2024 ވަނަ އަހަރަކީ ކުޅިވަރުގެ ފާހަގަކޮށްލެވޭ ތަރިންތަކެއް ނިޔާވި އަހަރެކެވެ.
ފްރާންޒް ބެކެމްބާ
ފްރާންޒް ބެކެމްބާ އަކީ ޖަރުމަނާއި ބަޔާން މިއުނިކްގެ ލެޖެންޑެކެވެ. އޭނާ ނިޔާވީ 2024 ވަނަ އަހަރުގެ ޖެނުއަރީ މަހު އެވެ. ބެކެމްބާގެ ވަނަމަކީ ޑާ ކައިޒާ އެވެ. މާނައަކީ އެފަދަ ދެވަނައެއްނެތް މީހާ އެވެ. އޭނާ އަދި ދުނިޔެދުށް އެންމެ މޮޅު އެއް ފުޓްބޯޅަ ކުޅުންތެރިޔާ އެވެ. ކުޅުންތެރިއެއްގެ ގޮތުގައި 1974 ވަނަ އަހަރުގެ ވޯލްޑްކަޕް އަދި 1990 ވަނަ އަހަރު ކޯޗެއްގެ ގޮތުގައި ވޯލްޑްކަޕް ކާމިޔާބުކުރި އެވެ. އޭނާ އަކީ ޖަރުމަނުގައި ބޭއްވި 2006 ވަނަ އަހަރުގެ ވޯލްޑްކަޕް އޮގަނައިޒިން ކޮމިޓީގެ ޗެއާމަންވެސްމެ އެވެ. އޭނާގެ ޖަނާޒާ ރަސްމީ އިއްޒަތުގައި ބޭއްވީ ބަޔާންގެ އެލިއާންޒް އެރީނާގަ އެވެ. އެ ސްޓޭޑިއަމް ހުންނަ މަގަށް މިހާރު ކިޔަން ނިންމާފައިވަނީ ވެސް ބެކެމްބާގެ ނަމެވެ.
ޖެޕް ކޭޕްސް
އިނގިރޭސިވިލާތުގެ މަޝްހޫރު ޝޮޓް ޕުޓާ ޖެފް ކޭމްސް ނިޔާވީ 2024ގަ އެވެ. އޭނާ އަކީ ކޮމަންވެލްތް ގޭމްސް އާއި ޔޫރަޕިއަން އިންޑޯ ގޭމްސްއިން ރަންމެޑަލް ހާސިލްކޮށްފައިވާ އެތްލީޓެކެވެ. ދުނިޔޭގެ އެންމެ ބާރުގަދަ މީހާގެ ގޮތުގައި ވެސް ދުވަސްކޮޅަކު ހޭދަކުރި ކޭޕްސް ވަނީ ތިން ފަހަރު އޮލިމްޕިކްސްގައި ވެސް ވާދަކޮށްފަ އެވެ. ރަންމެޑެއްޔާ އެންމެ ގާތަށް ދެވުނީ މޮސްކޯގައި 1980ގައި ބޭއްވި މުބާރާތުގަ އެވެ. ދިޔައީ ފަސް ވަނަ އަށެވެ.
ކެލްވިން ކިޕްޓަމް
ކިޕްޓަމް އަކީ ފިރިހެނުންގެ މެތަރަން ދުވުމުގެ ޗެމްޕިއަނެކެވެ. ދުނިޔޭގެ ރެކޯޑް ވެސް އޮތީ އޭނާގެ އަތުގަ އެވެ. 2024 ފެބްރުއަރީގައި އޭނާ ދުނިޔެއާ އަލްވަދާއުކިޔަން ޖެހުނީ އަމިއްލަ ގައުމު ކެންޔާގައި ހިނގި އެކްސިޑެންޓެއްގަ އެވެ. ކެންޔާ އަކީ މޮޅު ދުވުންތެރިން އުފެދުނު ތަނެކެވެ. އެއިން މީހަކާ ގުޅުމެއްނެތި އުމުރުން 24ގައި ދުނިޔޭގެ އެންމެ އުހަށް ވާސިލްވި ކިޕްޓަމްއަކީ އޭގެ ހަ އަހަރު ކުރިން އަރާނެ ބޫޓެއް ވެސް ނެތިގެން އުޅުނު މީހެކެވެ.
ސްވެން ގޯރާން އެރިކްސަން
މެންޗެސްޓާ ސިޓީ އާއި ލާޒިއޯ އާއި ލެސްޓާ ސިޓީ އާއި ރޯމާގެ ކޯޗުކަން ކުރި އެރިކްސަން އަކީ އިނގިރޭސި ގައުމީ ޓީމުގެ ފުރަތަމަ ގައުމުން ބޭރު ކޯޗެވެ. ސްވިޑްންގެ ކޯޗު ވަނީ އިނގިރޭސި ޓީމާއެކު 2002 އަދި 2005ގެ ވޯލްޑްކަޕް ކުއާޓާ ފައިނަލަށް ދަތުރުކޮށްފަ އެވެ. 12 ކުލަބުގެ ކޯޗުކަން ކޮށްދީ 18 ތަށި ހޯދި އެރިކްސަންގެ ފަހުދުވަސްކޮޅު އޭނާގެ ނުވެއޮތް އުއްމީދު ލިވަޕޫލުން ހަގީގަތަކަށް ހަދައިދިނެވެ. ކޮންމެވެސް ދުވަހަކުން އެކުލަބުގެ ކޯޗުކަން ކުރަން ބޭނުންވެފައިހުރިކަން އިއުލާނުކުރުމުން، ލިވަޕޫލުން އެރިކްސަނަށް އެ ފުރުސަތު ހޯދައިދިނީ ލެޖެންޑުން ކުޅުނު ދައްކާލުމުގެ މެޗެއްގަ އެވެ. އޭނާ ނިޔާވީ ކެންސަރު ބަލީގަ އެވެ.
ރެބެކާ ޗެޕްޓެގާ
ރެބެކާ ޗެޕްޓެގާ އަކީ ވެސް ދިގު ދުވުމުގެ ޗެމްޕިއަނެކެވެ. އޭނާ މެރަތަން ދުވަން ފެށީ 2021ގަ އެވެ. އޭނާގެ އަމިއްލަ ރެކޯޑަކީ އެ އަހަރުގެ ދިގުދުވުމުން 2 ގަޑިއިރާއި 22 މިނިޓް 47 ސިކުންތުން ރޭސް ނިންމުމެވެ. އޭގެ އެއް އަހަރު ފަހުން ޔުގެންޑާގެ ތާރީހުގައި ދެ ވަނަ އަށް އެންމެ ބާރަށް ރޭސްނިންމި ދުވުންތެރިއަކަށްވީ ރެބެކާ އެވެ. މި ފަހަރުގެ ޕެރިސް އޮލިމްޕިކްސްގައި އޭނާ ދިޔައީ 44 ވަނަ އަށެވެ. އޭގެ ދުވަސްކޮޅެއް ފަހުން ސެމްޕްޓެމްބަރު ފެނުނީ އޭނާ މަރާލާފައި އޮއްވަ އެވެ. އެއިރު އުމުރުން 33 އަހަރެވެ.
ރޭ ރިއަޑަން
ވޭލްސްގެ ސްނޫކާ އަކީ 1970ގެ ތެރޭގައި އެންމެ އަލިގަދަ ތަރި އެވެ. 1970 އިން 1978އާ ދެމެދު އޭނާ ހަ ފަހަރު ޗެމްޕިއަންކަން ހޯދި އެވެ. 1991 ރިޓަޔާކުރުމަށްފަހު އޭނާ އަކީ ޕޫލް ބިލިއާޑްގެ ކޮންސަލްޓެންޓެކެވެ. ޓީވީން މަންޒަރުތައް ކުލަކޮށް ފެންނަން ފެށި ދުވަސްވަރު ޓީވީގެ ގިނަ ޕްރޮގްރާމްތަކެއް ފަޅުފިލުވައިދިނެވެ. އޭގެ ފަހުން އޭނާ ވަނީ އެހެން ކުޅުންތެރިންނަށް ދުނިޔެގެ ތަށި ހޯދައިދިނުމުގައި ވެސް މުހިންމު ދައުރެއް އަދާކޮށްދީފަ އެވެ.
ގްރެހަމް ތޯޕް
ތޯޕް އަކީ އިނގިރޭސި ގައުމީ ޓީމުގެ ކުރީގެ ކްރިކެޓް ކުޅުންތެރިއެކެވެ. 1993 އިން 2005 ވަނަ އަހަރާ ދެމެދު އޭނާ ވަނީ 100 އަށްވުރެ ގިނަ ޓެސްޓް މެޗު ކުޅެދީފަ އެވެ. އަދި އެއް ދުވަހުގެ 82 މެޗު ވެސް ކުޅެދިނެވެ. ވާތުން ކުޅޭ ބެޓްސްމަނަކީ ވަރަށް ސްޓައިލިޝް ކުޅުންތެރިއެކެވެ.. އޭނާ ވަނީ 6744 ޓެސްޓް ލަނޑާއި 16 ފަހަރު ސެންޓަރީ ހަދައިފަ އެވެ.