ޓޭބަލް ޓެނިސް އެސޯސިއޭޝަން އޮފް މޯލްޑިވްސް އިންތިޒާމުކޮށްގެން ރާއްޖޭގައި ފުރަތަމަ ފަހަރަށް ބާއްވާ "މޯލްޑިވްސް އޯޕަން ޓީޓީ މުބާރާތް" މި އަހަރަށް ތާވަލުކޮށް، އެ އެސޯސިއޭޝަންގެ އަހަރީ ކަލަންޑަރު އިއުލާންކޮށްފިއެވެ.
ރާއްޖޭގައި މުޅިން އަލަށް ބާއްވާ މި މުބާރާތް ތާވަލުކޮށްފައިވަނީ ޖުލައި މަހުގެ ފަސްވަނަ ދުވަހުން ފެށިގެން 12 ވަނަ ދުވަހުގެ ނިޔަލަށެވެ. އަދި އެ މުބާރާތުގެ ކުރިން ޖޫން މަހުގެ 25 އިން 30 ގެ ނިޔަލަށް، 2026 އަހަރު ލަންޑަނުގައި އޮންނަ ވޯލްޑް ޗެމްޕިއަންޝިޕުގެ ދެކުނު އޭޝިއާ ކޮލިފައިން މެޗުތައް ރާއްޖޭގައި ކުރިއަށްދާނެއެވެ.
މި އަހަރުގެ ޓީޓީ ހަރަކާތްތައް ފެށިގެންދާނީ މި މަހު އޮންނަ އަމްޕަޔަރުން ތާޒާކުރުމުގެ ޕްރޮގްރާމުންނެވެ. އަހަރުގެ ފުރަތަމަ މުބާރާތަކަށް ތާވަލުކޮށްފައިވަނީ ކޮންމެ ރަމަޟާން މަހެއްގައިވެސް ބާއްވަމުން އަންނަ ދުންތަރި ކަޕެވެ.
މި އަހަރުގައި ޓީޓީން ވާދަކުރާ ބައިނަލްއަގުވާމީ އިވެންޓުތަކަށް ބަލާއިރު، މިހާތަނަށް ވަކި ތާރީޚެއް ކަނޑައެޅިފަނުވި ނަމަވެސް ދެކުނު އޭޝިއާގެ ރީޖަނަލް ޔޫތު ޗެމްޕިއަންޝިޕުގައި ދިވެހި ޓީޓީ ކުޅުންތެރިން ވާދަކުރާނެއެވެ. އަދި މި އަހަރު ބަހްރެއިންގައި އޮންނަ އޭޝިއަން ޔޫތު ގޭމްސްގައި ދިވެހި ކުޅުންތެރިން ވާދަކުރާއިރު، ޕާކިސްތާނުގައި އޮންނަ ސައުތު އޭޝިއަން ގޭމްސްގައިވެސް ދިވެހި އެތުލީޓުން ވާދަކުރާ ގޮތަށް ވަނީ ހަމަޖެހިފައެވެ. އަދި އިންޑިއާގައި އޮންނަ އޭޝިއަން ޗެމްޕިއަންޝިޕުގައިވެސް ދިވެހި ކުޅުންތެރިން ވާދަކުރާއިރު، ސައުދީ އަރަބިއްޔާގެ ރިޔާދުގައި އޮންނަ އިސްލާމިކް ސޮލިޑާރިޓީ ގޭމްސްގައި ދެވހި އެތުލީޓުން ވާދަކުރާނެއެވެ. އެ ގޭމްސް ބޭއްވުމަށް ހަމަޖެހިފައިވަނީ ނޮވެންބަރު މަހު ހަތަކުން ފެށިގެން 21 ވަނަ ދުވަހުގެ ނިޔަލަށެވެ.
މި އަހަރުގެ ޓީޓީ ކަލަންޑަރުގައި ވަނީ ކުޅުދުއްފުށި ސިޓީ އާއި، ފުވައްމުލައް ސިޓީ އާއި، އައްޑޫ ސިޓީ އާއި، ކ. ތުލުސްދޫ އާއި، ތ. ތިމަރަފުއްޓާއި، ޅ.ނައިފަރާއި، ރ.އުނގޫފާރު އަދި އއ. އުކުޅަހުގައި ތަމްރީން ޕްރޮގްރާމުތަކާއި، ޓީޓީގެ ހަރަކާތްތައް ހިންގުމަށް ތާވަލުކޮށްފައެވެ. އަދި އަހަރުގެ އެންމެ ފަހު ހަރަކާތަކަށް ތާވަލުކޮށްފައިވަނީ ޑިސެމްބަރު މަހުގެ ފަހު ހަފުތާގައި އޮންނަ އިޔަރ އެންޑް ސްމޭޝް ސީނިއަރ އެޑިޝަނެވެ.