މަޝްރޫޢުތައް ކުރިއަށްގެންދިޔުމަށް ބޭނުންވާ ބޮޑުހިލަ ބަލްކުކޮށް ގެންނަން ރައީސް ނިންމަވައިފި

ހުއްޓިފައި ހުރި މަޝްރޫޢުތައް އަވަހަށް ކުރިއަށް ގެންދިޔުމަށް ހުރިހާ ރަށަކަށް ބޭނުންވާ ބޮޑު ހިލަ ބަލްކުކޮށް ރާއްޖެގެނައުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.

ރައީސުލްޖުމްހޫރިއްޔާ މިކަން ހާމަކުރެއްވީ ގދ.ރަތަފަންދޫއަށް ވަޑައިގެން އެރަށުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ރަށްރަށުގެ ބިންހިއްކުމާއި، ބަނދަރުހެދުމުގެ މަސައްކަތްތައް ހުއްޓިފައިވާ އެންމެ ބޮޑު އެއް ސަބަބަކީ، ބޮޑު ހިލަ ނުލިބުންކަމަށެވެ. އެެހެންކަމުން ހުއްޓިފައި ހުރި މަސައްކަތްތައް ކުރިއަށް ގެންދިޔުމަށްޓަކައި ބަލްކުކޮށް ބޮޑު ހިލަ ގެނައުމަށް ނިންމަވާފައިވާކަމަށް ރައީސް ވިދާޅުވިއެވެ. ބަލްކުކޮށް ބޮޑު ހިލަގެނައުމަށް ކުންފުނިތަކާއި މާލީ ވަޒީރާއި އިމާރާތް ކުރުމާ ބެހޭ ވަޒީރާއެކު މަޝްވަރާކުރައްވާފައިވާ ކަމަށް ރައީސް ވިދާޅުވިއެވެ.

"ބަނދަރުތަކާއި ރަށްގިރުމުގެ މައްސަލައާއި ބިންހިކުމާއި ތޮށިލުމާއި މިހެން ހުރި ކަންކަމަށް ބޭނުންވާ ހިލަ ނުލިބުމުން މަސައްކަތް ހުއްޓިފައި ހުރޭ. އެހެންކަމުން ބޮޑު ހިލަ ގެނައުމަށް އެކަން ކުރާނެ ގޮތްތަކެއް ވަނީ ރާވާފައި. ފައިސާވެސް ވަނީ ހަމަޖައްސާދީފައި." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރާއްޖޭގެ އެކި ސަރަހައްދުތަކުގައި ތަރައްޤީގެ ގިނަ މަޝްރޫޢުތަކެއް ފަށާފައިވާއިރު މީގެތެރޭގައި ބަނދަރު ހެދުމާއި ހިއްކި ސަރަޙައްދު ހިމާޔަތްކުރުމާއި ގޮނޑުދޮށް ހިމާޔަތް ކުރުމުގެ މަސައްކަތްތައް ހިމެނެއެވެ.
މީގެތެރެއިން ބައެއް މަޝްރޫޢުތައް ހުއްޓިފައިވަނީ ރާއްޖޭން ބޭރުން ގެންނަން ޖެހޭ ސާމާނު ލިބުން ލަސްވުމާއި ނުލިބުމުގެ ސަބަބުންނެވެ.