ގިނަ ޢަދަދެއްގެ މިޔަންމާގެ ރެފިއުޖީން ދަތުރުކުރި ދެ ބޯޓު މެލޭޝިޔާއިން ހޯދައި އަނބުރާ ފޮނުވާލައިފިއެވެ.
ހުކުރު ދުވަހު މެލޭޝިޔާގެ ރިސޯޓު ރަށެއް ކަމަށްވާ ލަންގްކާވީގެ ގޮނޑުދޮށަށް ގިނަ ޢަދަދެއްގެ މިޔަންމާގެ ރެފިއުޖީން ދަތުރުކުރި ބޯޓެއް ގާތްކުރުމުން އެ ޤައުމުން ވަނީ އެ ފަދަ އިތުރު ބޯޓުތައް ހޯދުމަށް މެލޭޝިޔާގެ ކަނޑުގެ ސަރަޙައްދު އިތުރަށް ބަލަން ފަށައިފައެވެ. 196 މީހުންނާއެކު ދަތުރުކުރި ބޯޓުގައި ތިބި މީހުން ދިން މަޢުލޫމާތުން އެ ސަރަޙައްދާ ދިމާއަށް އައުމަށް ދެ ބޯޓު މިސްރާބު ޖަހާފައިވާކަން މެލޭޝިޔާގެ ކޯސްޓުގާޑުގެ ސަމާލުކަމަށް އައެވެ.
ބޯޓުތައް ހޯދަން ކުރި މަސައްކަތުން ލަންގްކާވީއާ ހުޅަނގު ދެކުނުން ދެ ނޯޓިކަލް މޭލު ބޭރުން 300އެއްހާ ރެފިއުޖީން ގޮވައިގެން ދަތުރުކުރި ދެ ބޯޓު ވަނީ ފެނިފައެވެ. އެ މީހުން ތިބީ ކާބޯތަކެތި ނުލިބުމުގެ ސަބަބުން ވަރަށް ބޮޑަށް ވަރުބަލިވެ ޙާލު ދެރަވެފައި ކަމަށް މެލޭޝިޔާގެ ކޯސްޓުގާޑުން ވަނީ ބުނެފައެވެ. އެ މީހުންނަށް ބޭނުންވާ ކާނާއާއި ސާފު ބޯފެން ފޯރުކޮށްދީފައިވާ ކަމަށާއި އެއަށް ފަހު ބޯޓު ފުރުވާލާފައިވާ ކަމަށް ކޯސްޓުގާޑުން ބުނެފައި ވެއެވެ. މެލޭޝިޔާގެ ކޯސްޓުގާޑުގެ ޑިރެކްޓަރ ޖެނެރަލް ރޮސްލީ ޢަބްދުالله ވިދާޅުވީ ތައިލޭންޑުގެ އިދާރާތަކާ ގުޅިގެން ބޯޓުތަކުގެ މިސްރާބާ ގުޅޭ މަޢުލޫމާތު ހޯދުމަށް މަސައްކަތް ކުރަމުންދާ ކަމަށެވެ.
ފަހުން ފެނުނު ބޯޓުތަކުގައި ތިބީ މިޔަންމާގެ ކޮން ނަސްލެއްގެ ބައެއްކަން ސާފެއް ނުވެއެވެ. ނަމަވެސް ލަންގްކާވީގެ ގޮނޑުދޮށާ ގާތްކުރި ބޯޓުގައި ތިބީ ރޮހިންޔާ މުސްލިމުން ކަމަށް ބެލެވޭ ކަމަށް މެލޭޝިޔާގެ ފުލުހުން ވަނީ ކަށަވަރު ކޮށްދީފައެވެ.
ރޮހިންޔާ މީހުންނަކީ ބުދުދީން އޮންނަ މިޔަންމާގައި ދިރިއުޅޭ ބައިމަދު މުސްލިމު އާބާދީއެކެވެ. 2017ވަނަ އަހަރުގެ އޮގަސްޓު މަހުން ފެށިގެން މިޔަންމާގެ ސަރުކާރުން ދަނީ ރޮހިންޔާ މުސްލިމުން ނައްތައިލުމަށް މަސަައްކަތް ކުރަމުންނެވެ. އދން ވަނީ މިޔަންމާގައި ރޮހިންޔާ މުސްލިމުން ނައްތައިލަން ކުރާ މަސައްކަތަކީ ބައިމަދު އާބާދީއެއް ނަސްލުހޭދު ކުރުމަށް ކުރަމުންދާ މަސައްކަތެއްގެ ގޮތުގައި ސިފަ ކޮށްފައެވެ.
މެލޭޝިޔާއަކީ މިޔަންމާގެ ސަރުކާރުގެ ލާއިންސާނީ އަނިޔާތަކުން ސަލާމަތްވުމަށް ޤައުމު ދޫކޮށްދާ މީހުންނަކީ ރެފިއުޖީންގެ ގޮތުގައި ބަލައިގަންނަ ޤައުމެއް ނޫނެވެ. ރޮހިންޔާގެ މުސްލިމުން ޢާންމު ގޮތެއްގައި ހިޖުރަ ކުރަނީ އަވަށްޓެރި ބަންގްލަދޭޝަށެވެ. ނަމަވެސް މެލޭޝިޔާއަކީ ވެސް ގިނަ ބަޔަކު އެ ޤައުމަކަށް ހިޖުރަ ކުރަން ބޭނުންވާ ޤައުމެކެވެ.
ފާއިތުވި އަހަރުތަކުގައި ރޮހިންޔާގެ ރެފިއުޖީން ދަތުރުކުރާ ބޯޓުތައް މެލޭޝިޔާއިން ވަނީ އަނބުރާ ފޮނުވާލައިފައެވެ.
2010ވަނަ އަހަރާއި 2024ވަނަ އަހަރާ ދެމެދު މެލޭޝިޔާގެ އިދާރާތަކުން ވަނީ ޤާނޫނާ ޚިލާފަށް މެލޭޝިޔާގައި ދިރިއުޅޭ 2,089 ރޮހިންޔާ މުސްލިމުން ޙައްޔަރު ކޮށްފައެވެ.