އެގްރޯނެޓްގެ މުވައްޒަފުން އެހެން ކުންފުންޏަކަށް ބަދަލުކުރުމާއި ގުޅޭގޮތުން ފަތުރަނީ ދޮގު ވާހަކަތަކެއް!

އެގްރޯ ނެޝަނަލް ކޯޕަރޭޝަން ޕްރައިވެޓް ލިމިޓެޑް، އެގްރޯނެޓުގެ މުވައްޒަފުންތަކެއް މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑް ކޮމްޕެނީއަށް ބަދަލުކުރުމާއި ގުޅޭގޮތުން ބައެއް މީޑިއާތަކުން ހަޤީގަތާއި ޚިލާފު ވާހަކަތައް ފަތުރަމުންދާކަމަށް އެގްރޯނެޓުން ވިދާޅުވެއްޖެއެވެ.

އެގްރޯނެޓުން ވިދާޅުވީ އެ ކުންފުނި އުވާލުމަށްފަހު އެކުންފުނިން ކުރަމުން ދިޔަ މަސައްކަތްތައް މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑް ކޮމްޕެނީއަށް ބަދަލު ކުރެއްވުމަށް ސަރުކާރުން ނިންމަވާފައިވާކަމަށެވެ. އަދި އެކަމާއި ގުޅިގެން ކުރަންޖެހޭ މަސައްކަތްތައް، އެގްރޯނެޓުގެ ބެލެނިވެރި ކުންފުނިކަމަށްވާ މޯލްޑިވްސް ފަންޑް މެނޭޖްމަންޓް ކޯޕަރޭޝަން ލިމިޓެޑްގެ ލަފާގެ މަތިން ކުރިއަށްދާކަމަށެވެ.

އެގްރޯނެޓުން ވިދާޅުވީ އެކުންފުނީގެ މުވައްޒަފުންގެ ތެރެއިން މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑް ކޮމްޕެނީއަށް ބަދަލުކުރާ މުއައްޒަފުންގެ ލިސްޓެއް ތައްޔާރު ކުރަމުންދާކަމަށް ބުނެ ބައެއް މީޑިއާތަކުން ފަތުރަމުންދަނީ ހަޤީގަތާއި ޚިލާފު ވާހަކަތަކެއްްކަމަށެވެ. އެގްރޯނެޓުން ވިދާޅުވީ ބަދަލުކުރާ މުވައްޒަފުންގެ ލިސްޓެއް އެކުލަވާލާފައި ނުވާކަމަށާއި، އަދި އެފަދަ މަޝްވަރާއެއްވެސް ކުރިއަށް ނުދާކަމަށެވެ.

އެގްރޯނެޓުން ވިދާޅުވީ ކުންފުނީގެ ޢާންމު މަޞްލަހަތާއި މުވައްޒަފުންގެ ވިސްނުމަށް ނޭދެވޭ އަސަރުކުރާގޮތަށް ބައެއް ނޫސްތަކުގައި ޖަހާފައިވާ ޚަބަރުތަކަކީ އެތަނުގެ އިސް ދެ މުއައްޒަފެއްގެ ބައިވެރިވުމާއެކު ފަތުރާ ދޮގު ވާހަކަތަކެއްކަމަށާއި، އެކަން ހަރުކަށި ޢިބާރާތުން ކުށްވެރިކުރައްވާކަމަށެވެ. އަދި ނޫސްވެރިކަމުގެ މިނިވަންކަމަކީ ދޮގު ޚަބަރު ފަތުރަން އޮންނަ ހަތިޔާރެއް ނޫންކަން ފާހަގަކުރައްވަމުން، އެގްރޯނެޓުން ވިދާޅުވީ މުވައްޒަފުންނާއި ގުޅޭ އެފަދަ މައުލޫމާތު ނޫސްތަކުގައި ހިމަނާފައިވަނީ ކުންފުނީގެ ރަސްމީ މަސްދަރަކުން މައުލޫމާތު ހޯދުމެއް ނެތިކަމަށެވެ.

"އެގްރޯ ނޭޝަނަލް ކޯޕަރޭޝަން" އަކީ ދިވެހިރާއްޖޭގައި ދަނޑުވެރިކަމުގެ ސިނާއަތް ކުރިއެރުވުމުގެ މަޤްޞަދުގައި 2020 ވަނަ އަހަރު އުފައްދާފައިވާ ކުންފުންޏެކެވެ.