ތިނަދޫ ސިޓީއަށް ދީފައިވާ ސިޓީއެއްގެ ދަރަޖަ ބާޠިލުކުރުމަށް ހުށައެޅި މައްސަލަ ހައިކޯޓުން ބޭރުކޮށްލައިފިއެވެ. ކޯޓަށް މައްސަލަ ހުށަހަޅާފައިވަނީ ތިނަދޫ ސިޓީގައި 10000 މީހުން ހަމަނުވާކަމަށް ބުނެ އެ ރަށަށް ދީފައިވާ ސިޓީގެ ދަރަޖަ ބާޠިލުކުރުމަށެވެ.
ރައީސުލްޖުމްހޫރިއްޔާގެ އޮފީހަށް ރައްދުވާ ގޮތަށް ޤާނޫނީ ވަކީލެއް ކަމަށްވާ މުޙައްމަދު ރާގިބު އަހުމަދު ދުސްތޫރީ މައްސަލައެއް ހުށަހެޅުއްވީ މިދިޔަ ނޮވެމްބަރު މަހުގެ 21ގައެވެ. މި މައްސަލާގައި ހައިކޯޓުގެ ރަޖިސްޓްރަރ މަރްޔަމް ހޫރުޝީދާ ނިންމެވި ނިންމެވުމުގައި ވިދާޅުވީ އެއީ ދުސްތޫރީ ގޮތުން ހައި ކޯޓަށް ބެލޭނެ ފަދަ މައްސަލައެއް ނޫން ކަމަށް ސުޕްރީމް ކޯޓުންވެސް ކަނޑައަޅާފައިވާކަމަށެވެ. އަދި މިއީ ރައްޔިތުންގެ މަޖިލީހުން ފާސްކޮށްފައިވާ މަސްދަރަކުން ނުވަތަ ޤާނޫނަކުން ލިބޭ ބާރަކުން ރައީސުލްޖުމްހޫރިއްޔާ ނެރުއްވި ޤަރާރެއްކަން ބުނެދެވިފައިނުވާ ކަމަށެެވެ. އެހެންވެ ފުރަތަމަ މަރުހަލާގައި އެ މައްސަލަ ހައި ކޯޓަށް ބަލައިގަނެވެން ނެތްކަމަށް ރަޖިސްޓްރަރގެ ނިންމެވުމުގައި ވިދާޅުވިއެވެ.
ކޯޓަށް ހުށަހަޅާ މައްސަލަތައް ބަލައިގަތުމާ ގުޅޭގޮތުން ގޮތެއް ނިންމަވާނީ ރަޖިސްޓްރަރއެވެ. ރަޖިސްޓްރަރގެ ނިންމުންތައް މުރާޖައާކުރަން ފަނޑިޔާރުންގެ މަޖިލީހަށް ހުށަހެޅޭނެއެވެ.
ރާގިބު ހުށަހެޅުއްވި މައްސަލާގައި ބަޔާންކޮށްފައިވާގޮތުގައި ތިނަދޫއަށް ސިޓީއެއްގެ ދަރަޖަ ދިނުމަށް 10،000 މީހުން ހަމަވާކަމަށް ދައްކާފައިވަނީ ސައްހަ ނޫން ލިޔެކިޔުންތަކުގެ މައްޗަށް ކަމަށެވެ. އަދި މީހުން ހަމަކުރުމަށްޓަކައި ކައުންސިލްގެ ދަފްތަރުގައި މަރުވެފައިވާ 115 މީހަކު ހިމަނާފައިވާ ކަމަށްވެސް އޭނާ ތުހުމަތުކުރެއްވިއެވެ.
ތިނަދޫއަށް ސިޓީއެއްގެ ދަރަޖަ ދިނުމަށް ކުރީ ސަރުކާރުން ނިންމެވީ މިދިޔަ އަހަރުގެ އޮގަސްޓް މަހުގެ 30 ވަނަ ދުވަހުއެވެ. ނިިމިދިޔަ ސަރުކާރުން މިދިޔަ ރިޔާސީ އިންތިހާބުގެ ކެމްޕެއިން ދުވަސްވަރު ތާއީދު ހޯދުމަށް ތިނަދުއަށް ސިޓީއެއްގެ ދަރަޖަ ދިނީ ޤާނޫނީގޮތުން ފުރިހަމަކުރަންޖެހޭ ކަންކަން ފުރިހަމަނުކޮށްކަމަށް ޤާނޫނީ ބޭފުޅުން ފާހަގަކުރައްވައެވެ. ނަމަވެސް މިހާރު ވަނީ ޤާނޫނަށް އިޞްލާހު ގެނެސް ޤާނޫނީގޮތުން ފުރިހަމަކުރަންޖެހޭ ހުރިހާކަމެއް ފުރިހަމަކުރުމަށްފަހު ތިނަދޫއަށް ސިޓީއެއްގެ ދަރަޖަ ދިނީ އަދުގެ ސަރުކާރުންނެވެ.