3000 އަށްވުރެ ގިނަ ފަތުރުވެރިންނާއެކު 2 ކުރޫޒް ޝިޕް މާލެއަށް!

ގިނަ އަދަދެއްގެ ފަތުރުވެރިންނާއެކު ދެ ކްރޫޒް ޝިޕް މާލެއަށް ބަނދަރުކޮށްފިއެވެ.

މޯލްޑިވްސް އެސޯސިއޭޝަން ފޯ ޔޮޓް އޭޖެންޓްސް (މާޔާ) އިން ބުނީ މި 2 ކުރޫޒްއިން 3000 އަށްވުރެ ގިނަ ފަތުރުވެރިން ރާއްޖެ ޒިޔާރަތްކުރިކަމަށެވެ.

މޯލްޑިވްސް އެސޯސިއޭޝަން ފޯ ޔޮޓް އޭޖެންޓްސް (މާޔާ) އިން ބުނީ މާލޭގައި ބަނދަރުކޮށްފައިވާ 2 ކްރޫޒްގެ ތެރެއިން، ފުރަތަމަ ކްރޫޒް ޝިޕް އެމްއެސް ނޯވީޖިއަން ސްކައި ރާއްޖެ އައީ އާދީއްތަދުވަހު ހެނދުނުކަމަށެވެ. މި ކްރޫޒްގައި ރާއްޖެއަށް 1872 ފަތުރުވެރިން އައިސްފައިވާ ކަމަށް މާޔާއިން ބުނެއެެވެ.

ދެވަނައަށް އައި ކްރޫޒް ޝިޕް، އެމްއެސް ރިވިއޭރާ މާލެއަށް ހޯމަދުވަހު ހެނދުނު ބަނދަރުކޮށްފައިވާއިރު މި ކްރޫޒްގައި ޖުމްލަ 1182 ފަތުރުވެރިން ރާއްޖެ އައިސްފައިވާކަމަށް މާޔާއިން ވިދާޅުވެއެވެ. މިއާއެކު ދެ ކްރޫޒް ޝިޕްއިން މުޅި އެކު 3054 ފަތުރުވެރިން ރާއްޖެ ވަނީ އައިސްފައެވެ.

މި ދެ ކްރޫޒް ޝިޕަކީވެސް ރާއްޖޭގައި 2 ދުވަސް ހޭދަ ކުރާނެއެވެ. މި ދެ ކްރޫޒްވެސް ރާއްޖެ އައީ ސީޝެލްސްއިންނެވެ. ރާއްޖެއަށްފަހު އެމްއެސް ނޯވިޖިއަން ރާއްޖެއިން ދެން ދަތުރުކުރާނީ ތައިލޭންޑަށެވެ. އަދި އެމްއެސް ރިވިއޭރާ ދެން ދާން އޮތް މަންޒިލަކީ އަވަށްޓެރި ލަންކާއެވެ.

މާލެއަށް ދެ ކްރޫޒް ޝިޕެއް އައިސްފައިވާއިރު، އާދިއްތަ ދުވަހު ހއ. އުލިގަމަށްވެސް ޔޮޓެއް ވަނީ ބަނދަރުކޮށްފައެވެ. މިގޮތުން އެމްޕީއެލްއިން އުލިގަމުގައި ޤާއިމްކޮށްފައިވާ “އިންޓަރނޭޝަލް ޝިޕް އެންޑު ޕޯޓު ސެކިއުރިޓީ ގޭޓު” ގެ ޚިދުމަތް މި ޔޮޓުން ހޯދާފައިވާއިރު، މި ޔޮޓުގައި ޖުމްލަ 17 ފަޅުވެރިއަކު ރާއްޖެ ޒިޔާރަތްކޮށްފައިވާކަމަށް މާޔާއިން ބުނެއެެވެ

މާޔާއިންއިން ވިދާޅުވީ، ފަތުރުވެރިކަމުގެ ހައި ސީޒަން ފެށުނު ފަހުން މިހާރު ރާއްޖެއަށް 3 ކްރޫޒް ޝިޕް އައިސްފައިވާ ކަމަށެވެ. އަދި ޖެނުއަރީމަހު އިތުރު އެއް ކްރޫޒް ޝިޕް އައުމަށް ހަމަޖެހިފައިވާއިރު ހައި ސީޒަން ނިމުމުގެ ކުރިން އިތުރު 12 ކްރޫޒް ޝިޕް ރާއްޖެ އައުމަށް ތާވަލްކުރެވިފައިވާކަމަށް މާޔާއިން ބުނެއެެވެ.