މި ފެށޭ އަހަރުވެގެންދާނީ މުހިއްމު ގިނަ ދީނީ ޕްރޮގްރާމްތަކެއް ކުރިއަށްދާނެ އަހަރަކަށް: ވަޒީރު ޝަޙީމް

މިފެށޭ އަހަރަކީ އިސްލާމީ ކަންތައްތަކާބެހޭ ވުޒާރާއިން އައު ގިނަ ކަންތައްތަކެއް ފަށާނެ އަހަރަކަށް ވާނެކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.

ވަޒީރު މިފަދައިން ވިދާޅުވީ 2025 ވަނަ އަހަރު އެ ވުޒާރާއިން ކުރިއަށްގެންދާ ބައެއް ކަންތައްތައް އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. މިގޮތުން މި ރަސްމިއްޔާތުގައި ވަނީ 2025 ވަނަ އަހަރުގެ އެކްޝަން ޕްލޭނާއި، ރިސާލަތު ޕްރޮގްރާމް 2025 އަދި ނަމާދު މަތިވެރިކުރުމުގެ ޕްރޮގްރާމް އިފްތިތާޙްކޮށްފައެވެ.

މި ރަސްމިއްޔާތުގައި ވާހަކަދައްކަވަމުން އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަޙީމް އަލީ ސަޢީދު ވިދާޅުވީ 2025 ވަނަ އަހަރު ވާނީ އިސްލާމީ ކަންތައްތަކާ ބެހޭ ވުޒާރާއިން މުހިއްމު މަސައްކަތްތަކެއް ކުރައްވާނެ އަހަރެއްކަމަށެވެ. އެގޮތުން އަންނަ އަހަރު ވަޤުފް އިމާރާތްތައް އާރާސްތުކޮށް ރާއްޖޭގައި ޒަކާތު ހައުސްގެ އިމާރާތެއް އެޅުމުގެ މަސައްކަތް ފަށާނެ އަހަރަކަށް ވާނެކަމަށް ވަޒީރު ވިދާޅުވިއެވެ. އަދި އައު ގިނަ ކަންތައްތަކެއް ފަށާނެ އަހަރަކަށް އަންނަ އަހަރު ވާނެކަމަށްވެސް ވަޒީރު ވިދާޅުވިއެވެ.

ވަޒީރު ވިދަޅުވީ އަންނަ އަހަރު ކުރިއަށްގެންދިޔުމަށް އެކުލަވާލާފައިވާ ކަންކަމަކީ ވަރަށް މުހިއްމު މަސައްކަތްތަކުގެތެރެއިން ކުރިއަށް ގެންދާނެ މަޝްރޫޢުތަކެއްކަމަށެވެ. މިގޮތުން އަންނަ އަހަރު ފެށުމަށް ހަމަޖެހިފައިވާ "ނަމާދު" މަޝްރޫޢުއަށް އަލިއަޅުވާލައްވަމުން ވަޒީރު ވިދާޅުވީ މިފަދަ މަޝްރޫޢުއެއް ކުރިއަށްގެންދިޔުމުގެ ބޭނުންމަކީ ރައްޔިތުންނަށް ނަމާދު ކުރުމުގެ މުހިއްމުކަން އަންގައިދީ އެކަން ހަނދާންކޮށްދިނުންކަމަށެވެ. މި މަޝްރޫއުގެ ދަށުން އެކި ޕްރޮގްރާމްތައް ގެނެސްދިނުމާއި ގެތަކަށް އިލްމުވެރިން ޒިޔާރަތްކޮށް ހޭލުންތެރިކުރުވުން ހިމެނޭކަމަށް ވަޒީރު ވިދާޅުވިއެވެ.

" ނަމާދުގެ މަޝްރޫޢު ޤާއިމްކޮށްފައި މިއޮތީ ވަރަށް ތަފާތު ގޮތަކަށް. ފިޤުހީ ވާހަކަތަކުގެ އިތުރަށް ނަމަދުކުރުމަށް ހަނދާންކޮށްދިނުމާއި ނަމާދުގައި ހިމެނޭ ދުޢާތަކުގެ މާނަތައް މީހުންނަށް ދަސްކޮށްދިނުން، އަދި ނަމާދުގައި ހިމެނޭ މާތްﷲ ގެ އިސްމަފުޅުތަކުގެ މާނާ މީހުންނަށް ކިޔައިދިނުން ހިމެނޭނެ." އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވިއެވެ.

އަންނަ އަހަރު ކުރިއަށްގެންދިޔުމަށް ނިންމާފައިވާ ރިސާލާތު ޕްރޮގްރާމްއާ ގުޅޭގޮތުން ވަޒީރު ވިދާޅުވީ 2024 ވަނަ އަހަރު އެ ޕްރޮގްރާމް "އިސްލާމް ދީނުގެ އަޤީދާ"ގެ މައްޗަށް ކުރިއަށްގެންދިޔަނަމަވެސް މިފަހަރުގެ ޕްރޮގްރާމް ކުރިއަށްގެންދާނީ އައު މަޢުލޫމާތުތައް ހިމަނައިގެންކަމަށެވެ. އެގޮތުން މިފަހަރުގެ ރިސާލާތު ޕްރޮގްރާމް ކަނޑައަޅާފައިވަނީ އިސްލާމީ އަޚްލާގު ރާއްޖޭގައި ފެތުރުމުގެ މައްޗަށްކަން ވަޒީރު ފާހަގަކުރެއްވިއެވެ. އަދި މި ޕްރޮގްރާމް ފަރުމާކޮށްފައިވަނީ އިސްލާމްދީނުގެ އެންމެ މަތިވެރި 5 މަޤްޞަދުގެ އަލީގަކަންވެސް ވަޒީރު ފާހަގަކުރެއްވިއެވެ.

"ކީރިތި ރަސޫލާގެ މުޅި ރިސާލަތުގެ އައިޑެންޓިޓީއަކީ ރިވެތި އަޚްލާގު، މިއަދު އަޅުގަނޑުމެންގެ މުޖުތަމަޢުއަށް ވަނީ މިފަދަ އަޚްލާގު ބޭނުންވެފައި، މީހުންގެ އަބުރު ހިމާޔަތްކުރުމާއި މީހުންގެ މުދާ ހިމާޔަތް ކުރުމާއި، މީހުންގެ ފުރާނަ ހިމާޔަތްކުރުމަށް އަދި އެހެން އިންސާނުންނަށް އޮންނަ އިޚްތިރާމް ދަމަހައްޓަންޖެހޭ" އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވިއެވެ.

ވަޒީރު ވަނީ 2025 ވަނަ އަހަރަށް ޚާއްސަކޮށްގެން އެ ވުޒާރާއިން ކުރިއަށްގެންދާނެ ކަންތައްތައް ހިމެނޭ އެކްޝަން ޕްލޭންގައި މުހިއްމު ކަންތައްތަކެއް ހުރިކަން ފާހަގަކުރައްވާފައެވެ.

މި ރަސްމިއްޔާތުގައި ރިސާލަތު ވީޑިއޯ ޗެލެންޖުގައި ބައިވެރިވި 281 މީހުންގެތެރެއިން ދިވެހި އަދި އިނގިރޭސި ކެޓަގަރީން ވަނަވަނައަށް ހޮވުނު ފަރާތްތައް އިއުލާންކޮށް އިނާމު ދީފައިވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތުތަކުގެތެރެއިން، އިސްލާމީ ނޫރު ފަތުރާ، ދީނަށް ލޯބިކުރާ މުޖުތުމަޢުއެއް އުފެއްދުމުގެ މަޤުސަދުގައި އިސްލާމީ ކަންތައްތަކާބެހޭ ވުޒާރާއިން ފަށާފައިވާ ރިސާލަތު ޕްރޮގުރާމަކީ އިސްލާމީ ކަންތައްތަކާބެހޭ ވުޒާރާއިން އެންމެ އިސްކަމެއް ދީގެން މިއަހަރުގެތެރޭގައި ކުރިއަށް ގެންދިޔަ އެންމެ ބޮޑު އެއް ޕްރޮގްރާމެވެ.