ދެކުނު ކޮރެޔާގެ ބޯޓު ވެއްޓުނު ހާދިސާ: އެއަރޕޯޓު ހިންގާ ކުންފުންޏާއި އެއަރލައިން އޮފީހަށް ފުލުހުން ވަދެއްޖެ

ދެކުނު ކޮރެޔާގައި މަތިންދާބޯޓެއް ވެއްޓި ހިނގި ޙާދިޘާއާ ގުޅިގެން، ޖޭޖޫ އެއަރގެ މައި އޮފީހާއި މުއާން އިންޓަރނޭޝަނަލް އެއަރޕޯޓު ހިންގާ ކުންފުންޏަށް ފުލުހުން ވަދެ، ބަލައި ފާސްކޮށްފިއެވެ.

ދެކުނު ކޮރެޔާގެ ޖޭޖޫ އެއަރގެ މަތިންދާބޯޓުގައި ބޮޑު ހުޅުގަނޑެއް ރޯވެ، ބޮޑު ގޮވުމެއް ގޮވާފައި ވަނީ މުއާން ބައިނަލްއަޤުވާމީ ވައިގެ ބަނދަރުގައި ޖެއްސުމަށް މަސައްކަތް ކުރަމުން ދަނިކޮށެވެ.

ވެއްޓިފައިވާ ޖޭޖޫ އެއަރގެ މަތިންދާބޯޓަކީ ތައިލެންޑުގެ ބެންކޮކުން ފުރައިގެން ދެކުނު ކޮރެޔާގެ ދެކުނުގައި އޮތް މުއާނަށް ދަތުރު ކުރަމުން ދިޔަ މަތިންދާބޯޓެކެވެ. އޭގައި 175 ފަސިންޖަރުންނާއި ހަ ފަޅުވެރިން ތިއްބެވެ. އޭގެތެރެއިން ދެ ފަޅުވެރިން ފިޔަވައި، ބާކީތިބި އެންމެން ވަނީ މަރުވެފައެވެ. ސަލާމަތް ކުރެވުނު ދެ ފަޅުވެރިންގެ ތެރެއިން އެކެއްގެ ހާލު އަދިވެސް ވަރަށް ސީރިއަސް ކަމަށް ދެކުނު ކޮރެޔާގެ ޓްރާންސްޕޯޓް މިނިސްޓްރީން ބުންޏެވެ.

އެ ބޯޓުގެ ކަޅުފޮށިތައް ނަގައި، ޕައިލެޓުން ތިބޭ ކޮކްޕިޓުގެ އޯޑިއޯ ރެކޯޑިންގތައް ނެގުމުގެ މަސައްކަތް މިހާރު ނިމިފައިވާ ކަމަށް، ޑެޕިޔުޓީ ޓްރާންސްޕޯޓް މިނިސްޓަރު ޖޫ ޖޮންގް-ވާން ވިދާޅުވިއެވެ.

ފުލުހުން ނެރުނު މީޑިއާ ބަޔާނެއްގައި ބުނެފައިވަނީ، ފުލުހުންގެ ތަހުޤީޤީ ޓީމުން ދަނީ މުއާންގައި ހުންނަ އެއާޕޯޓް ހިންގާ ކުންފުންޏާއި، އޮޕަރޭޓަރާއި ޓްރާންސްޕޯޓޭޝަން މިނިސްޓްރީގެ އޭވިއޭޝަން އޮތޯރިޓީގެ އޮފީސްތަކުގެ އިތުރުން ސޯލްގައި ހުންނަ ޖެޖޫ އެއަރގެ އޮފީސް ބަލައި ފާސްކުރަމުން ކަމަށެވެ.

ފުލުހުން މަސައްކަތް ކުރަމުންދަނީ ވެއްޓުނު ބޯޓު ދުއްވުމާއި މަރާމަތުކުރުމާ ގުޅޭ ހުރިހާ ލިޔެކިޔުންތަކެއް ހޯދަން ކަމަށް، ފުލުހުންގެ އޮފިޝަލަކު ރޮއިޓަރސް ނޫހަށް ވިދާޅުވިއެވެ.

އަދި ޖެޖޫ އެއަރގެ ޗީފް އެގްޒެކެޓިވް ކިމް އީ-ބަޔި އާއި އިތުރު އިސް ވެރިއެއްގެ ފުރުން މަނާކޮށް، ޕާސްޕޯޓު ހިފަހައްޓާފައި ކަމަށް ވެސް އެ އޮފިޝަލު ވިދާޅުވިއެވެ. އެ ފިޔަވަޅު އަޅާފައިވަނީ، މި ޙާދިޘާގައި އެއްވެސް އިހުމާލެއް އޮތް ނަމަ، އެކަމުގެ މަޢުލޫމާތު އެ ދެ އޮފިޝަލުންނަށް އެނގޭނެކަމަށް ފުލުހުންނަށް ޤަބޫލުކުރެވޭތީ ކަމަށް ވެސް އޭނާ ވިދާޅުވެފައިވެއެވެ.

ނަމަވެސް، ފުލުހުންގެ ތަހުޤީޤަށް ފުރިހަމައަށް އެއްބާރުލުންދެމުންދާ ކަމަށް ޖޭޖޫ އެއަރގެ އިސް އޮފިޝަލަކު ވަނީ ނޫސްވެރިންނަށް ވިދާޅުވެފައެވެ.

މިއީ، ދެކުނު ކޮރެޔާގެ ތާރީޚުގައި ވެސް ހިނގާފައިވާ އެންމެ ނުރައްކާތެރި ވައިގެ ޙާދިޘާއެވެ. އަދި، ފާއިތުވި ތިން ދަހަރެއްހާ ދުވަހުގެ ތެރޭގައި އެ ޤައުމުގެ އެއަރލައިނަކަށް ކުރިމަތިވި އެންމެ ނުރައްކާތެރި ޙާދިޘާއެވެ.

މި ޙާދިޘާ ހިނގަން މެދުވެރިވީ އުދުހެމުން ދިޔަ ދޫނިތަކެއް މަތިންދާބޯޓުގައި ޖެހި، ބޯޓުގެ ލޭންޑިންގ ގިޔަރއަށް މައްސަލަތަކެއް ކުރިމަތިވެގެން ކަމަށް ބެލެވުނަސް، ރަންވޭއާ މާ ކައިރީގައި ބޯޓު ކަހާލައިގެން ގޮސް ޖެހުނު ކޮންކްރީޓުން ހަދާފައި ހުރި ފާރާމެދު ވެސް ބައެއް މާހިރުން ދަނީ ސުވާލު އުފައްދަމުންނެވެ.

ޖޭޖޫ އެއަރއަކީ 2005ވަނަ އަހަރު އުފެއްދި ބަޖެޓު އެއަރލައިނެވެ. އަދި، ދެކުނު ކޮރެޔާގައި ތިންވަނައަށް އެންމެ ގިނަ އަދަދެއްގެ ފަސިންޖަރުން އުފުލާ އެއަރލައިނެވެ. އެ އެއަރލައިންގެ މަތިންދާބޯޓެއް ވެއްޓިފައި މި ވަނީ، ބެންކޮކާއި މުއާނާ ދެމެދު ސީދާ ދަތުރުތައް ފެށިތާ ތިން ހަފުތާއެއްހާ ދުވަސް ފަހުންނެވެ.

ދެކުނު ކޮރެޔާގެ އެއަރލައިނަކަށް މި ފަދަ ހިތާމަވެރި ހާދިސާއެއް އެންމެ ފަހުން ހިނގާފައި ވަނީ 1997ވަނަ އަހަރުއެވެ. އެ އަހަރު، ކޮރެޔަން އެއަރގެ މަތިންދާބޯޓެއް ވެއްޓި 200އަށްވުރެ ގިނަ މީހުން މަރުވިއެވެ. ދެކުނު ކޮރެޔާގެ ފަސްގަނޑުގައި ހިނގި މި ފަދަ އެހެން ހާދިސާއެއްގައި އެއަރ ޗައިނާގެ މަތިންދާބޯޓެއް ވެއްޓި 129 މީހުން މަރުވިއެވެ.