ރަށްރަށުގެ ހާލަތު ގާތުން ބަލާ އެހީތެރިކަން ދަނީ ފޯރުކޮށްދެމުން: ވަޒީރު އާދަމް ޝަރީފް
-
ބައެއް ރަށްރަށައް ފެންބޮޑުވުމާއި އުދައިގެ އަސަރުދަނީ ކުރަމުން
-
ގޭބީސީތަކަށް އެކިވަރުގެ ގެއްލުތައް ލިބިގެން ރިޕޯޓުތައް ދަނީ ލިބެމުން
މޫސުން ގޯސްވުމުގެ ސަބަބުން ރަށްރަށަށް ލިބެމުންދާ ގެއްލުންތައް ގާތުން ބަލަ ދޭންޖެހޭ އެހީތެރިކަން ފޯރުކޮށްދެމުންދާކަމަށް ސިޓީތަކާ އިދާރީ ދާއިރާތައް ހިންގުމާއި އާއްމު މަސައްކަތްތަކާބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.
ވަޒީރު ވިދާޅުވީ ރަށްރަށަށް ލިބެމުންދާ ގެއްލުންތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވެސް ވަރަށް ގާތުން ބައްލަވަމުންދާކަމަށާއި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އެޅުމަށްކަމާ ގުޅުންހުރި އިދާރާތަކަށް އިރުޝާދުދެމުންދާކަމަށެވެ.
ވަޒީރު ވިދާޅުވީ ސަރުކާރުގެ ކަމާ ގުޅުންހުރި މުވައްސަސާތަކުން، ރަށްރަށުގެ ޙާލަތު ބަލާ، އެ އިދާރާތަކުން ފޯރުކޮށްދެންޖެހޭ އެހީ ފޯރުކޮށްދެމުންދާކަމަށެވެ. އެގޮތުން ރަށްރަށަށް ދިމާވަމުންދާ މައްސަލަތައް ޙިއްސާކުރެވޭނެ ފަސޭހަ ގޮތްތައް ހަމަޖައްސާ ބޭނުންވާ އެހީތައް ދެނެގަނެ، ވަގުތީގޮތުން މައްސަލަ ޙައްލުކުރަން ބޭނުންވާ އެހީވެސް ފޯރުކޮށްދެމުންދާކަމަށް ވަޒީރު އާދަމް ޝަރީފް ވިދާޅުވިއެވެ.
ވަޒީރު ވިދާޅުވީ އުދައިގެ އަސަރުކޮށްގެން ށ.ނަރުދޫ، ވ.އަތޮޅު، އއ.އަތޮޅު އަދި އދ.އަތޮޅުގެ ރަށްތަކުންވެސް ރިޕޯޓްކޮށްފައިވާކަމަށެވެ. އަދި މިހާރު ކުރަމުންދާ ވިއްސާރައިގައި ފ.ނިލަންދޫއާއި ކ.ގުރައިދުއަށް ބޮޑެތި ގެލުންތަކެއްވެފައިވާކަމަށެވެ.
ވަޒީރު ވިދާޅުވީ މި ދެ ރަށުގައިވެސް ފެންބޮޑުވުމުގެ ސަބަބުން ޖަންކްޝަންތަކުން ނަޖިސް ބޭރުވަމުން ދިއުމާ ގުޅިގެން އެ މައްސަލަ ރިޕޯޓްކޮށްފައިވާތީ އެކަން ބަލަމުންދާކަމަށެވެ. އަދި އެމްއެންޑީއެފުން ޕަމްޕް ބަހައްޓައިގެން ބައެއް ރަށްރަށުން ފެން ހިންދަމުން ދާކަމަށާއި އިތުރަށް އެހީތެރިކަން ދޭންޖެހޭ ޙަލަތަށްވެސް ކަމާ ގުޅުންހުރި އިދާރާތަކުން ތައްޔާރަށް ތިބިކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ ގިނަ ރަށްތަކުގައި ފެން ބޮޑުވާން ދިމަވި އެއް ސަބަބަކީ ބިންހިއްކުންފަދަ މަޝްރޫޢުތަކާއި އެކު، ހުސްބިންތަކަށް ޖަމާވާ ފެން ރަށުތެރެއަށް ފައިބައިގެން ދާކޮތަށް ހުރުމުން ކަމަށެވެ. އެހެންކަމުން ކުރިމަގުގައި ރަށްރަށުގެ މަޝްރޫޢުތައް ހިންގުމުގައި މިފަދަ ޓެކްނިކަލް ކަންކަމަށްވެސް ސަރުކާރުން ރިޢާޔަތްކުރާނެކަމަށް ވަޒީރު ވިދާޅުވިއެވެ.