ޗައިނާއާއި އިންޑިއާ ފަހަތަށް ޖައްސާލުމަށްފަހު މާކެޓުގެ ކުރިއަށް ވިލާތުގެ ފަތުރުވެރިން

މިއަހަރުގެ ފުރަތަމަ ދުވަހު ރާއްޖެއަށް 5715 ފަތުރުވެރިން ޒިޔާރަތްކޮށްފައިވާކަމަށް ފަތުރުވެރިކަމާބެހޭ ވުޒާރާގެ ތަފާސް ހިސާބުތަކުން ދައްކައިފިއެވެ.

ފުރަތަމަ ދުވަހު ރާއްޖެއަށް އެންމެ ގިނައިން ފަތުރުވެރިން އައިސްފައިވަނީ އިޓަލީވިލާތުންނެވެ.

2024 ވަނަ އަހަރަކީ ރާއްޖެއަށް ރެކޯޑް އަދަދަކަށް ފަތުރުވެރިން ޒިޔާރަތްކުރި އަހަރެކެވެ. 2 މިލިޔަން ފަތުރުވެރިން 2024 ވަނަ އަހަރު ރާއްޖެއަށް ވަނީ އައިސްފައެވެ. މި އަހަރު ރާއްޖެއަށް 2 މިލިޔަނަށްވުރެ ގިނަ ފަތުރުވެރިން ގެނައުމަށް ސަރުކާރުން ވަނީ އަމާޒު ކަނޑައަޅުއްވާފައެވެ. .

ފަތުރުވެރިކަމާއި ބެހޭ ވުޒާރާގެ ތަފާސްހިސާބުތައް ދައްކާގޮތުން މިއަހަރުގެ ފުރަތަމަ ދުވަހު ރާއްޖެއަށް 5715 ފަތުރުވެރިން ވަނީ ޒިޔާރަތްކޮށްފައެވެ. އަދި އެންމެ ގިނައިން ފަތުރުވެރިން އައިސްފައިވަނީ އިޓަލީ، ރަޝިއާ، އިނގިރޭސިވިލާތް، ޖަރުމަނުވިލާތް އަދި ކަޒަކިސްތާނުންނެވެ.

ފުރަތަމަ ދުވަހު ރާއްޖެ ޒިޔާރަތްކުރި 5715 ފަތުރުވެރިންގެ ތެރޭގައި ހިމެނެނީ 2716 ފިރެހެނުންނާއި 2999 އަންހެނުންނެވެ.

ފުރަތަމަ ދުވަހު އެންމެ ގިނައިން ފަތުރުވެރިން އައި 5 ޤައުމު

* އިޓަލީވިލާތް – 1129 ފަތުރުވެރިން
* ރަޝިއާ – 1018 ފަތުރުވެރިން
* އިނގިރޭސިވިލާތް – 420 ފަތުރުވެރިން
* ޖަރުމަނުވިލާތް – 372 ފަތުރުވެރިން
* ކަޒަކިސްތާން – 245 ފަތުރުވެރިން

ފަތުރުވެރިކަމާއި ބެހޭ ވުޒާރާގެ ތަފާސްހިސާބުތައް ދައްކާގޮތުން ރާއްޖެއަށް ފަތުރުވެރިން އަންނަ ޤައުމުތަކަށް ދަނީ ބޮޑެތި ބަދަލުތަކެއް އަންނަމުންނެވެ. 2024 ވަނަ އަހަރުގެ ޓޮޕް މާކެޓްގައި އޮތް ޗައިނާއިން މިއަހަރުގެ ފުރަތަމަ ދުވަހު ރާއްޖެ އައިސްފައިވަނީ 117 ފަތުރުވެރިންނެވެ. އެހެންކަމުން ޗައިނާ އޮތީ 10 ވަނައިގައެވެ. ފުރަތަމަ ދުވަހު އިންޑިއާއިން 215 ފަތުރުވެރިން އައިސް އޮތީ 7 ވަނައިގައެވެ.

ސަރުކާރުގެ އަމާޒަކީ އަންނަ އަހަރު ފަތުރުވެރިކަމުން ލިބޭ އާމްދަނީ 5 ބިލިޔަން ޑޮލަރަށް އެރުވުންކަމަށް ފަތުރުވެރިކަމާއިބެހޭ ވަޒީރު އިބްރާހީމް ފައިޞަލް ވަނީ ވިދާޅުވެފައެވެ.

ފަތުރުވެރިކަމުން ލިބޭ އާމްދަނީ އިތުރުކުރުމުގެ އަމާޒަށް ސަރުކާރުން މަސައްކަތްކުރަމުންދާއިރު ދުނިޔޭގެ މުއްސަނދި ގައުމުތަކުން ރާއްޖެ އަންނަ ފަތުރުވެރިންގެ އަދަދު ދަނީ އިތުރުވަމުންނެވެ. އަދި ރާއްޖެއަށް އަންނަ ޕްރައިވެޓް ޖެޓްތަކާއި ފްލައިޓްތައްވެސް ދަނީ އިތުރުވަމުންނެވެ.

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ފަތުރުވެރިންނަށް ޚިދުމަތްދިނުމަށް މިވަގުތު ރާއްޖޭގައި 1271 ތަނެއް ވަނީ ހުޅުވާފައެވެ. މީގެތެރޭގައި ހިމެނެނީ 172 ރިސޯޓާއި، 15 ހޮޓެލްއާއި، 929 ގެސްޓްހައުސްގެ އިތުރުން 155 ސަފާރީ އުޅަނދެވެ.