ފަލަސްޠީނުގެ ޣައްޒާގެ ހަސްފަތާލުތަކަށް ބޮންއެޅުމާއި ޙަމަލާ ދިނުން ހުއްޓައިލުމަށް ދުނިޔޭގެ ޞިއްޙަތު ޖަމުޢިއްޔާ (ޑަބްލިޔުއެޗްއޯ)ގެ ވެރިޔާ ޓެޑްރޯސް އަދަނޮމް ގެބްރިއޭސޮސް ގޮވައިލައްވައިފިއެވެ. އޭނާ މި ކަމަށް ގޮވައިލައްވާފައި މި ވަނީ، ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ ދަށުން އެ ސަހަރުގެ ހަސްފަތާލުތަކަށް ބޮންއަޅައި އެ ތަންތަނަށް ރޭޑު ޖަހަމުންދާ ދަނޑިވަޅެއްގައެވެ.
ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ލާއިންސާނީ ޖަރީމާތަކެއް ހިންގަން ފަށާފައި ވަނީ މީގެ 13 މަސް ކުރިންނެވެ. އެ ޤަތުލުޢާންމުގެ ދަށުން ޝަހީދު ކޮށްލާފައިވާ މީހުންގެ އަދަދު 45,000އަށްވުރެ މައްޗަށް އުފުލިފައިވާއިރު، ޔަހޫދީ ފައުޖުގެ ނިރުބަވެރި ޙަމަލާތައް އަމާޒު ކުރަމުން ދަނީ ޢާންމުންގެ ގެދޮރާއި ރެފިއުޖީ ކޭމްޕުތަކަށެވެ. އަދި، ހަސްފަތާލުތަކާއި ޞިއްޙީ މަރުކަޒުތަކަށެވެ. އަދި، ވަގުތީ ހިޔާވަހިކަން ހޯދުމަށް ޣައްޒާގެ ނިކަމެތީން ބޭނުން ކުރަމުންދާ މަދަރުސާތަކާއި މިސްކިތްތަކަށެވެ.
ޣައްޒާގެ ހަސްފަތާލުތަކަށް އަމާޒުކޮށް ޔަހޫދީ ފައުޖުގެ ނިރުބަވެރި ސިފައިން މެދުކެނޑުމެއް ނެތި ދެމުުންދާ ރަޙުމު ކުޑަ ޙަމަލާތަކާ މެދު ކަންބޮޑުވުން ފާޅުކުރައްވައި ޓެޑްރޯސް ވިދާޅުވީ "ޣައްޒާގެ ހަސްފަތާލުތަކަކީ ހަނގުރާމައިގެ މައިދާނަކަށް ބަދަލު ކޮށްލައިފި، އަދި ޣައްޒާގެ ޞިއްޙީ ނިޒާމު އޮތީ ވަރަށް ނުރައްކާތެރި ފަށްތަރެއްގައި،" ކަމުގައެވެ.
"އަޅުގަނޑުމެން ތަކުރާރުކޮށް ދަންނަވަން: ހަސްފަތާލުތަކަށް ޙަމަލާދިނުން ހުއްޓައިލާ. ޣައްޒާގެ ރައްޔިތުންނަށް ޞިއްޙީ ފަރުވާގެ ޚިދުމަތްތައް ލިބެން ޖެހޭނެ. އިންސާނިއްޔަތަށް ޓަކައި މަސައްކަތް ކުރާ އިޖުތިމާޢީ ޚިދުމަތްތެރިން ވެސް ޞިއްޙީ ޚިދުމަތްތަކަށް ބޭނުންވޭ. ޙަމަލާ ދިނުން މެދުކަނޑައިލާ."
ޔަހޫދީ ފައުޖުން އެންމެ ފަހުން ނިރުބަވެރި ޙަމަލާތަކެއް ދީފައި ވަނީ ކަމާލް ޢަދްވާން ހަސްފަތާލަށެވެ. އަދި، އެ ތަނަށް ރޭޑުޖަހައި ޔަހޫދީ ފައުޖުގެ ނިރުބަވެރި ސިފައިން ވަނީ 240އަށްވުރެ ގިނަ މީހުން ހައްޔަރަށް ގެންގޮސްފައެވެ. އޭގެ ތެރޭގައި ހަސްފަތާލުގައި މަސައްކަތް ކުރަމުންދާ ޞިއްޙީ ޚިދުމަތްތެރިން ވެސް ހިމެނެއެވެ. އެ ހަސްފަތާލުގެ ވެރިޔާ ޙުސާމް އަބޫ ޞަފިއްޔާ ވެސް ވަނީ ހައްޔަރުކޮށްފައެވެ.
އެއަށް ފަހު ޔަހޫދީ ފައުޖުގެ ހައްދުފަހަނަ އެޅި ސިފައިން ވަނީ ޣައްޒާ ސިޓީގެ އަލް-ވަފާ ހަސްފަތާލަށް ބޮން އަޅާފައެވެ. އެ ޙަމަލާތަކުގައި ހަތް މީހުން ޝަހީދު ކޮށްލާފައިވާ ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ހާމަކުރިއެވެ. ޔަހޫދީ ފައުޖުން ބުނީ، ޣައްޒާގެ މިނިވަން ކަމަށް ޖިހާދު ކުރާ ޙަމާސް ޖަމާޢަތުގެ މުޖާހިދުން އެ ހަސްފަތާލުތައް ބޭނުން ކުރަމުންދާ ކަމުގައެވެ. އަދި، ކަމާލް ޢަދްވާން ހަސްފަތާލުގެ ވެރިޔާ އަބޫ ޞަފިއްޔާ ހައްޔަރު ކޮށްފައި ވަނީ، އޭނާއަކީ ޙަމާސްގެ މުޖާހިދެއް ކަަމަށް ތުހުމަތު ކުރެވޭތީ ކަމުގައެވެ.
ޓެޑްރޯސް ވަނީ މި ކަން ކުށްވެރި ކުރައްވައި، ވަގުތުން އޭނާ މިނިވަން ކުރުމަށް ގޮވައިލައްވާފައެވެ. އަދި، ކަމާލް ޢަދްވާނާއި އަލް-ވަފާގެ އިތުރުން އަލް-އަހްލީ ހަސްފަތާލަށް ވެސް ޔަހޫދީ ފައުޖުން ނިރުބަވެރި ޙަމަލާތަކެއް އަމާޒު ކުރަމުންދާ ކަން ހާމަކުރައްވާފައެވެ. ޣައްޒާގައި މި ވަގުތު ޞިއްޙީ ޚިދުމަތްތައް ފޯރުކޮށްދެމުންދާ މަދު ހަސްފަތާލުތަކަށް ބޭނުންވާ ބޭހާއި ބޭސްފަރުވާގެ ސާމާނު ފޯރުކޮށްދިނުމަށް ޑަބްލިޔުއެޗްއޯން ދަނީ މަސައްކަތް ކުރަމުންނެވެ. މި ގޮތުން، އިންޑޮނީޝިޔާ ހަސްފަތާލަށް ބޭނުންވާ ކާނާއާއި ސާފު ބޯފެނާއި ބޭސްފަރުވާގެ ސާމާނު ފޯރުކޮށްދީފައިވާ ކަމަށާއި، ހާލު ދެރަ 10 މީހަކު އަލް-ޝިފާ ހަސްފަތާލަށް ގެންގޮސްފައިވާ ކަމުގައި އޭނާ ވިދާޅުވިއެވެ.
ޔަހޫދީ ފައުޖުގެ ނިރުބަވެރި ސިފައިން ދާދި ފަހުން ވަނީ ޔަމަންގެ ވެރިރަށް ޞަންޢާގެ ބައިނަލްއަޤުވާމީ ވައިގެ ބަނދަރަށް ވެސް ނިރުބަވެރި ޙަމަލާތަކެއް ދީފައެވެ. ޔަހޫދީ ސިފައިން އެ ތަނަށް ބޮންއަޅާފައި ވަނީ، ޓެޑްރޯސް ޔަމަނަށް ދަތުރުފުޅެއް ކުރައްވަމުން ގެންދެވި ވަގުތުގައެވެ. ޞަންޢާ ވައިގެ ބަނދަރަށް ޔަހޫދީ ފައުޖުން ޙަމަލާ ދިން ވަގުތު ޓެޑްރޯސް ހުންނެވީ އެ ތަނުގައެވެ. ޓެޑްރޯސް ވަނީ އޭނާގެ ފުރާނައަށް ނުރައްކާވި ކަމަށް ވިދާޅުވެ، ޔަހޫދީންގެ ޙަމަލާ އެންމެ ހަރުކަށި އިބާރާތުން ކުށްވެރި ކުރައްވާފައެވެ.
ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 45,541އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 108,338 މީހުން ޒަޚަމު ކޮށްލާފައެވެ.