މިނިވަން ވިޔަފާރީގެ އެއްބަސްވުން: އެހެން ޤައުމުތަކަށް ޗައިނާއިން ނުލިބޭ އެތައް ފުރުސަތެއް ރާއްޖެއަށް

ރާއްޖެ-ޗައިނާ މިނިވަން ވިޔަފާރީގެ އެއްބަސްވުމާއެކު އެހެން ޤައުމުތަކަށް ޗައިނާއިން ނުލިބޭ އެތައް ފުރުސަތެއް ރާއްޖެއަށް ލިބޭނެ ކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.

ސައީދު މިހެން ވިދާޅުވީ، ރާއްޖެއާޢި ޗައިނާ ދެމެދު މިނިވަން ވިޔަފާރީގެ އެއްބަސްވުމަށް ޢަމަލުކުރުމަށް ފެށުމާއި ގުޅޭގޮތުން ބޭއްވި ރަސްމީއްޔާތުގައި ވާހަކަދައްކަވަމުންނެވެ.

ޗައިނާއާއި ރާއްޖެއާއި ދެމެދު ސޮއިކުރެވިފައިވާ މިނިވަން ވިޔަފާރިގެ އެއްބަސްވުމަށް ޢަމަލުކުރަން އަންނަ ޖެނުއަރީ މަހު ފަށާއިރު، މި އެއްބަސްވުމުގެ ސަބަބުން ރާއްޖެއަށް ގިނަ ފައިދާތަކަކާއި، ވިޔަފާރީގެ ގިނަ ފުރުސަތުތަކެއް ފަހިވެގެންދާނެކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުހައްމަދު ސައީދު ވިދާޅުވެއެވެ.

ވަޒީރު ވިދާޅުވީ ބައެއް ފަރާތްތަކުން މި އެއްބަސްވުމުގެ ސަބަބުން ރާއްޖޭގެ ބޯޑަރުން ލިބޭ އާމްދަނީ މަދުވާނެކަމަށް ބުނަމުންދިޔަ ނަމަވެސް، މި އެއްބަސްވުމުގެ ސަބަބުން ދިވެހި ވިޔަފާރިތައް ފުޅާކުރުމަށް ފުރުސަތު ލިބިގެންދާކަމަށާއި، މިއާއެކު އިޤްތިޞާދު ފުޅާވެ ދައުލަތަށް އެހެން ގޮތްގޮތުން ލިބޭ އާމްދަނީ އިތުރުވެގެންދާ ކަމަށެވެ.

މިކަމުގެ މިސާލު ދައްކަވާ ވަޒީރު ވަނީ ގެސްޓު ހައުސް އިމާރަތްކޮށް، އެތަން ހުޅުވުމަށް ބޭނުންވާ ތަކެތި ހޯދުމަށް ކުރަންޖެހޭ ޚަރަދުން ބޮޑުބައެއް ސަލާމަތްކުރެވޭކަން ފާހަގަކުރައްވާފައެވެ. އެގޮތުން ގެސްޓް ހައުސް ވިޔަފާރިތަކަށް ލިބޭ ކުރިއެރުންތަކާއި އެކު ގުޅުން ހުރި އެހެން ވިޔަފާރިތަށްވެސް ކުރިއަރައިގެންދާނެކަން ވަޒީރު ފާހަގަކުރެއްވިއެވެ.

"12 ކޮޓަރީގެ ގެސްޓް ހައުސްއެއް، އަޅަން ޚަރަދުވަނީ 5 މިލިޔަން ރުފިޔާ ކަމަށްވަންޏާ، ކޮންސްޓްރަކްޝަން އައިޓެމްތަކަށް 10 ޕަސެންޓް އެބަނަގާ. ކޮޓަރިތަކަށް ބޭނުންވާ އައިޓަމްސް ބަލައިފިނަމަ 20 ޕަސެންޓް 25 ޕަސެންޓް ނަގާ. ގެސްޓް ހައުސްއެއް އަޅަން 5 ލައްކައާއި 6 ލައްކަ ޑިސްކައުންޓް ސަރުކާރުން އެބަދެވޭ ހުރިހާ އެއްޗަކަށް ބަލާއިރު. " ވަޒީރު ވިދާޅުވިއެވެ.

ވަޒީރު ސަޢީދު ވިދާޅުވީ، ވިޔަފާރިތަކަށް ފަހި ފުރުސަތުތަކެއް ލިބުމުގެ އިތުރުން މަސްވެރިކަމުގެ ސިނާޢަތައްވެސް ކުރިން ނުލިބޭ ލުއިތަކެއް ލިބިގެންދާނެ ކަމަށެވެ. އެގޮތުން ރާއްޖޭގައި އިންވެސްޓުކުރުން ބޭރުގެ ފަރާތްތަކަށް މަނާ ދައިރާތަކުގައި ޗައިނާއަށްވެސް އިންވެސްޓް ނުކުރެވޭނެކަން ވަޒީރު ފާހަގަކުރެއްވިއެވެ. އެހެންނަމަވެސް ރާއްޖޭގައި ބާނާ ހުރިހާ ބާވަތެއްގެ މަހެއް އެކްސްޕޯޓް ކުރުމަށް މި އެއްބަސްވުމާއެކު ރާއްޖެއަށް ފުރުސަތު ލިބިގެންދާ ކަމަށް އިޤްތިޞާދީ ވަޒީރު ފާހަގަކުރެއްވިއެވެ.

މީގެއިތުރުން ވަޒީރު ވަނީ ރާއްޖޭގެ ވިޔަފާރިތަކަށް ޗައިނާގެ އެހެން މިނިވަން ވިޔަފާރީގެ ބައިވެރިންނަށް ނުދޭ ފުރުސަތުތައް ފަހިކޮށްދީފައިވާކަން ފާހަގަކުރައްވާފައެވެ.

"މީގެ 20 އަހަރު ކުރިންވެސް ލަފާކޮށްފައިވާ އޮތް ގޮތުން އެންމެ ބޮޑު އިންބައުންޑް އައުޓް ބައުންޑް ޓްރެވެލް ކޮންޓްރިބިއުޓަރ އަކީ ޗައިނާ. މިއަދު ފެންނަ ހަޤީޤަތަކީ އެއީ. މި އެފްޓީއޭގެ ސަބަބުން ޗައިނާގެ ކުންފުންޏަކަށް ލިބޭ ހުރިހާ ރައިޓަކާއެކު ޗައިނާގެ ފްރީ ޓްރޭޑް ބައެއް އޭރިއާތަކުގައި ދިވެހި ކުންފުނިތަކަށް ވިޔަފާރި ކުރުމުގެ ފުރުސަތު އެބަލިބޭ، އިންކްލޫޑިންގް އިންޓާނަލް ޓްރެވެލް ޑިސްޓްރިބިއުޝަންއާއެކު. މިއީ އެއްވެސް އެފްޓީއޭ ޕާޓްނަރަކަށް މީގެ ކުރިން ޗައިނާއިން ދީފައިވާ ބެނެފިޓެއް ނޫން " ސައީދު ވިދާޅުވިއެވެ.

މިނިވަން ވިޔަފާރީގެ އެއްބަސްވުމާއެކު ޓްރެޑިޝަނަލް މާކެޓުތައް ގެއްލޭކަމަށް ދެކެވޭ ވާހަކައަށް އިޝާރާތް ކުރައްވާ ވަޒީރު ވަނީ މިނިވަން ވިޔަފާރީގެ އެއްބަސްވުންތަކަކީ މުސްތަޤުބަލުކަމަށް ވިދާޅުވެފައެވެ. އެގޮތުން އިންޑިއާއެކު މިނިވަން ވިޔަފާރީގެ އެއްބަސްވުމެއް ޤާއިމްކުރުމުގެ މަސައްކަތް ވަނީ ފެށިފައިވާކަން ވަޒީރު ފާހަގަކުރެއްވިއެވެ. އަދި އިނގިރޭސިލިވިލާތާއެކުވެސް މަޝްވަރާތައް ފެށިފައިވާއިރު، ތުރުކީއާޢި ސޮއިކުރެވުނު އެއްބަސްވުމަށް ޢަމަލުކުރަން އަންނަ އަހަރުގެ ފުރަތަމަ ކުއާޓާގައި ނުވަތަ ޖެނުއަރީ މަހު ފެށޭނެ ކަމަށް ވަޒީރު ވިދާޅުވިއެވެ.