ނަމާދަށް ލޯބިކުރާ ބަޔަކު އުޅޭ މުޖުތަމަޢުއަކަށް ހެދުމަށް ޚާއްޞަ ޕްރޮގްރާމެއް

ދިވެހި މުޖުތަމަޢުއަކީ ނަމާދަށް ލޯބިކުރާ ބަޔަކު އުޅޭ މުޖުތަމަޢުއަކަށް ހެދުމުގެ ގޮތުން "ނަމާދު މަތިވެރިކުރުން" ގެ ނަމުގައި ޚާއްސަ ޕްރޮގްރާމެއް މިއަހަރު ކުރިއަށް ގެންދިޔުމަށް ވަނީ ނިންމަވާފައެވެ.

މި ޕްރޮގްރާމް ބައްޓަންކޮށްފައިވަނީ ދިވެހިންގެ ހިތްތަކުގައި އިސްލާމްދީނަށް ލޯބި ޖެއްސުމަށް މަޢުލޫމާތު ފޯރުކޮށްދިނުމުގައި މުޢާމަލާތުކުރުމުގެ ޒަމާނީ ޢިލްމީ އާގޮތްތައް ބޭނުންކޮށްގެންނެވެ.

އިސްލީމީ ކަންތައްތަކާބެހޭ ވުޒާރާއިން މިއަހަރަށް ޚާއްސަކޮށްގެން ދީނީ ޝިޢާރު ފުޅާކުރުމަށްޓަކައި އެތައް ޕްރޮގްރާމެއް ކުރިއަށްގެންދިޔުމަށް ވަނީ ނިންމާފައެވެ. މި ޕްރޮގްރާމުތަކުގެ ތެރެއިން ނަމާދު ޕްރޮގްރާމަކީ ފާހަގަކޮށްލެވޭ އެއް ޕްރޮގްރާމެވެ.

ނަމާދު ޕްރޮގްރާމަކީ މުޖްތަމަޢުގެ ފަރުދުން ނަމާދަށް ހޭލުންތެރިކުރުވުމާއ،ި ނަމާދަށް ލޯބިޖެއްސުމާއ،ި ނަމާދު މަތިވެރިކުރުމާއ،ި މާތް الله އަމުރު ކުރައްވާފައިވާ ގޮތަށް އަދި ރަސޫލާ صلى الله عليه وسلم ގެ ސުންނަތާއި އެއްގޮތަށް ނަމާދުގެ އަޅުކަން ޤާއިމުކުރުމަށް ބާރުއެޅުމަށްކުރިއަށް ގެންދާ ޕްރޮގްރާމެކެވެ.

މިޕްރޮގްރާމުގައި ކުރިއަށްދާނެ ހަރަކާތްތަކުގެތެރޭގައ،ި ނަމާދާގުޅުންހުރި މީޑިއާގެ ޚާއްޞަ ބަޔަކާއ،ި އޮންލައިން އަދި އޮފްލައިން ކޯސްތަކާއ،ި ތަމްރީނު ޕްރޮގްރާމްތައް ކުރިއަށްގެންދިޔުން ހިމެނެއެވެ. މީގެއިތުރުން ލައިބްރަރީތަކާއ،ި ދިރާސާތަކާއ،ި އިސްތިޝާރީ ލަފާދިނުމާއ،ި
ވެބްސައިޓަކާއ،ި ސޯޝަލް މީޑިއާގެ އެކި ޕްލެޓްފޯމްތައް މެދުވެރިކޮށް މައުލޫމާތު ފޯރުކޮށްދިނުމަށް ވަނީ ހަމަޖެހިފައެވެ. އިސްލާމީ ކަންތައްތަކާބެހޭ ވުޒާރާއިން ވިދާޅުވީ މި ޕްރޮގްރާމްގައި މުބާރާތްތައް ބޭއްވުމާއ،ި ނަމާދަށް ޚާއްޞަ މައުރަޒެއް ބޭއްވުންވެސް ހިމެނޭކަމަށެވެ.

މި ޕްރޮގްރާމްގެ ތެރެއިން ނަމާދުގެ މުހިއްމުކަމާއ،ި ރުކުންތަކާއ،ި ސުންނަތްތަކާއ،ި ނަމާދުގައި ޚުޝޫޢަތްތެރިވުމާއ،ި ސުންނަތާ އެއްގޮތަށް ނަމާދު ކުރާނެގޮތާއި މިފަދަ މުހިއްމު އެތަކެއް މަޢުލޫމާތުތަކެއްގެ އަލީގައި މާތް الله އަށް އެންމެ ފުރިހަމަގޮތުގައި އަޅުވެތިވުމަށް އިންސާނާ ބައްޓަންވެގެންދާނެ ގޮތުގެ މަޢުލޫމާތުތައް ފޯރުކޮށްދޭނެކަމަށެވެ.

އިސްލާމީ ކަންތައްތަކާބެހޭ ވުޒާރާއިން ވިދާޅުވީ މި މަޝްރޫޢުގެ ހުރިހާ ހަރަކާތްތައް ފަރުމާކުރާނީ ހުރިހާ ފަންތިތަކަކަށްވެސް ތަފާތު ޕްރޮގްރާމްތައް ހިމަނައިގެންކަމަށެވެ.

މި ޕްރޮގްރާމްގެ ތެރެއިން ނަމާދު ޕްރޮގްރާމު ފެށުމުގެ ކުރިންނާއި އޭގެ ފަހުންވެެސް ނަމާދަށް މީހުން އަހުލުވެރިވެފައިވާ މިންވަރު ދެނެގަތުމަށް ދިރާސާއެއް ކުރުމަށް ހަމަޖެހިފައިވެއެވެ.