ހޭލުންތެރިކުރުމުގެ ޕްރޮގްރާމްތަކާއެކު، ގަވާއިދާ ޚިލާފަށް ދުއްވާ އުޅަނދުތައް މަދުވެއްޖެ: ފުލުހުން

ފުލުހުން ހިންގަމުންދާ ހޭލުންތެރިކުރުމުގެ ޕްރޮގްރަމްތަކާއި އޮޕަރޭޝަންތަކުގެ ސަބަބުން ގަވާއިދާ ޚިލާފަށް ދުއްވާ އުޅަނދުތައް މަދުވެފައިވާކަން ފާހަގަވެފައިވާކަމަށް ފުލުހުންގެ ޚިދުމަތުން ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި އާއްމުން ހޭލުންތެރިކުރުމަށް ފުލުހުން ކުރަމުންދާ މަސައްކަތްތަކާއި ގުޅޭގޮތުން މަޢުލޫމާތު ޙިއްސާކުރައްވަމުން އިންސްޕެކްޓަރ އޮޕް ޕޮލިސް އިބްރާޙިމް ޚަލީލް ވިދާޅުވީ އާ އަހަރާ ދިމާކޮށް ފުލުހުންގެ ޚާއްސަ އޮޕްރޭޝަންތަކެއް ފަށާފައިވާކަމަށެވެ.

ޚާއްސަކޮށް މާލެއާއި ހުޅުމާލޭގައި ފާއިތުވި ހަފްތާއެއްހާ ދުވަހު ކުރިއަށްގެންދިޔަ އޮޕަރޭޝަންތަކުގައި ހަމައެކަނި ހުޅުމާލެގައިވެސް ދުވާލަކު ހާހެއްހާ އުޅަނދު ހިފަހައްޓާ ބަލާ ފާސްކޮށްފައިވާކަމަށް އިބްރާޙިމް ޚަލީލް ވިދަޅުވިއެވެ. މި އޮޕަރޭޝަންތަކުގައި ޓްރެފިކް ގަވާއިދުތަކާއި އަދި އުޅަނދުތައް ގަވާއިދާ އެއްގޮތަށް ގެންގުޅުމަށް ދޭންޖެހޭ ސަމާލުކަން ވަރަށް ބޮޑަށް އިތުރުވެފައިވާކަން ފާހަގަކުރެވިފައިވާކަމަށް ޚަލީލު ވިދާޅުވިއެވެ.

ލައިސަންސް ނެތި އުޅަނދު ދުއްވާ މިންވަރު މަދުވެފައިވާއިރު، ދުއްވާ އުޅަނދުތަކަށް ނަގަންޖެހޭ ހުއްދަތައް ހަމަކުރުމަށްވެސް ދޭންވާ ސަމާލުކަން އާއްމު ރައްޔިތުން އިތުރުކޮށްފައިވާކަމަށްވެސް ޚަލީލު ވިދާޅުވިއެވެ.

"ޑިސެންބަރު 24 އިން ފެށިގެން ހިންގި އޮޕަރޭޝަންތަކުގައި ހުޅުމާލެއިން އެކަނި 1000އާ ގާތަށް ކޮންމެ ދުވަހަކު އުޅަނދު ހުއްޓުވާ ބަލަ ފާސްކުރަން. ވިއްސަކަށް އުޅަނދުވެސް ނުފެނޭ ގަވައިދާ ޚިލާފަށް ދުއްވާ. އެކަން ލައިސަންސް، އަހަރީ ފީ އަދި ރޯޑް ވާދިނަސްއަށް ބެލިއަސް ފާހަގަވޭ. އާއްމުން ރައްކާތެރިކަމަށް ދޭ ސަމާލުކަން އިތުރުވެފައިވާތަން ފެންނަނީ." އިންސްޕެކްޓަރ އޮފް ޕޮލިސް އުބްރާޙިމް ޚަލީލް ވިދާޅުވިއެވެ.

ފުލުހުންގެ ރައްކާ ކެމްޕެއިންއާއި އިތުރު އެހެން އޮޕަރޭޝަންތަކުގެ ތެރެއިން، މަގުމަތީގެ ސަލާމަތާ ރައްކާތެރިކަމަށް އާއްމުން ހޭލުންތެރިކުރުމަށް ގިނަ ޕްރޮގްރާމްތަކެއް ދަނީ ހިންގަމުންނެވެ.

އެގޮތުން ކަމާގުޅުންހުރި މުއައްސަސާތައް ގުޅިގެން، އުޅަނދުތައް ރެޖިސްޓްރީކޮށް ދުއްވާ ޒޯންތައް ކަށަވަރުކުރުމަށް ކުރާ މަސައްކަތްތަކާއި އަދި މަގުތައް ޕެޓްރޯލްކުރުމުގައި ފުލުހުންގެ ހަރަކާތްތެރިކަން މަގުމަތީގައި ވަނީ އިތުރުކޮށްފައެވެ. މީގެތެރޭގައި ނެއިބަހުޑް ޕޮލިހުން، ރައްޔިތުންގެ ގާތަށް ގޮސް ހޭލުންތެރިކަން އިތުރުކުރުމަށް ހިންގާ ޕްރޮގްރާމްތައްވެސް ވަނީ އިތުރުކޮށްފައެވެ.

އިންސްޕެކްޓަރ އޮފް ޕޮލިސް އިބްރަޙިމް ޚަލީލް ވިދާޅުވީ އާއްމުންގެ ހޭލުންތެރިކަން އިތުރުކުރުމާއި ފުލުހުންގެ ހަރަކާތްތެރިކަން މަގުތަކުގައި އިތުރުކުރުމަށް ކުރަމުންދާ މަސައްކަތްތަކުގެ ހެޔޮ ނަތީޖާ ފެންނަމުންދާކަމަށެވެ.