ހެރީ މެގުއާގެ އެއްބަސްވުން ދިގު ދަންމާލަން ނިންމައިފި

މެންޗެސްޓާ ޔުނައިޓެޑުގެ ޑިފެންޑަރު ހެރީ މެގުއާގެ އެއްބަސްވުން ދިގު ދަންމާލަން އެ ކުލަބުން ނިންމައިފިއެވެ.

މި ގޮތަށް ނިންމީ މިހާރުގެ ކޯޗު ރުބެން އަމޮރިމް އެގޮތަށް ބޭނުންވުމުންނެވެ. ނަމަވެސް މެގުއާ އަކީ ޔުނައިޓެޑް އެންމެ ފަހުން ބަލިވި ތިން މެޗުގައިވެސް ފަހަތުގައި ކުޅުނު ޑިފެންޑަރެވެ. ސަޕޯޓަރުންގެ ފާޑުކިއުންތަކުގެ ސަބަބުން މިދިޔަ ސީޒަނުގައި ކެޕްޓަން ބޭންޑް އަތުލި ޑިފެންޑަރު، ކުލަބުގައި ބަހައްޓަން ނިންމާފައިވަނީ އިތުރު އެއް އަހަރަށެވެ.

ލެސްޓާ ސިޓީން 80 މިލިއަން ޕައުންޑަށް ޔުނައިޓެޑަށް 2019 ވަނަ އަހަރު ބަދަލުވި މެގުއާގެއެއްބަސްވުން ކުރިއަށް ޖޫން މަހު ހަމަވާނެއެވެ. ނަމަވެސް އެ އެއްބަސްވުމުގއިވާ އެއް މާއްދާ އަކީ ދެ ފަރާތުން ބޭނުންވެއްޖެނަަމަ އިތުރު އެއް އަހަރަށް އެއްބަސްވުމުގެ މުއްދަތު އިތުރު ކުރެވިދާނެ ކަމަށެވެ. އެ އެއްބަސްވުމުގައިވާ ގޮތުން މެގުއާއަށް ހަފުތާއަކު 190،000 ޕައުންޑް ލިބޭނެއެވެ.

"އަހަރުމެން ވަރަށް އުފަލާއެކު މި ނިންމީ އޭނާގެ ކޮންޓްރެކްޓް އިތުރު އަހަރަކަށް ކުރިއަށް ގެންދަން. ސަބަބަކީ ޓީމަށް ބޭނުންވޭ ލީޑަރޝިޕް. އަހަރުމެން އޭނާގެ ހިދުމަތް ބޭނުންވާއިރު އޭނާ ވެސް އެބަޖެހޭ ލީޑަރެއްގެ ގޮތުގައި އިތުރަށް ކުރިއަރަން،" ކޯޗު އަމޮރިމް ބުންޏެވެ.

މެގުއާގެ އިތުރުން އަމަދު ޑިއާލޯގެ އެއްބަސްވުން އާކުރުމަށްވެސް ވަނީ ނިންމާފައެވެ. ޑިއާލޯ މިހާރު ހަދާފައިވާ އެއްބަސްވުން އަންނަ ޖޫން މަހަށް ހަމަވާނެއެވެ.

ޔުނައިޓެޑް މި ވަގުތު އޮތީ 22 ޕޮއިންޓާއެކު ތާވަލުގެ 14 ވަނައިގައެވެ. ކުރިއަށް އޮތީ އަންނަ އާދީއްތަ ދުވަހު ތާވަލުގެ އެއްވަނައިގައި އޮތް ވާދަވެރި ލިވަޕޫލާ ދެކޮޅަށް ކުޅޭ މެޗެވެ. ލިވަަޕޫލަށް ވަނީ މިހާތަނަށް 45 ޕޮއިންޓް ލިބިފައެވެ.