ވިއްސާރައިގައި އެއްވެސް ރަށަކުން ބޯހިޔާވަހިކަމަށް އެދި މިހާތަނަށް ރިޕޯޓެއް ލިބިފައެއްނުވޭ: އެންޑީއެމްއޭ
-
އުދައެރުމާއި ފެންބޮޑުވެގެން މިހާތަނަށް 6 ރަށަކުން ރިޕޯޓްކޮށްފައިވޭ
-
ފެން ހިއްކުމުގެ މަސައްކަތުގައި ސިފައިން ދަނީ ހަރަކާތްތެރިވަމުން
-
ކުރިއަށްއޮތް 24 ގަޑިއިރުވެސް ބޮޑު ބަޔަކަށް މޫސުން ގޯސްވާނެކަމަށް ބެލެވޭ
ރާއްޖެއަށް މިހާރު ކުރަމުންދާ ވިއްސާރައިގައި އެއްވެސް ރަށަކުން ބޯހިޔާވަހިކަމަށް އެދި މިހާތަނަށް ރިޕޯޓުކޮށްފައިނުވާކަމަށް ނެޝެނަލް ޑިޒާސްޓަރ މެނޭޖްމަންޓް އޮތޯރިޓީ، އެން.ޑީ.އެމް.އޭއިން ވިދާޅުވެއްޖެއެވެ.
ރެއިން ފެށިގެން ރާއްޖޭގެ އެކި ހިސާބުތަކަށް ކުރަމުންދާ ވިއްސާރައިގައި އުދައެރުމާއި، ފެންބޮޑުވެ، ބައެއް ރަށްތަކަށް ވަނީ ގެއްލުން ލިބިފައެވެ.
އެންޑީއެމްއޭއިން ވިދާޅުވީ، ބޯކޮށް ވާރޭ ވެހުމާއި އުދަ އެރުމުގެ ސަބަބުން މިހާތަނަށް 6 ރަށެއްގައި ފެންބޮޑުވެގެން ރިޕޯޓްކޮށްފައިވާކަމަށެވެ. މީގެ ތެރެއިން އުދައަރައިގެން ރިޕޯޓްކޮށްފައިވަނީ ށ. ނަރުދޫ އަދި ރ. އިނގުރައިދޫއިންނެވެ. އަދި ވާރޭ ވެހި ފެންބޮޑުވެގެން ދ. ކުޑަހުވަދޫ، ދ. މީދޫ، ފ. ނިލަންދޫ އަދި ފ. މަގޫދޫއިން ވަނީ ރިޕޯޓްކޮށްފައެވެ.
މީގެ ތެރެއިން ބައެއް ރަށްރަށުގައި ފެން ހިއްކުމުގެ މަސައްކަތުގައި ސިފައިން އަންނަނީ ހަރަކާތްތެރިވަމުންނެވެ. އެންޑީއެމްއޭއިން ވިދާޅުވީ، މިހާރު މި ކުރާ ވިއްސާރައިގައި މިހާތަނަށް ބޯހިޔާވަހިކަމަށް އެދި ނުވަތަ އިންސާނީ އެހީތެރިކަން ފޯރުކޮށްދޭން ޖެހިގެން ރިޕޯޓްކޮށްފައި ނުވާކަމަށެވެ.
ރާއްޖޭއަށް މިހާރު ކުރަމުންދާ ވިއްސާރައިގައި ފެންބޮޑުވެގެން ލިބިދާނޭ ގެއްލުން ކުޑަކުރުމަށް ދުރާލާ ފިޔަވަޅު އެޅުމަށް އެންޑީއެމްއޭއިން ވަނީ އިލްތިމާސްކުރައްވާފައެވެ.
އެގޮތުން ގޭތެރޭގައި ފެންބޮޑުވެއްޖެ ހާލަތެއްގައި ގެއްލުންވެދާނެ ފަދަ މުދަލާއި އެހެނިގެން ތަކެތި ފެނުގެ އަސަރު ނުފޯރާނެ ފަދަ ތަނަކަށް ބަދަލުކުރުމަށާއި، އަދި އިލެކްޓްރޯނިކް ސާމާނު ބޭނުން ނުކުރާނަމަ ނިންވާލުމަށްވެސް އެ އޮތޯރިޓީން ވަނީ އިލްތިމާސްކުރައްވާފައެވެ. މީގެއިތުރުން އުދަ އަރާފާނެކަމަށް ލަފާކޮށް ދުރާލާ ތައްތާރުވުމަށްވެސް ވަނީ އިލްތިމާސްކުރައްވާފައެވެ.