ސައުދީ އަރަބިއާގައި ކުޅެމުންދާ އިޓާލިއަން ސުޕަ ކަޕުގެ ސެމީ ފައިނަލުގައި މިރޭ ޔުވެންޓަސްއަށް އޭސީ މިލާން ބަލިކުރަން އުނދަގޫވާނެ ކަމަށް އެ ޓީމުގެ ކޯޗު ތިއާގޯ މޮޓާ ބުނެފިއެވެ.
މެޗުގެ ކުރިން ވާހަކަ ދައްކަމުން މޮޓާ ބުނީ ހުސްފި ހަފުތާގައި މިލާނުގެ ކޯޗު ބަދަލުވި ނަމަވެސް އެއީ ބަލިކުރަން އުނދަގޫ ޓީމެއް ކަމަށެވެ. ސަބަބަކީ އެއީ މޮޅު ކުޅުންތެރިން ގިނަ ޓީމަކަށްވުން ކަމަށެވެ.
"ކޯޗަކީ ވެސް މޮޅު ކޯޗެއް. އޭނާ ވަނީ ޕޯޓޯގައި ވެސް ރަނގަޅު ނަތީޖާތަކެއް ހޯދާފައި. އަދި މިލާނަކީ މޮޅު ކުޅުންތެރިން ގިނަ ޓީމެއް. މިހެންވީމަ އެމީހުން ބަލިކުރަން އަހަރުމެން 200 ޕަސެންޓް ނެރެންވާނެ،ތިއާގޯ މޮޓާ - ޔުވެންޓަސްގެ ކޯޗު
މޮޓާ ބުނީ ލީގާއި ކަޕުގައި ވަރަށް ބޮޑު ތަފާތެއް އެބަހުރި ކަމަށެވެ. ލީގުގައި ޓީމު ބަލިވި ނަމަވެސް ކުރިއަށްދާން ފުރުސަތު ލިބޭ ކަމަށާއި ނަމަވެސް މި މެޗުން ބަލިވެއްޖެނަމަ މި މުބާރާތް ނިމުނީ ކަމަށެވެ.
"އަހަރުމެންނަށް މި މެޗުން ބަލިވެގެން މި މުބާރާތުގައި ދެން ނުކުޅެވޭނެ. އެހެންވީމާ މިއީ ކޮންމެހެން ވެސް މޮޅުވާން ޖެހޭ މެޗެއް. މި މުބާރާތަކީ ޔުވެންޓަސް އަށް ވެސް ވަރަށް މުހިންމު މުބާރާތެއް. އެތައް ފަހަރަކު އަހަރުމެން ކާމިޔާބުކޮށްފައިވާ މުބާރާތެއް.ތިއާގޯ މޮޓާ - ޔުވެންޓަސްގެ ކޯޗު
މިލާނުގެ ކޯޗުކަމާ މިދިޔަ ހަފުތާގައި ހަވާލުވީ ސާޖިއޯ ކޮންސެއިސާއޯ އެވެ. އޭނާ ބުނީ ކުޅުންތެރިންގެ ފަރާތުން ފުރަތަމަ ވެސް ފެނުނީ ވަރަށް އުއްމީދީ މަންޒަރެއް ކަމަށާއި މެޗަށް މުޅި ޓީމު އޮތީ ތައްޔާރަށް ކަމަށެވެ. ނަމަވެސް ފޯވަޑް ރަފައެލް ލިއާއޯ އަށް މި މެޗުގައި ނުކުޅެވޭނެ އެވެ. އޭނާ އަށް ވަނީ އަނިޔާވެފަ އެވެ.
ޔުވެންޓަސް ވެސް މި މުބާރާތާ ކުރިމަތިލީ ކެޕްޓަން ޑެނީލޯ ނުލަ އެވެ. އެއީ މިހާރު ހުޅުވިފައިވާ ޓްރާންސްފާ މާކެޓުގައި އެހެން ކުލަބަކަސް ބަދަލުވާތީ އެވެ.
މި މެޗު ފަށާނީ މާލޭ ގަޑިން 12 ޖަހާއިރު އެވެ. މޮޅުވާ ޓީމެއް ބައްދަލުކުރާނީ އެންމެ ފަހުގެ ޗެމްޕިއަން އިންޓަމިލާނާ އެވެ. އެ ޓީމު ފައިނަލަށް ދިޔައީ ރޭ އެޓްލާންޓާ ބަލިކޮށްފަ އެވެ.