ވޭތުވެދިޔަ 62 އަހަރުގެ ތެރޭގައި ދިވެހިރާއްޖޭގެ އަޑުން ޖީލެއްގެ ފިކުރު ބިނާކުރި: ވަޒީރު ޑރ. ޝަހީމް

ދީނުގެ އަޑު ރާއްޖޭގެ އެކި ކަންކޮޅުތަކުގައި ތިބި ރައްޔިތުންނާ ހަމައަށް ފޯރުކޮށްދިނުމުގައި ދިވެހިރާއްޖޭގެ އަޑުން މުހިއްމު މަސައްކަތްތަކެއް ކުރައްވާފައިވާކަމަށާއި އަޑުން ވަނީ ވޭތުވެދިޔަ އަހަރުތަކުގައި ޖީލެއްގެ ފިކުރު ބިނާކޮށްފައިކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ ދިވެހިރާއްޖޭގެ އަޑުގެ 62 ވަނަ އަހަރީ ދުވަހުގެ މުނާސަބަތުގައި ގެނެސްދިން ޚާއްސަ ކަވަރޭޖަށްދެއްވި އިންޓަރވިއުއެއްގައެވެ.

އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވީ ދިވެހި ރާއްޖޭގެ އަޑުގެ ބާހައްޓި ވަނަ އަހަރީ ދުވަސް ފާހަގަކުރަމުންދާއިރު، އަޑާއި އިސްލާމީ ކަންތައްތަކާ ބެހޭ ވުޒާރާއާ އަދި ދީނީ އިލްމުވެރިންނާއި ގުޅިގެން ގިނަ މަސައްކަތްތަކެއް ކުރެވިފައިކަމަށެވެ. އެގޮތުން ނުހަނު މުހިއްމު އަދި ދީނީ ގިނަ ކަންކަމަށް ޕްރޮގްރާމްތައް ގުޅިގެން ގެނެސްދެވިފައިވާކަމަށް ވަޒީރު ވިދާޅުވިއެވެ.

ވަޒީރު ޝަހީމް ވިދާޅުވީ ކުރިއަތް އޮތް 2025ވަނަ އަހަރުވެގެން ދަނީ ރާއްޖޭގެ އިސްލާމީ ކަންތައްތަކަށް ވަރަށް ބޮޑު ދިރުމެއް ގެންނާނެ އަހަރަކަށްކަމަށާއި، އެގޮތުން ކުރިއަށް ރޭވިފައި ވަރަށް ގިނަ ކަންކަން ހުރިއިރު، އޭގޭތެރޭގައި ނަމާދަށް ހޭލުންތެރިކުރުމުގެ ޚާއްސަ ޕްރޮގްރާމް ފަދަ މުހިންމު ޕްރޮގްރާމްތައް އެބަހުރިކަމަށެވެ. މި މަސައްކަތުގައި ދިވެހިރާއްޖޭގެ އަޑުން އިސް ދައުރެއް އަދާކުރާނެކަމަށްވެސް ވަޒީރު ވިދާޅުވިއެވެ.

ދީނީ ހޭލުންތެރިކަން އިތުރުކުރުމަށް ކުރާ މަސައްކަތްތައް މިހާރަށްވުރެވެސް ފުޅާކޮށް އިތުރުކުރުމަށް މަސައްކަތްކުރަން ޖެހޭކަން ފާހަގަކުރައްވައި ވަޒީރު ޝަހީމް ވިދާޅުވީ ޒުވާނުންގެ ދީނީ ހޭލުންތެރި އިތުރުކުރުމަށް އަޑުން އިތުރު ޕްރޮގްރާމްތައް އުފައްދަންޖެހޭކަމަށެވެ. ކުރިއަށް އޮތީ ރަަމަޟާން މަސް ކަމަށްވުމުން ހުރިހާ ކަންކޮޅުތަކުން، ޚާއްސަކޮށް ރަށްރަށުގައި ދިވެހިރާއްޖޭ އަޑު އަހާ މީހުންގެ އަދަދު އިތުރުވެގެންދާނެކަމަށްވެސް ވަޒީރު ވިދާޅުވިއެވެ.

ދިވެހިރާއްޖޭގެ އަޑަކީ އެކި ގޮތް ގޮތުން ޅައިރުގެ ގިނަ ހަނދާންތަކާއި ގުޅިފައިވާ ބައިވެރިއެއްކަންވެސް ވަޒީރު ފާހަގަކުރެއްވިއެވެ.

"އަޅުގަނޑިމެން ކުޑައިރު ޤުރުރާން ކިޔަވަން ދަސްކުރީ ދިވެހިރާއްޖޭގެ އަޑުން. ކުޑައިރުގައި މަންމަމެން ފަތިހު ހޭލައްވައިގެން ބައިންދާނެ. އޭރު ރަށެއްގައި ރީތި ރާގަކަށް ޤުރުއަން ކިޔަވައިދޭނެ މީހެއް ނުހުންނާނެ. ދިވެހި ރާއްޖޭގެ އަޑުން އަންނަ ކިޔެވުން ރޭޑިއޯ ޖައްސާފައި އަޅުގަނޑުމެން އަޑުއަހަން ތިބެން. އޭގެ މައްޗައް ޤުރުއާން ކިޔަވަން ދަސްވީ އަޅުގަނޑަށް. އެއީ އަޅުގަނޑުގެ ޓީޗަރަކީ، ދިވެހިރާއްޖޭގެ އަޑު" ވަޒީރު ވިދާޅުވިއެވެ.

އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދުވަނީ ދިވެހިރާއްޖޭގެ އަޑަކީ މިވީ 62 އަހަރުގެ ތެރޭގައި ޖީލެއްގެ ފިކުރު ބިނާ ކުރި މުހިއްމު މުއައްސަސާއެއްކަމަށެވެ. އަދި އަޑުން ފޯރުކޮށްދޭ މަޢުލޫމާތުގެ މުހިއްމުކަން ފާހަގަކުރައްވައި ވަޒީރު ވިދާޅުވީ އަޑުގެ ޕްރޮގްރާމްތަކާއި މައުލޫމާތުގެ ޒަރިއްޔާއިން ގިނަ ބަޔަކަށް އެކި ކަންކަމަށް ލޯހުޅުވިގެންދިޔަކަމަށެވެ.