ޒަކާތު ފަންޑުން ކިޔެވުމަށް އެހީދޭއިރު އިސްކަންދޭނީ ފަޤީރުންނާއި ތަޢުލީމާއި ޤައުމީ ޚިދުމަތަށް
-
ސްކޮލަރޝިޕް ދެވޭނީ އެމްކިއުއޭއިން ވެލިޑޭޓްކުރާ ކޯސްތައް ހިންގާ އަދި އެއޮތޯރިޓީން ގަބޫލުކުރާ މަރުކަޒުތަކަށް
މާލީ ފުދުންތެރިކަން ނެތް މީހުންނާއި ތައުލީމީ ފެންވަރަށް އިސްކަންދޭ ގޮތަށް ޒަކާތު ފަންޑުން މަތީ ތައުލީމަށް އެހީ ދިނުމުގެ އުސޫލެއް އެކުލަވާލައްވައިފިއެވެ.
އިސްލާމީ ކަންތައްތަކާބެހޭ ވުޒާރާއިން ގެޒެޓްކުރައްވާފައިވާ، ޒަކާތު ފަންޑުން މަތީ ތައުލީމަށް އެހީ ދިނުމުގެ އުސޫލަކީ ޝަރުޢީގޮތުން ހުއްދަ ދާއިރާތަކުން ކިޔެވެމަށް ބޭނުންވާ ދަރިވަރުންގެ ތެރެއިން މާލީގޮތުން ފުދުންތެރިކަން ނެތް ދިވެހި ދަރިވަރުންނަށް ޒަކާތު ފަންޑުން އެހީ ދެއްވުމުގެ އުސޫލެކެވެ.
"ޒަކާތު ފަންޑުން މަތީ ތައުލީމަށް އެހީ ދިނުމުގެ އުސޫލު"ގައިވާ ގޮތުން ޒަކާތު ފަންޑުން ދޭ ސްކޮލަރޝިޕަކީ ރާއްޖޭގެ ގައުމީ ސަނަދުތަކުގެ އޮނިގަނޑު ލެވެލް 5 އިން ފެށިގެން ލެވެލް 10ގެ ނިޔަލަށް ހިމެނޭ ކޯސްތަކުގައި ކިޔެވެމުގެ ހުރިހާ ޚަރަދެއް ހިމެނޭގޮތަށް ދެވޭ ފުރުސަތުތަކެކެވެ. މަތީ ތައުލީމު ހާސިލުކުރުމަށް ޒަކާތު ފަންޑުން ސްކޮލަރޝިޕްގެ ފުރުސަތު ދެވޭނީ އިސްލާމީ ދާއިރާއަށެވެ. އަދި މިއުސޫލުގެ ދަށުން ސްކޮލަރޝިޕް ދެވޭނީ ހަމައެކަނި މޯލްޑިވްސް ކޮލިފިކޭޝަން އޮތޯރިޓީން ވެލިޑޭޓްކުރާ ކޯސްތައް ހިންގާ އަދި އެއޮތޯރިޓީން ގަބޫލުކުރާ މަރުކަޒުތަކަށެވެ.
މީގެއިތުރުން ރާއްޖެއިން ބޭރުގައިނަމަ މިއުސޫލުގެ ދަށުން ކަނޑައަޅައި އާންމުކުރާ އޯއައިސީ ގައުމުތަކަށް އިސްކަންދެވޭނެކަމަށްވެސް އުސޫލުގައިވެއެވެ.
އުސޫލުގައިވާ ގޮތުން ނޮން އޯއީސީޑީ ގައުމުތަކުގެ މަތީ ތައުލީމުދޭ މަރުކަޒުތަކުގައި ކިޔެވެމަށްވެސް ފުރުސަތު ދެވޭނެއެވެ. އަދި ފުރުސަތު ދެވޭނީ ލައިންސަންސެއް އޮންނަންޖެހޭ ދާއިރާއެއްގެ ޕްރޮގްރާމެއް ނަމަ އެ ދާއިރާއެއްގެ ލައިސަންސް ދޭ މުއައްސަސާއިން ގަބޫލުކުރާ އަދި މޯލްޑިވްސް ކޮލިފިކޭޝަން އޮތޯރިޓީން ވެލިޑޭޓްކުރާ މަރުކަޒަކުން ހިންގާ ޕްރޮގްރާމްތަކަށްވެސް އުސޫލުގައިވެއެވެ.
ޒަކާތު ފަންޑުން މަތީ ތައުލީމަށް އެހީ ދިނުމުގެ އުސޫލުގައިވާގޮތުން ސްކޯލަރޝިޕް ދިނުމުގައި އިސްކަމެއްދޭނީ ފަގީރުންނާއި މިސްކީނުންގެ ދަފްތަރުގައި ރަޖިސްޓްރީކޮށްފައިވާ ފަރާތްތަކާއި މާލީ ފުދުންތެރިކަން ނެތް މިންވަރާއި ތައުލީމީ ފެންވަރާއި ގައުމަށް ޚިދުމަތްކޮށްފައިވާ މުއްދަތަށެވެ. ނަމަވެސް ހާސިލްކޮށްފައިވާ ތައުލީމީ ސެޓުފިކެޓަށްވުރެ މަތީ ފެންވަރެއްގެ ކޯހެއްގައި ތައުލީމު ހާސިލްކުރުމަށް އެދޭ ދަރިވަރުންނާއި ކިޔަވައިފައިވާ ދާއިރާއާ ގުޅޭ އިސްލާމިކް ކޮންސެޕްޓް ހިމެނޭ ކޯހެއް ހެދުމަށް ބޭނުންވާ ދަރިވަރުން މި ބައިން އިސްތިސްނާވާނެއެވެ.
މި އުސޫލުގައިވާ ގޮތުން ދިވެހި ސަރުކާރު މެދުވެރިވެގެން ނުވަތަ ދައުލަތުގެ އެހެން މުއައްސަސާއަކުން ނުވަތަ އެހެން ފަރާތެއްގެ ހިލޭ އެހީގައި ކިޔެވުމުގެ ފުރުސަތު ހަމަޖެހިފައިވާ ފަރާތަކަށް "ޒަކާތު ފަންޑުން މަތީ ތައުލީމަށް އެހީއެއް ނުލިބޭނެއެވެ.