ސަޕޯޓަރުންގެ މަލާމާތް ރައްދުވި ފޯވާޑް ހޯޝުއާ ޒިރްކްޒީ ވިއްކާލުމުގެ މަސައްކަތް މެންޗެސްޓާ ޔުނައިޓެޑުން ފަށާފައިވާ ކަމަށް އިނގިރޭސި މީޑިއާތަކުން ބުނެފިއެވެ.
ނެދަލަންޑްސްގެ ޒުވާން ފޯވާޑް ޒިރްކްޒީ އަކީ މި ސީޒަނަށް އިޓަލީގެ ބޮލޯނިއާއިން 36.5 މިލިއަން ޕައުންޑަށް ގެނައި ކުޅުންތެރިއެކެވެ. ނަމަވެސް 23 އަހަރުގެ ފޯވަޑަށް ޔުނައިޓެޑްގައި ވަނީ އެކަށީގެންވާ ކުޅުމެއް ނުދެއްކިފަ އެވެ. އެގޮތުން ކުޅުނު 25 މެޗުން އޭނާ އަށް ޖެހިފައިވަނީ އެންމެ ހަތަރު ލަނޑެވެ. ޔުނައިޓެޑުގައި އޭނާއަށް ދިމާވެފައިވާ މައިގަނޑު އެއް މައްސަލައަކީ ޕްރެޝަރާއި ޔުނައިޓެޑް ކުޅޭ ސްޓައިލަށް ނުހޭނުމުގެ މައްސަލަ އެވެ.
ނިއުކާސަލް އަތުން ބަލިވުމުން މި ސީޒަން ދެ ބައިވިއިރު 19 މެޗުން ޔުނައިޓެޑަށް ލިބިފައިވަނީ 22 ޕޮއިންޓެވެ. އަދި ޓީމު އޮތީ 14 ވަނައިގައެވެ. އެއާއެކު ނިއުކާސަލް މެޗުގެ ފުރަތަމަ ހާފުގައި ޒިރްކްޒީ ބޭލުމުން ސަޕޯޓަރުން ވަނީ އޭނާއަށް މަލާމާތްކޮށް، ހޯއް ގޮވައި ހަދައިފަ އެވެ. އެއާއެކު ބެންޗުގައި މަޑުނުކޮށް އޭނާވެސް ވަނީ އަންނައުނު ހިފައިގެން ޗޭންޖިން ރޫމަށް ގޮސްފައެވެ.
ޔުނައިޓެޑްގެ ގިނަ ކުޅުންތެރިންގެ ތެރެއިން މިހާރުގެ ކޯޗު ރުބެން އޮމޮރިމް ގިނަ ކުޅުންތެރިންތަކެއް ވިއްކާލާނެ ކަމަށް ވަނީ ބެލެވިފައެވެ. ސަބަބަކީ ކުޅުންތެރިން ވިއްކާނުލައި އޭނާ ބޭނުންވާ ކުޅުންތެރިން ގެނައުމަށް ކުލަބުގެ މާލީ ހާލަތު ތަންނުދެތީއެވެ.
ޔުނައިޓެޑަށް ކުރިއަށް އޮތީ ތާވަލުގެ އެއްވަނައިގައި އޮތް ވާދަވެރި ލިވަޕޫލްގެ ކުރިމަތިލުމެވެ.