މީލާދީ އާ އަހަރުގެ ތަހުނިޔާ ބޭރު ޤައުމުތަކުގެ އިސްވެރިންނަށް ރައީސްގެ ދެކަނބަލުން ފޮނުއްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު، 2025 ވަނަ އައު އަހަރުގެ ތަހުނިޔާ، އެކުވެރި ޤައުމުތަކުގެ އިސް ވެރިންނަށާއި، ސަރުކާރުތަކަށް ފޮނުއްވައިފިއެވެ.

ރައީސުލްޖުމްހޫރިއްޔާގެ ދެކަނބަލުންގެ ތަހުނިޔާ މެސެޖުގައި މިފެށޭ އައު އަހަރަކީ ތަނަވަސްކަމާއި އުފާފާގަތި ކާމިޔާބު އަހަރަކަށް ވާނެކަމަށް އުންމީދުކުރައްވާކަމަށް ވިދާޅުވިއެވެ. އަދި ރައީސްގެ ދެކަނބަލުންގެ މެސެޖުގައި ބައިނަލްއަޤުވާމީ ޖަމިއްޔާ ޖަމާޢަތްތަކުގެ ވެރިންނަށާއި ރެސިޑެންޓް ޑިޕްލޮމެޓިކް މިޝަންތަކުގެ ވެރިންނަށްވެސް ތަހުނިޔާ ވިދާޅުވިއެވެ.

މި ފެށުނު މީލާދީ އައު އަހަރާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި ޚިޠާބުގައި އައު އަހަރާ ބައްދަލުކުރަނީ އުންމީދުގެ ދަންމަރުތަކާއި ތަރައްޤީގެ ތަޞައްވުރުތަކާއި ދިވެހި އިސްލާމީ އަޚްވަންތަކަމާއެކުކަމަށް ވިދާޅުވިއެވެ. އަދި ވަކި ލަނޑުދަނޑިތަކެއް ހާސިލުކުރުމަށްޓަކައި ދިވެހި ދައުލަތް ކަނޑައެޅިފައިވާ އަމާޒުތަކަކާ ދިމާއަށްކަން ރައީސްގެ ޚިޠާބުގައި ފާހަގަކުރެއްވިއެވެ.

ރައީސުލްޖުމްހޫރިއްޔާގެ ޚިޠާބުގައި މި ފެށުނު 2025 ވަނަ އަހަރު ވާނީ ތަރައްޤީގެ ވަރަށް ގިނަ މަޝްރޫޢުތަކުގައި ޢަމަލީ ސިފަ ޖެހޭނެ އަހަރެއްކަމަށް ވިދާޅުވެފައެވެ. އަދި މިއަހަރު އިޤުތިޞާދީ ފުދުންތެރިކަން އިއާދަވާން ފަށައި، މަސައްކަތްތެރީންނަށް އިތުރު ފުރުޞަތުތައް ހުޅުވޭނެކަންވެސް އެމަނިކުފާނުގެ ޚިޠާބުގައި ފާހަގަކުރެއްވިއެވެ.

ނިމިދިޔަ 2024 ވަނަ އަހަރު ފާހަގަކޮށްލެވެނީ ޤައުމުގެ ކުރިއެރުމަށް މުހިންމު ނިންމެވުންތަކެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ކެބިނެޓުން ނިންމެވި އަހަރަކަށެވެ. އެގޮތުން މަސްތުވާތަކެތި ބޭނުންކުރާ ފަރާތްތަކަށް ކޮމިއުނިޓީބޭސްޑް ރިހެބިލިޓޭޝަން ޕްރޮގްރާމް ފަށައި، ރާއްޖޭގެ 3 ސަރަހައްދެއްގައި ރީހެބިލިޓޭޝަން ފަރުވާދޭ މަރުކަޒެއް ޤާއިމްކުރުމަށް ހުއްދަ ދޭން ވަނީ ނިންމަވާފައެވެ.

މީގެ އިތުރުން ރީއެކްސްޕޯޓް ކުރެވޭ ނިޒާމެއްގެ ތެރެއިން އާމްދަނީ އިތުރުކުރުމަށް މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯންގެ ނަމުގައި ކުންފުންޏެއް އުފެއްދުމަށް ރައީސް މުޢިއްޒު ވަނީ ނިންމަވާފައެވެ. އަދި ދިވެހި މުޖުތަމަޢު ދުންފަތާ ދުރުކުރުމަށް ސިނގިރޭޓުން ނަގާ ޑިޔުޓީ ބޮޑުކޮށް، ރައްޖޭގައި ވޭޕު ބޭނުންކުރުން މަނާކުރުމަށްވެސް ރައީސް ޑރ. މުޙައްމަދު މުޢިއްޒު ނިމުނު 2024 ވަނަ އަހަރު ވަނީ ނިންމަވާފައެވެ.