ފ.ނިލަންދޫ %85 ގެއަށް ފެން ވަދެ ގެއްލުންތަކެއް
-
2 ފޫޓަށް ފެން ބޮޑުވި
-
ފެން ހިންދުމުގެ މަސައްކަތް ދަނީ ކުރިއަށް
މިހާރު ކުރަމުންދާ ވިއްސާރައިގައި ފ.ނިލަންދުއަށް ބޮޑެތި ގެއްލުންތަކެއްވެއްޖެއެވެ.
ރަށު ކައުންސިލްގެ ރައީސް އަލީ އަޙުމަދު ޕީއެސްއެމްއަށް ވިދާޅުވީ ރަށުގެ %85 ގެއަށް ފެންވަދެ އެކި ވަރުގެ ގެއްލުންތައް ލިބިފައިވާކަމަށެވެ.
މޫސުން ގޯސްވެ މިއަދު ހެނދުނު 06:00 އިން ފެށިގެން މެންދުރު 01:00 އާއި ހަމައަށް އެރަށަށް ވަނީ ބޯކޮށް ވާރޭވެހިފައެވެ. ކައުންސިލްގެ ރައީސް ވިދާޅުވީ ބައެއް ހިސާބުތަކުގައި 2 ފޫޓާ ހަމައަށް ފެން ބޮޑުވިކަމަށެވެ.
ފެންބޮޑުވުމާއި ގުޅިގެން މީހުން ދިރިއުޅޭ ގެތަކަށް ބޮޑެތި ގެންލުންތަކެއްވެފައިވާއިރު، ފިހާރަތަކާ ވިޔަފާރިތަކަށްވެސް ބޮޑެތި ގެއްލުންވެފައިވާކަމަށް އަލީ އަހުމަދު ވިދާޅުވިއެވެ. ގޭގޭގެ ފަރުނީޗަރާއި އިލެކްޓްރޯނިކް ސާމާނާއި ހިފާ ގެންގުޅޭ ތަކެއްޗަށް އަދި ވިޔަފާރިކުރާ ތަންތަނުގެ މުދަލަށްވެސް ވަނީ ގެއްލުންވެފައެވެ.
ކައުންސިލްގެ ރައީސް ވިދާޅުވީ ބޯކޮށް ވާރޭވެހުމުގެ ސަބަބުން ބައެއް ހިސާބުތަކުން ކަރަންޓުވެސް ގޮސްފައިވާކަމަށެެވެ. އެ ސަރަހައްދުތަކަށް ކަރަންޓު ދިނުމުގެ މަސައްކަތްތައް ދަނީ ކުރަމުންނެވެ.
ރަށުގައި ފެން ހިންދުމުގެ މަސައްކަތް އަދިވެސް ދަނީ ކުރަމުންނެވެ. އެގޮތުން އެމްއެންޑީއެފްގެ އެހީގައި ޕަމްޕް ބަހައްޓައިގެންނާ އަދި އައްމުން ނިކުމެ ފެން ހިންދުމުގެ މަސައްކަތް ދަނީ ކުރަމުންނެވެ.