެއްޓިފައެވެ. އެ ގަދަފިނީގައި ހިޔާވަހިކަމެއް ނެތި ފަސް ގަޑިއިރަށްވުރެ ގިނަ އިރުވެއްޖެނަމަ، ފުރާނައަށް ނުރައްކާވާނެ ކަމަށް މާހިރުން ދަނީ ބުނަމުންނެވެ.
ޗައިނާގެ ސީސީޓީވީން ބުނާ ގޮތުގައި، އެ ހާދިސާގައި މިހާތަނަށް 126 މީހަކު މަރުވެ، 188 މީހަކު ވަނީ ޒަޚަމްވެފައެވެ. މި ހާދިސާގައި ވީނުވީއެއް ނޭނގިގެން ރިޕޯޓުކޮށްފައިވަނީ ކިހާ ޢަދަދެއްގެ މީހުން ކަމެއް ޗައިނާ ސަރުކާރުން އަދި ނުބުނެއެވެ.
ނަމަވެސް، ޗައިނާގެ ދަޢުލަތުގެ މީޑިޔާއިން ބުނެފައިވާ ގޮތުގައި، ފުލުހުންނާއި ސިފައިން ހިމެނޭ ގޮތަށް މީހުން ސަލާމަތްކުރުމުގެ މަސައްކަތުގައި 3،400އެއްހާ މީހުން ދަނީ ޙަރަކާތްތެރިވަމުންނެވެ.
މި ހާދިސާގައި 3،600 އަށް ވުރެ ގިނަ ގެދޮރަށް ބޮޑެތި ގެއްލުންތައް ލިބިފައިވާ ކަމަށާއި، މިހާތަނަށް 30،000އަށްވުރެ ގިނަ މީހުން ވަގުތީ ހިޔާތަކަށް ބަދަލުކުރެވިފައިވާ ކަމަށް ވެސް ބުނެފައިވެއެވެ. ބިންހެލުމުގެ އަސަރު އެންމެ ބޮޑަށް ކޮށްފައިވާ ޓިބެޓުގެ ޓިންގްރީ ސަރަޙައްދުގައި 60،000އެއްހާ މީހުން ދިރިއުޅެއެވެ.