މިރޭ 12 ޖެހުމާއެކު 2024 ވަނަ އަހަރުގެ ކުޅިވަރު ހަރަކާތްތައްވެސް ތާރީހީ މާޒީގެ ސޮފުހާއަކަށް ބަދަލުވެގެންދާނެ އެވެ. ފްރާންސްގެ ޕްރިހުގައި ބޭއްވި އޮލިމްޕިކްސް ކުޅިވަރު މުބާރާތާއި ޕްރަލިމްޕިކްސް އަދި ފޯރިގަދަ އެތަކެއް ފުޓްބޯޅަ މުބާރާތަކީ ރެކޯޑްތަކެއް މުގުރާލި އަދި އެތައް ބަޔަކު އެކުވެރިކުރުވި މުބާރާތްތަކެވެ. އުފަރާއި ހިތާމައިގެ ކަރުނަ އޮހުރުނު ހަނދާންތަކެކެވެ. އެތައް ބައެއްގެ ލޯބި ހޯދައި އެމީހުންގެ ދިރިއުޅުމާ ގުޅިފައިވާ ކާމިޔާބު އެތައް ތަރިންތަކެއް ރިޓަޔާވި އަހަރެކެވެ. ކުރިން އެތައް ބަޔަކަށް ހިނިތުންވުން ގެނުވި ކުޅިވަރުގެ ޝަހުސިއްޔަތުންތަކެއް ތާބަދަށް އަލްވަދާއު ކިޔައިދިޔަ އަހަރެއްވެސްމެ އެވެ.
އަހަރު ފެށުނީ ޖަރުމަނުގެ ތަރި ފްރާންސް ބެކެމްބާ ޖެނުއަރީ މަހު ނިޔާވި ހިތާމަވި ޚަބަރާއެކުގަ އެވެ. އޭނާގެ ޝަރަފުގައި ބަޔާންގެ 5 ނަންބަރު ޖާޒީ ވެސް ވަނީ ބޭނުންނުކޮށް އާސާރު ކުރަން ނިންމައިފަ އެވެ.
އެންމެ ވިދުން ގަދައީ ފުޓްބޯޅަ މުބާރާތްތައް
2024 ވަނަ އަހަރުގެ އެންމެ ވިދުންގަދަ މުބާރާތްތަކަކީ ފުޓްބޯޅަ މުބާރާތްތަކެވެ. ޖަރުމަނުގައި ބޭއްވި ޔޫރޯ ކާމިޔާބު ކުރީ ސްޕޭނެވެ. ލަމީން ޔަމާލް ވިދައި ބަބުޅައި ގޮސް ދުނިޔޭގެ އެންމެ މޮޅު ޒުވާން ކުޅުންތެރިޔާގެ މަގާމު ހޯދީ މި މުބާރާތުގެ އެހީގައެވެ. އޭޝިޔާގެ ޗެމްޕިއަންކަން ދިފާއު ކުރީ ގިނަ ބައެއްގެ ލަފާކުރުންތަކާ ހިލާފަށް ގަތަރުންނެވެ. އެފްރިކަން ނޭޝަންސް ކަޕުގެ ތަށި ހޯދީ އައިވަރީ ކޯސްޓެވެ. ކޮޕާ އެމެރިކާ ދިފާއުކުރީ ލަޔޮނަލް މެސީގެ އާޖެންޓީނާ އެވެ.
61 އަހަރުގެ މާމަ އޮލިމްޕިކްސްގައި
ޕެރިސް އޮލިމްޕިކްސްގެ އެންމެ ވިދުން ގަދައީ އެމެރިކާ އާއި ޗައިނާ އަދި ފްރާންސެވެ. ފްރާންސްގެ ލިއޯން މާޗާންޑް ޕޫލުން އެރީ ހަތަރު ރަންމެޑެއްޔާއެކުގަ އެވެ. ފްރާންސްގެ ސެން ކޯރުގައި ބޭއްވި ހުޅުވުމުގެ ރަސްމިއްޔާތާއެކު އޮލިމްޕިކްސް ހުޅުވުމުގެ ތާރީހު ބަދަލުކޮށްލި އެވެ. މުބާރާތުން އެންމެ ފާހަގަ ކުރެވުނީ އުމުރުން 61 އަހަރުގައި މާމަ އަކު ޓޭބަލް ޓެނިސް މެޗަކަށް ނުކުތުމުންނެވެ. މި މާމަ އަކީ ލަގްޒެމްބާގުގެ މީހެކެވެ. އޭނާގެ ނަމަކީ ނިޒިއާ ލިއާން އެވެ. އޮލިމްޕިކްސްގައި ކުޅުމުން މާމަ ވެގެންދިޔައީ އޮލިމްޕިކްސްގެ ތާރީހުގައި މެޗެއް ކުޅުނު އެންމެ ދުވަސްވީ މީހާއަށެވެ.
ޓެނިހުގެ ތަރި ނަޑާލް ރިޓަޔާކުރި
ޓެނިހުގެ ތަރި ރަފޭލް ނަޑާލް އުމުރުން 38 އަހަރުގައި ރެކްޓް ދޫކޮށްލައި، ކޯޓުން ފޭނީ އިތުރަށް ކުޅުން ކުރިއަށް ގެންދާނެ ހަކަތަނެތުމުންނެވެ. އޭނާގެ ވަދާވެރިޔާ ނޮވަކް ޖޮކޮވިޗް 16 އަހަރުވަންދެން ދޫނުދީ ކުރަމުން އައި އުއްމީދުގައި ކުލަޖެހުނީ ވެސް މި އަހަރު އެވެ. އެއީ އޮލިޕިކްސްއިން ރަން މެޑަލް ހޯދައިގެންނެއެވެ.
ކްރިކެޓްގެ ރަސްކަން އިންޑިޔާގައި
ޓުވެންޓީ20 ކްރިކްޓް މުބާރާތް ކާމިޔާބުކުރީ އިންޑިޔާ އެވެ. މިވާނުގައި ގޮސް އޭޝިޔާ ކަޕް ވެސް އިންޑިޔާއިން ކާމިޔާބުކުރި އެވެ. ވޮލީބޯޅައިގެ ރަންމެޑަލް ހޯދީ އިރާނެވެ. މާބަނޑުވެހުރެ، ބަނޑަށް ހަތް މަހުގައި ޖޯޑީ ގްރިންހަމް ޕްރެލިމްޕިކްސްއިން ދެ ރަން މެޑަލް ހޯދުމަކީ ވެސް 2024ގައި ގިނަ ބައެއްގެ ނަޒަރު ހުއްޓިގެންދިޔަ ކަމެކެވެ.
ޑާޓް ޗެމްޕިއަންޝިޕުގައި ހަތަރު ސެޓް ގެއްލިފައި އޮއްވައި ކުރީގެ ޗެމްޕިއަން ފަހަތުން އަރައި ފަސް ފަސްސެޓް ހޯދައިގެން މޮޅުވުމަކީ ފާހަގަކޮށްލެވޭ ކަމެކެވެ. އެކަމަކު ޓީން އޭޖް ކުއްޖެއްގެ އަތުން ސެމީ ފައިނަލުގައި އޭނާ ބަލިވީ އެވެ.
ބްރެޒިލްގެ އަންހެން ކެޕްޓަން މާޓާ ރިޓަޔާކުރި
ޕޯޗުގަލްގެ ޕެޕޭއި ޖަރުމަނުގެ މެނުއަލް ނޯޔާ އާއި ޓޯނީ ކްރޫސް އަދި އިކާއީ ގުންޑޮގަން އާއި ބްރެޒިލްގެ އަންހެން ކެޕްޓަން މާޓާ އަކީ ރިޓަޔާކުރި އަލިގަދަ ތަރިންނެވެ. 9 އަހަރަށް ފަހު ޔާގެން ކްލޮޕް ލިވަޕޫލް ދޫކޮށްލުމަކީ ވެސް އަހަރުގެ އަލިގަދަ ހަނދާނެކެވެ.
އަންހެން ޓީމަކަށް ބާސެލޯނާ، ފިރިހެނުންގެ އެއްވަނަ ރެއާލްއަށް
އަންހެނުންގެ ފުޓްބޯޅައިގެ އެންމެ ކާމިޔާބު ކުލަބަކީ ސްޕޭނުގެ ބާސެލޯނާ އެވެ. ފިރިހެނުންގެ އެންމެ ވިދުންގަދަ ކުލަބަކީ ސްޕޭނުގެ ރެއާލް މެޑްރިޑެވެ. ސްޕެނިޝް ލީގާއި ޗެމްޕިއަންސް ލީގު ހޯދައިދީގެން ކޯޗު ކާލޯ އެންޗެލޯޓީ ދުނިޔޭގެ އެންމެ މޮޅު ކޯޗުގެ މަގާމު ހޯދި އެވެ. ރެއާލްގެ ރައީސް ފްލޮރެންޓީނޯ ޕްރޭޒަށް ދުނިޔޭގައި އެންމެ މޮޅަށް ކުލަބެއް ހިންގި ރައީސްގެ މަގާމު ގްލޯބް ސޮކާއިން ދިނީ އޭނާގެ ރޭވުންތެރިކަމާއި ހިކުމަތު އަމަލީގެ ސަބަބުން ރެއާލް އަރައި ބިންތީގައި އޮތަތީ އެވެ.
ބެލޮންޑީއޯގެ މައްސަލަ ހޫނުކޮށްލީ ރޮނާލްޑޯ
އެކަމަކު ރެއާލްގެ ބްރެޒިލްގެ ފޯވަޑް ވިނީޝިއަސް ޖޫނިއާ އަށް ޔޫރަޕުގެ މޮޅު ކުޅުންތެރިޔާ އަށް ދޭ ބްލޮންޑިއޯ އެވޯޑެއް ނުލިބުނެވެ. ކުޅުންތެރިން އެންމެ ބޮޑު ޝަރަފުކަމަށް ބަލާ މި އެވޯޑް ލިބުނީ ގައުމީ ޓީމާއި މެންޗެސްޓާ ސިޓީގައި އިދިކޮޅު ޓީމުތައް ރޫޅައި ކުދިކުދި ކުރަމުންދިޔަ މިޑްފީލްޑަރު ޕެޑްރީ އަށެވެ. ބެލޮންޑީއޯ ހަފުލާ، ރެއާލްއިން ބޮއިކޮޓް ކުރީ ވިނީޝިއަސްގެ ހައްގުގަ އެވެ. އިންސާފެއްނޫނޭ ބުނަމުންނެވެ. މި ކަމަށް ބާރު ލިބުނީ އޭގެ ފަހުން ބޭއްވި ފީދާ ދަ ބެސްޓް އެވޯޑާއި ޑުބާއީގެ ގްލޯބް ސޮކާ އެވޯޑްގައި ޕެޑްރީ ފަހަތަށްލައި ވިނީޝިއަސް އަށް އެވޯޑް ލިބުމުންނެވެ.
މިއާއެކު މި ކަންތައްގަނޑު އިތުރަށް ބޮޑުކޮށްލީ ކްރިސްޓިއާނޯ ރޮނާލްޑޯ އެވެ. މާޒީގައި ކަންހިނގާފައިވާ ގޮތްތަކަށް ވެސް ރިޔާއަތްކޮށް، އަމިއްލަ ދިފާއުގައި ވެސް ވާހަކަ ދައްކަމުން ރޮނާލްޑީ ބުނީ ބެލޮންޑީއޯ އެވޯޑް އިންސާފުވެރިނޫން ކަމަށެވެ. މި އަހަރުގެ ހައްގުވެރިއަކީ ވިނީޝިއަސް ކަމަށެވެ. އެވޯޑް ވަނީ އޮޅުވާލައި، އިންސާފުން އެއްކިބާވެފައި ކަމަށެވެ. ރޮނާލްޑޯގެ މި ބަސްތަކުގެ ސަބަބުން މި ބަހުސަށް ނިމުމެއް ނާންނާނެ އެވެ. 2025ގައި ކުޅެން ތައާރަފްކުރި 32 ޓީމުގެ ކުލަބް ވޯލްޑްކަޕް ވެގެންދާނީ އަނެއްކާ ވެސް ފޯރިގަދަ މުބާރާތަކަށެވެ.