އިނގިރޭސި ގައުމީ ފުޓްބޯޅަ ޓީމުގެ ކޯޗުކަމުގެ މަގާމުގެ މަސްއޫލިއްޔަތު ޖަރުމަނުގެ ތޯމަސް ޓޫކްލް އަދާކުރަން ފަށައިފިއެވެ.
މީގެ ތިން މަސް ކުރިން އޭނާއަށް މަގާމު ދިން ނަމަވެސް މަސައްކަތް ފެށެން އޮތީ މި އަހަރު ފެށުމުންނެވެ. އެއީ ޓޫކްލް ކުރިން އަދާކުރި ވަޒީފާތަކުގެ އެއްބަސްވުންތައް ހުރި ގޮތުންނެވެ. އޭނާ މަސައްކަތް ފެށުމުން އިނގިރޭސި އެފްއޭއިން ދިނީ ތިން ލަފުޒުގެ ތަފްސީލެކެވެ. އެގޮތުން ސޯޝަލް މީޑިއާގައި ބުނެފައިވަނީ "މިހާރު މަސައްކަތް ފަށައިފި،" ކަމަށެވެ. އަދި ޓީމު އެކުލަވާލަން ކުލަބުތައް ކުޅޭ މެޗުތައް ބަލަންދާނެ ވާހަކަ އޭނާވެސް ވަނީ ބުނެފައެވެ.
އިނގިރޭސި ކޯޗުކަމާ ހަވާލުވި ފަހުން ރަސްމީ އިވެންޓަކުން އޭނާ ފެނުނީ އެންމެ ފަހަރަކު އެވެ. އެއީ ޒިއުރިކްގައި މިދިޔަ މަހު ބޭއްވި ފީފާ ވޯލްޑް ކަޕުގެ ގުރު ނެގުމުގެ ރަސްމިއްޔާތުގައެވެ.
ޓޫކްލް އަކީ ކުލަބު ފުޓްބޯޅައިގެ ތަޖުރިބާކާރެކެވެ. އެގޮތުން އޭނާ ވަނީ ފަސް ކުލަބަކަށް ކޯޗުކޮށްދީފައެވެ. އޭގެ ތެރޭގައި ޖަރުމަނުގެ ބަޔާން މިއުނިކާއި، ބޮރޫޝިޔާ ޑޯޓްމުންޑް އަދި އިނގިރޭސިވިލާތުގެ ޗެލްސީ އާއި ފްރާންސްގެ ޕީއެސްޖީ ހިމެނެއެވެ. އެ ކުލަބުތަކުގެ ތެރެއިން ޕީއެސްޖީއާއެކު ޔުއެފާ ޗެމްޕިއަންސް ލީގު ފައިނަލަށް އަދި 2021 ގައި އެ ތަށި ޗެލްސީއަށް ވަނީ ހޯދައިދީފައެވެ.
ނަމަވެސް މިއީ ގައުމީ ޓީމެއްގައި އޭނާ އަދާކުރާ ފުރަތަމަ ވަޒީފާ އެވެ. އޭނާ އަކީ އިނގިރޭސި ގައުމީ ކޯޗުކަން ދިން ގައުމުން ބޭރުގެ ތިން ވަނަ ކޯޗެވެ.
18 މަސް ދުވަހުގެ އެއްބަސްވުމެއްގައި ކޯޗުކަމާ ހަވާލުވި ޓޫކްލްގެ ފުރަތަމަ މެޗަކަށްވާނީ އަންނަ މާޗު މަހުގެ 21 ވަނަ ދުވަހު އަލްބޭނިއާއާ ދެކޮޅަށް އިނގިރޭސިން ކުޅޭ މެޗެވެ. ވޯލްޑް ކަޕް ކޮލިފައިންގައި އިނގިރޭސިން ހިމެނެނީ ސާބިއާ އާއި އަލްބޭނިއާ އަދި ލެޓްވިއާ އާއި އެންޑޯރާއާ އެއް ގްރޫޕެއްގައެވެ.
"އަހަރެން މިހުރީ މަސައްކަތުގައި ކުރިއަށްދާން ވަރަށް ފޯރީގައި. އަހަރެން މިހުރީ އަލުން ދަނޑަށް ނުކުމެ ފަރިތަކުރުންތައް ކުރިއަށް ގެންދަން ކެތްމަދުވެފައި،ތޯމަސް ޓުކްލް
އިނގިރޭސި ކޯޗުކަން ހުސްވީ 9 އަހަރަށް ފަހު ގެރެތު ސައުތުގޭޓް މަގާމުން އިސްތިއުފާދިނުމުންނެވެ. އޭނާ ވަނީ ދެ ފަހަރެއްގެ މަތިން ޔޫރޯ ފައިނަލަށް އަދި އެއް ފަހަރު ވޯލްޑް ކަޕުގެ ސެމީ ފައިނަލަށް އިނގިރޭސިން ގެންގޮސްދީފައެވެ.