ވިއްސާރަވެ ފެންބޮޑުވުމާއި ގުޅިގެން އާންމު ސާފުތާހިރުކަމަށް ސަމާލުކަންދޭންވީ ކަންކަމަކީ ކޮބާ؟

މިދުވަސްވަރު ރާއްޖޭގެ އެކި ސަރަހައްދުތަކަށް ވިއްސާރަވެ ފެންބޮޑުވުމާއި ގުޅިގެން އާންމު ސާފުތާހިރުކަމަށް ސަމާލުކަން ދެއްވުމަށް ހެލްތް ޕްރޮޓެކްޝަން އެޖެންސީ، އެޗްޕީއޭއިން އިލްތިމާސްކުރައްވައިފިއެވެ.

މުޅި ރާއްޖެއަށްވެސް މި ދުވަސްވަރު ވަނީ ވަރަށް ބޮޑަށް މޫސުން ގޯސްވެފައެވެ.

އެޗްޕީއޭއިން ވިދާޅުވީ، ވިއްސާރަވެ ފެންބޮޑުވުމާއި ގުޅިގެން ބުއިމަށާއި ކެއްކުމަށް އަދި ތަށިދޮވުމަށް ވާރޭފެން، ފުޅީގައި ބަންދުކުރިފެން ނުވަތަ ކެއްކިފެން ބޭނުންކުރުމަކީ އެންމެ ރައްކާތެރިގޮތްކަމަށެވެ. އަދި ނަރުދަމާ، ސެޕްޓިކްޓޭންކް ނުވަތަ ޖަންކްޝަން ފުރިގެން ފެން ނުކުންނަނަމަ ފެންވެރުމަށް ވަޅުފެން ބޭނުންކުރުމުގެ ކުރިން ކުލޮރިން ކުރުމަކީ މުހިންމު ކަމެކެވެ.

ފެންގަނޑުގެ ތެރެއަށް ކުޑަކުދިން އެރުނަ ނުދިނުމާއި، ސައިބޯނިލައިގެން ސާފުފެނުން ގިނަގިނައިން އަތް ދޮވުމަކީ މުހިންމު ކަމެއްކަމަށް އެޗްޕީއޭއިން ފާހަގަކުރައްވައެވެ. ކާބޯތަކެތި ތައްޔާރުކުރުމުގެ ކުރިން ކެއުމުގެ ކުރިން އަދި ފާހަނާ ކުރުމުގެ ފަހުން ސައިބޯނި ލައިގެން ގިނަގިނައިން އަތް ދޮވުމަށް ވަނީ އެޗްޕީއޭއިން އިލްތިމާސްކުރައްވާފައެވެ.

އެއްވެސް ބޭހެއް ބޭނުންކުރާ ފަރާތެއްނަމަ ފެނުގެ އަސަރު ނުކުރާނެ، ރައްކާތެރި ހިސާބެއްގައި ބޭސް ރައްކާކުރުމަށް އެ އެޖެންސީން އިލްތިމާސްކުރައްވައެވެ. އަދި އިންސިއުލިން ފަދަ ވަކި ފިނިހޫނުމިނެއްގައި ބަހައްޓަންޖެހޭ ތަކެތި ގޭތެރޭގައި ފެން ބޮޑުވުމުގެ ސަބަބުން ކަރަންޓް ކަނޑާލަން ޖެހިއްޖެ ހާލަތެއްގައި އެފަދަ ބޭސް އެހެން ފްރިޖެއްގައި ބެހެއްޓޭނެ އިންތިޒާމް ހަމަޖެއްސުމަށް އެޗްޕީއޭއިން ވަނީ އިލްތިމާސްކުރައްވާފައެވެ.