"ގުޑުގުޑާ ދޫނިތަކުން ރަށަށް އުފާވެރިކަމާއި އިތުރު ދިރުމެއް ގެނެސްދޭ، ގޯނާ ނުކުރޭ"

ހދ. ކުޅުދުއްފުށީ ސިޓީގެ ކުޅިއަށް ޒިޔާރަތްކުރާ ގުޑުގުޑާ ދޫނިތަކަށް އުނދަގޫވާފަދަ އެއްވެސް ކަމެއްނުކުރުމަށް ކައުންސިލުން އިލްތިމާސްކޮށްފިއެވެ.

2021 ވަނަ އަހަރުން ފެށިގެން ކޮންމެ އަހަރެއްގެ އިރުވައި މޫސުމުގައި ކުޅުދުއްފުށި ކުޅިއަށް އަންނަ ގުޑުގުޑާ ދޫނިތަކުން ރަށަށް އުފާވެރިކަމާއި އިތުރު ދިރުމެއް ގެނެސްދެއެވެ. މި ޝައުގުވެރި މަންޒަރުތައް ބަލާލުމަށް ގިނަ ބަޔަކު އެ ސަރަހައްދަށް ޒިޔާރަތްކުރެއެވެ.

އެހެންނަމަވެސް ބައެއް ފަރާތްތަކުން ގުޑުގުޑާ ދޫނިތަކާއި މާ ކައިރިއަށް ދިއުމާއި، ދޫނިތަކަށް ގޯނާވާގޮތަށް ކުޅީގައި ކެނޯ ދުއްވާކަމުގެ ޝަކުވާ ރައްޔިތުންގެ ފަރާތުން ހުށަހަޅަމުން އަންނަ ކަމަށް ކުޅުދުއްފުށީ ކައުންސިލުން ވަނީ ވިދާޅުވެފައެވެ.

ކައުންސިލުން ވިދާޅުވީ ގުޑުގުޑާ ދޫނި ކުޅީގައި ތިބޭއިރު ކުޅީގައި ކެނޯ ދުއްވުމަކީ މަނާކަމެެއް ކަމަށެވެ. އަދި ޑްރޯން ދުއްވާ ފަރާތްތަކުންވެސް ދޫނިތަކަށް އުނދަގޫވާފަދަ އެއްވެސް އަމަލެއް ނުހިންގުމަށް އެ ކައުންސިލުން ވަނީ އިލްތިމާސްކޮށްފައެވެ.

މިފަދަ މޫސުމީ ދޫނި ރަށުގައި މަޑުކޮށްގެން ތިބުމަށް އެސޮރުމެންނަށް އަމާން ރައްކާތެރި މާހައުލެއް ހޯދައިދިނުމަކީ އެންމެންގެ ޒިންމާއެއްކަން ކުޅުދުއްފުށީ ކައުންސިލުން ވަނީ ހަނދާންކޮށްދީފައެވެ. މީގެއިތުރުން ކުޅީގައި ކެނޯ ދުއްވާނަމަ ދޫނިތަކަށް އުނދަގޫވާ ފަދަ އަމަލުތައް ރިޕޯޓުކުރުމަށް އެ ކައުންސިލުން ވަނީ އެދިފައެވެ.

ގުޑުގުޑާ ދޫންޏަކީ މޫސުމީ ހިޖުރަކުރާ ދޫންޏެކެވެ. އެހެން ނަމަވެސް ރާއްޖެއިން މިދޫނި ފެނި އެންމެ ބޮޑު ސަމާލުކަމެއް ލިބިގެން ދިޔައީ 2021 ވަނަ އަހަރުގައެވެ. 2021 ވަނަ އަހަރު ކުޅުދުއްފުށީ ކުޅިއަށް ގިނަ އަދަދެއްގެ ދޫނި އައިއިރު އޭގެ ތެރެއިން ބައެއް ދޫނި އަހަރެއްހާ ދުވަހު، ކުޅުދުއްފުށީ ކުޅީގައި ދިރިއުޅުނެވެ.

ހިތްގައިމު މި ދޫންޏަކީ އާއްމުކޮށް ރާއްޖެއިން ނުފެންނަ ދޫންޏަކަށް ނުވިނަމަވެސް މިއީ ވަކި މޫސުމެއްގައި އެކި ސަރަހައްދުތަކަށް ހިޖުރަކުރަމުން އަންނަ ދޫނިތަކެކެވެ. ބައިބައި ގަނޑަށް ދަތުރުކުރާ މިދޫނިތައް އާއްމުކޮށް ފެންނަނީ ފެން ހެދޭ ކުޅިތައް ހުންނަ ސަރަހައްދުތަކުންނެވެ.

ރާއްޖެއަށް ހިޖުރަކުރާ މި ފަދަ ދޫނިތަކަށް ގޯނާ ކުރުމަކީ މަނާކަމެކެވެ. ރާއްޖެއަށް ހިޖުރަކުރި ގުޑުގުޑާ ދޫންޏެއް ހިފާ އޭގެ ފިޔަ ކޮށާލުމަށްފަހު ވިއްކަން ޖެހި މައްސަލައެއް 2021 ވަނަ އަހަރު ފެންމަތިވެފައިވެއެވެ. ހިމާޔަތްކޮށްފައިވާ އެއްވެސް ޖަނަވާރަކަށް ގޯނާއެއްކޮށް ނުވަތަ އެއެއްޗެއްގެ ހާއްޔެއް ހަލާކުކޮށް އެފަދަ އަމަލެއް ހިނގައިފިނަމަ 30،000 ރުފިޔާއާއި 50،000 ރުފިޔާއާއި ދެމެދު ޖޫރިމަނާ ކުރާނެކަމަށް ޤާނޫނުގައިވެއެވެ.