ވިލާތުގެ އިއްތިހާދު (އީޔޫ)ގެ މެންބަރު ޤައުމުތަކުގެ ރައްޔިތުންނަށް ޕާސްޕޯޓާ ޗެކުކުރުމާ ނުލައި އެއް ޤައުމާއި އަނެއް ޤައުމާ ދެމެދު ދަތުރު ކުރެވޭ ގޮތަށް 'ޝެންގަން' އެއްބަސްވުމުގެ ދަށުން ޤާއިމު ކޮށްފައިވާ ޝެންގަން ސަރަޙައްދުގެ ފުރިހަމަ މެންބަރު ކަން ރޮމޭނިޔާ އަދި ބަލްގޭރިޔާއަށް ދީފިއެވެ. މި ކަން ފާހަަގަ ކުރުމަށް ބަލްގޭރިޔާއާއި ރޮމޭނިޔާ ގުޅޭ ސަރަޙައްދީ ރޮނގު ކައިރީގައި އޮތް ރޫސޭގައި ވަނީ ޚާއްޞަ ރަސްމިއްޔާތެއް ބާއްވާފައެވެ.
އެ ރަސްމިއްޔާތު ޝަރަފުވެރި ކޮށްދެއްވާފައި ވަނީ އެ ދެ ޤައުމުގެ ދާޚިލީ ވަޒީރުންނެވެ. ދޯނައު ކޯރު ހުރަސްކޮށް ރޫސޭގައި ބިނާކޮށްފައިވާ ބުރިޖަކީ، ދެ ޤައުމުގެ ދެމެދުގައި މުދާ އުފުލުމަށް ބޭނުން ކުރާ މައި މަގެކެވެ. ރޮމޭނިޔާ އަދި ބަލްގޭރިޔާއަށް ޝެންގަން ސަރަޙައްދުގެ ބައެއް ހުއްދަތައް 2024ވަނަ އަހަރުގެ މާރިޗު މަހު ވެެސް އޮތީ ދީފައެވެ.
އެ ހުއްދައާ އެކު، ކަނޑުމަގުންނާއި ވައިގެ މަގުން އީޔޫގެ އެހެން ޤައުމުތަކަށް ދަތުރު ކުރާ ރޮމޭނިޔާ އަދި ބަލްގޭރިޔާގެ ފަސިންޖަރުންގެ ޕާސްޕޯޓު ބެލުމެއް ނެތި ދޫކޮށްލެވޭނެއެވެ. ނަމަވެސް، އޮސްޓްރިޔާއިން ކުރިމަތި ކޮށްފައިވާ ހުރަސްތަކަކާ ގުޅިގެން އެ ދެ ޤައުމުގެ ރައްޔިތުންނަށް އެއްގަމު މަގުން ޕާސްޕޯޓު ބެލުމާ ނުލައި އީޔޫގެ ޤައުމުތަކަށް ދަތުރު ކުރުމަށް އޮތީ ހުރަސް އެޅިފައެވެ. އެ ކަމަށް ނިމުމެއް އައިސްފައި މި ވަނީ 1 ޖަނަވަރީގައެވެ.
ޝެންގަން އެއްބަސްވުމުގެ ނަމުގައި ފުރަތަމަ ފަހަރަށް އެއްބަސްވުމެއް އެކުލަވައިލާފައި ވަނީ 1985ވަނަ އަހަރުއެވެ. އެ އެއްބަސްވުމުގެ ބައިވެރިންނަކީ ފަރަންސޭސިވިލާތާއި، ޖަރުމަނުވިލާތާއި، ބެލިޖިޔަމް އަދި ލަގްޒެންބަރގެވެ. އެއީ، ޕާސްޕޯޓު ބެލުމާ ނުލައި އެ ޤައުމުތަކުގެ ރައްޔިތުންނަށް ޤައުމުތަކުގެ މެދުގައި ދަތުރު ކުރުމުގެ ފުރުޞަތު ފަހިކޮށްދިނުމަށް ފަރުމާ ކޮށްފައިވާ އެއްބަސްވުމެކެވެ.
އެ އެއްބަސްވުމުގައި އީޔޫގެ 27 މެންބަރުންގެ ތެރެއިން 25 މެންބަރުން މިހާރު ވަނީ ބައިވެރިވެފައެވެ. އޭގެ ތެރޭގައި އައިސްލެންޑާއި، ލީކްޓެންސްޓައިނާއި ނޯވޭގެ އިތުރުން ސްވިޓްޒަލެންޑު ވެސް ހިމެނެއެވެ. ނަމަވެސް، އަޔަލެންޑާއި ސައިޕްރަސަކީ ޝެންގެން ސަރަޙައްދުގެ ޤައުމުތަކެއް ނޫނެވެ.