ޔޫކްރއިނާއި ރަޝިޔާއިން 300އަށްވުރެ ގިނަ އަސީރުން ބަދަލު ކޮށްފިއެވެ.
ރަޝިޔާގެ ދިފާޢީ ވުޒާރާއިން ވަނީ އަސީރުން ބަދަލުކުރުމުގައި ޔޫކްރެއިނުގެ 189 އަސީރުން އެނބުރި ޤަައުމަށް ގޮސްފައިވާ ކަމަށް ބުނެފައެވެ. ރަޝިޔާއިން ބުނީ އެ ޤައުމުގެ 150 އަސްކަރީ ޚިދުމަތްތެރިން ވެސް ޤައުމަށް އެނބުރި އަންނާނެ ކަމަށެވެ. އެ މީހުންނާ ޙަވާލުވެފައި ވަނީ ރަޝިޔާއަށް ވާގިވެރިވާ ބެލަރޫސުންނެވެ.
ޔޫކްރެއިނުގެ ރައީސް ވޮލޮޑީމީރް ޒެލެންސްކީގެ ޓެލެގްރާމް ޗެނަލުގައި ޙިއްޞާ ކޮށްފައިވާ ފޮޓޯތަކުން ޔޫކްރޭނުގެ ދިފާޢީ ބާރުތަކަށް ނިޞްބަތްވާ އަސީރުން އެ ޤައުމުގެ ދިދަތައް ގައިގައި އޮޅައިގެން ޢާއިލާގެ މެންބަރުންނާ ބައްދަލު ކުރާތަން ފެނެއެވެ. ރަޝިޔާއިން ޙިއްޞާ ކޮށްފައިވާ ވީޑިއޯއެއްގައި އެ ޤައުމުގެ އަސްކަރީ ޚިދުމަތްތެރިން ބަހެއްގެ ތެރޭގައި އުފާވެރި މޫނުތަކަކައިގެން ތިބޭ މަންޒަރާއި ޢާއިލާއަށް ފޯނުން ގުޅަމުންދާ މަންޒަރު ވެސް ފެނެއެވެ.
ޒެލެންސްކީ ވަނީ އަސީރުން ބަދަލުކުރުން މަގުފަހި ކޮށްދިން އެކުވެރި ޢަރަބި ޢިމާރާތް, ޔޫއޭއީއަށާއި އެ މަސައްކަތުގައި އެކި ގޮތްގޮތުން އެހީތެރިވެ ދިން ފަރާތްތަކަށް ޝުކުރު އަދާކުރައްވައިފައެވެ. ޔޫއޭއީން ވެސް ވަނީ އަސީރުން ބަދަލުކުރުމަށް ހަމަޖެއްސުމުގައި އެހީތެރިވެ ދިން ކަން ޔަޤީން ކޮށްދީފައެވެ.
“ރަޝިޔާގެ އަޅުވެތިކަމުން އަހަރެމެންގެ މީހުން އަނބުރާ އައުމަކީ އަބަދު ވެސް އަހަރެމެންގެ ތެރެއިން ކޮންމެ މީހަކަށް ވެސް އުފާވެރި ޚަބަރެއް. މިއަދަކީ ވެސް އެ ފަދަ ދުވަހެއް. އަހަރެމެންގެ ޓީމުން މި ޤައުމަށް ނިޞްބަތްވާ 189 ރައްޔިތުން އަނބުރާ ގެނެސްދެވިއްޖެ,”ޒެލެންސްކީ ވިދާޅުވިއެވެ.
އަސީރުން ބަދަލު ކުރުމުގައި ރަޝިޔާއަށް ވުރެ ޔޫކްރެއިނުގެ އަސީރުންގެ ޢަދަދު ގިނައީ ކީއްވެ ކަމެއް ސާފުވެފައެއް ނުވެއެވެ. ނަމަވެސް ރަޝިޔާއިން ދޫކޮށްލި އަސީރުންގެ ތެރޭގައި އަސްކަރީ ޚިދުމަތްތެރިންގެ އިތުރުން ރަޝިޔާގެ އަޅުވެތިކަމުގައި ތިބި ޢާންމުންގެ މީހުން ވެސް ހިމެނެއެވެ. ޒެލެންސްކީ ވިދާޅުވީ ދޫކޮށްލި ޔޫކްރޭނުގެ މީހުންގެ ތެރޭގައި ކުރީ ސަފުގައި ޙަރަކާތްތެރިވާ ސިފައިންނާއި ސާޖަންޓުންނާއި އޮފިސަރުން ހިމެނޭ ކަމަށާއި ރަޝިޔާއިން 2022ވަނަ އަހަރު މަރިއުޕޮލުން ގެންގޮސްފައިވާ ޢާންމުންގެ ދެ މީހުން ވެސް ހިމެނޭ ކަމަށެވެ.
އަސީރުން ބަދަލު ކުރުމަގައި ޙަރަކާތްތެރިވާ ޔޫކްރޭނުގެ އިދާރާތަކުން ބުނީ މިއީ 2022ވަނަ އަހަރުގެ ފެބްރުވަރީ މަހުގެ ތެރޭގައި ރަޝިޔާ-ޔޫކްރެއިން ހަނގުރާމަ ފެށި ފަހުން އަސީރުން ބަދަލު ކުރި 59ވަނަ ފަހަރު ކަމަށެވެ. އަދި މިހާތަނަށް ޔޫކްރެއިނުގެ ޖުމްލަ 3,956 އަސީރުން ޤައުމަށް އެނބުރި ގެނެސްފައިވާ ކަމަށް އެ އިދާރާއިން ބުނެއެވެ. މި އަހަރު ދޫކޮށްލި މިހުންގެ ތެރޭގައި ރަޝިޔާގެ ކޯޓުތަކުން އެކި ކުށްތަކުގައި އިއްވާފައިވާ ޙުކުމްތައް ތަންފީޒު ކުރަމުންދާ ޔޫކްރެއިނުގެ ރައްޔިތުން ހިމެނެއެވެ.
ޔޫކްރެއިނުން ދޫކޮށްލަފައިވާ ރަޝީޔާގެ އަސީރުންގެ ތެރެއިން މީހަކު ބުނީ ހައްޔަރުގައި ތިބި މީހުންނަކީ މުހިންމު ބައެއްގެ ގޮތުގައި ސަރުކާރުން ދެކުނީތީ އެކަމާ އުފާ ކުރާ ކަމަށެވެ.
“އަހަރެން މި ހުރީ ޖަޒުބާތުން ފުރިފައި. މި ކަން ހަމަ ހަޤީޤަތުގައި ވެސް ވެއްޖެ ކަން އަހަންނަށް އަދިވެސް މުޅިން ޤަބޫލެއް ނުކުރެވޭ. އަހަރެން މި ހުރީ އަނބުރާ ޤައުމުގައި ކަން, އަދި އަހަރެމެން އަނބުރާ ގެނައުމަށް ކަމާ ބެހޭ ވުޒާރާއިން މި ވަރުގެ މަސައްކަތެއް ކޮށްފައިވާ ކަން, އަހަރެމެން މަތިން ހަނދާން ހުރިކަން, އަހަރެމެންގެ އަގު ވަޒަން ކުރާ ކަން އަދިވެސް ޤަބޫލު ކުރަން ދަތި,” އޭނާ ބުނެފައި ވެއެވެ.