ފެއަރތަކަށް ކުރާ ޚަރަދު ކުޑަކޮށް، ޑިޖިޓަލް ކެމްޕެއިންތައް އިތުރުކުރާނަން: އެމްއެމްޕީއާރުސީ

އެކި ޤައުމުތަކުގައި ބާއްވާ ފަތުރުވެރިކަމުގެ ފެއަރތަކުގައި ބައިވެރިވުމަށް ކުރާ ޚަރަދުކުޑަކޮށް، ޑިޖިޓަލް ކެމްޕެއިންތައް އަންނަ އަހަރު އިތުރު ކުރާނެކަމަށް މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޮމްޕެނީ، އެމްއެމްޕީއާރްސީން ވިދާޅުވެއްޖެއެވެ.

އެމްއެމްޕީއާރުސީން މިހެން ވިދާޅުވީ، އަންނަ އަހަރަށް އެ ކުންފުނިން ރާވާފައިވާ ހަރަކާތްތަކުގެ މައުލޫމާތު ދެއްވުމަށް ބޭއްވި ނޫސްވެރިން ބައްދަލުވުމުގައެވެ.

އެމްއެމްޕީއާރުސީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި އެކުންފުނިން ވަނީ މިއަހަރު ހާސިލްކުރަން ކަނޑައެޅި އަމާޒުތައް ހާސިލްކުރެވިފައިވާކަން ހާމަކުރައްވާފައެވެ. މިއާއެކު ކުރިއަށް އޮތް އަހަރު ރާއްޖެ ޕްރޮމޯޓް ކުރުމުގެ މަސައްކަތް އިތުރަށް ހަރުދަނާ ކުރުމަށް ގިނަ ކަންތައްތަކެއް ރޭވިފައިވާކަން އެކުންފުނިން ފާހަގަކުރިއެވެ.

ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްއެމްޕީއާރްސީގެ ޗެއަރޕާސަން އަބްދުﷲ ޤިޔާސް ވިދާޅުވީ އަންނަ އަހަރު އެ ކުންފުނިން އެންމެ ބޮޑު އިސްކަން ދޭނީ އޮންލައިން ޑިޖިޓަލް ކެމްޕެއިންތަކަކަށް ކަމަށެވެ.

"މީގެ ކުރިން އަޅުގަނޑުމެން ފާހަގަކޮށްފައިވާނެ، ކޮންމެ އަހަރަކުވެސް އަޅުގަނޑުމެންގެ ވަސީލަތްތަކުގެ 80 އިންސައްތަ މި ބޭނުންކުރެވޭނީ ޓްރެވެލް ޓްރޭޑް ފެއަރތަކަށް. މިއަންނަ އަހަރު އަޅުގަނޑުމެން ބޮޑަށް އިސްކަން މިދަނީ ޑިޖިޓަލީ ޑްރިވެން ކެމްޕެއިންތަކަކަށް. އެޑްވަޓައިޒިން ވައިރަލް ކެމްޕެއިންސް، ބީ ޓު ސީ ނެޓްވޯކިން އިވެންޓްސް އިންޓަނޭޝަނަލް އެއަރލައިންތަކާއި ބްރޭންޑްސް ތަކާއި ކޮލާބޮރޭޓް ވެގެން" ޤިޔާސް ވިދާޅުވިއެވެ.

އެމްއެމްޕީއާރުސީން ވިދާޅުވީ "އޮންލައިން މިނީ ކެމްޕެއިނެއް" ދާދިފަހުން ކުރިއަށް ގެންދިޔަ ކަމަށާއި އެ ކެމްޕެއިން ތެރެއިންވެސް 22 މިލިއަން އިމްޕްރެޝަން އެއްމަސް ދުވަހުގެ ތެރޭގައި ލިބިގެންދިޔަކަމަށެވެ. އެ ކެމްޕެއިންގެ ކަމީޔާބީއަށް ބިނާކޮށް، މީސް މިޑިއާގެ އެކި މަންސަތަކާއި ބުކިން ޕްލެޓްފޯމްތަކާއި ގުޅިގެން މާކެޓިން ކެމްޕެއިންތައް ކުރިއަށް ގެންދަން ރޭވިފައިވާކަމަށްވެސް އެމްއެމްޕީއާރުސީން ވިދާޅުވެއެވެ.

އެމްއެމްޕީއާރުސީން ވިދާޅުވީ، ދިވެހިރާއްޖޭގެ މައުލޫމާތު ގްލޯބަލް ޑިސްޓްރިބިއުޝަން ސިސްޓަމް (ޖީޑީއެސް) މެދުވެރިކޮށް ގިނަ އަދަދެއްގެ ބަޔަކު ބަލާކަމަށާއި ނަމަވެސް އޭގެ ތެރެއިން ރާއްޖެ ޒިޔާރަތްކުރަނީ އެންމެ 2 އިންސައްތަ ފަތުރުވެރިކަން ކަމަށެވެ. މިއާއެކު ކޮންމެ ސަރަހައްދެއްގައިވެސް އިތުރަށް މާކެޓު ކުރުމަށް ކުރެވޭނެ ކަންކަން ބަލާ ދެނެގަތުމުގެ މަސައްކަތް ކުރަމުންދާ ކަމަށް އެކުންފުނިން ވިދާޅުވިއެވެ.

ޤިޔާސް ވިދާޅުވީ، ކުރިއަށް އޮތްތަނުގައި ޑިޖިޓަލް ކެމްޕެއިންތަކަށް އިސްކަން ދިނުމުގެ ސަބަބުން އެމްޕީއާރްސީން ފެއަރތަކަށް ކުރާ ޚަރަދުތައް ކުޑަކުރެވިގެންދާނެ ކަމަށެވެ.

"އަޅުގަނޑުމެން ހައިލައިޓްކޮށްލަން ބޭނުންވޭ، ޑަބްލިއުޓީއެމްއާއި އާއި އެހެނިހެން ހުރިހާ ފެއަރތަކަށްވެސް އަޅުގަނޑުމެން ކުރާ ޚަރަދުކުޑަކޮށްފައިވާކަން. ޑަބްލިއުޓީއެމްއަށް އެކަނި ބަލާލިކަމުގައިވިއަސް އަޅުގަނޑުމެން ވަނީ 3.5 މިލިއަން ރުފިޔާ ސަލާމަތްކޮށްފައި. މިއަންނަ އަހަރަށް ބަލާއިރު، %50 ޓްރޭޑް ޝޯތަކަށް ދާ ޚަރަދުތައް ދެނީ އެކި އެންޖީއޯތަކުން. އޭގެ ތެރޭގައި ގެސްޓްހައުސް އެސޯސިއޭޝަން، މަޓާޓޯ، މަޓީ އަދި ލިވަބޯޑު އެސޯސިއޭޝަނާއި ގުޅިގެން އަޅުގަނޑުމެން މި ބަލަނީ" ޤިޔާސް ވިދާޅުވިއެވެ.

ރާއްޖޭގެ ފަތުވެރިކަމުގެ ސިނާޢަތް ކުރިއެރުވުމަށް، ޑިޖިޓަލް ކެމްޕެއިންތައް އިތުރުކުރުމަށް ނިންމާފައިވާފައިވާކަން އެމްއެމްޕީއާރުސީން ހާމަކޮށްފައިވާއިރު މިއަންނަ އަހަރު ފަތުވެރިކަމުގެ ސިނާޢަތުން ލިބޭ އާމްދަނީ 5 ބިލިއަން ޑޮލަރަށް އިތުރުކުރުމަކީ ސަރުކާރުގެ އަމާޒެކެވެ. އަދި އަންނަ އަހަރު ރާއްޖެ އަންނަ ފަތުރުވެރިންގެ އަދަދު މިއަހަރަށްވުރެ 15 އިންސައްތަ އިތުރުކުރުމަށްވެސް ސަރުކާރުން ވަނީ އަމާޒު ކަނޑައަޅާފައެވެ.