ޖަރުމަނުވިލާތުގެ ޤާނޫނުހަދާ މަޖިލިސް އުވާލައްވައި އަންނަ ފެބްރުއަރީ މަހުގެ 23ވަނަ ދުވަހު ޢާންމު އިންތިޚާބެއް ބާއްވަން ނިންމަވާފައިވާ ކަން، އެ ޤައުމުގެ ރައީސް ފްރޭންކް ވޯލްޓަރ ސަޓައިންމަޔަރ އިޢުލާނުކުރައްވައިފިއެވެ.
ޖަރުމަނުވިލާތުގެ ރައީސް ސްޓައިންމަޔަރ ޤާނޫނު ހަދާ މަޖިލިސް އުވާލެއްވީ ޗާންސެލަރު އޯލާފް ޝޮލްޒްގެ އިއްތިޙާދު ރޫޅުމާ ގުޅިގެންނެވެ.
"ޙާއްސަކޮށް މިހާރު ކުރިމަތިވެފައި އޮތް ދަތި ދުވަސްތަކެއްގައި، އަލުން ހަމަޖެހުން ޤާއިމުކުރަން ބޭނުންވަނީ، މަޖިލީހުގައި ތަނަވަސް އަޣުލަބިއްޔަތެއް އޮވެގެން، ރަނގަޅަށް މަސައްކަތް ކުރެވޭ ޤާބިލް ސަރުކާރަކުން،" އަވަސް އިންތިޚާބެއް ބޭއްވުމުގެ މުޙިންމު ކަމަށް އިޝާރާތްކުރައްވައި، ސްޓައިންމަޔަރ ވިދާޅުވިއެވެ.
އިންތިޚާބަށް ފަހު މައްސަލަތައް ހައްލުކުރުމަކީ، އަނެއްކާ ވެސް ސިޔާސީ މައިދާނުގެ މައިގަނޑު އަމާޒަކަށް ވާން ޖެހޭ ކަމަށް އެ މަނިކުފާނު ދެއްކެވި ވާހަކަގައި ފާހަގަކުރެއްވިއެވެ.
ސްޓައިންމަޔަރ ވަނީ، އިންސާފުވެރި އަދި ދެ ފުށް ފެންނަ ކެމްޕޭނެއް ކުރުމަށް ސިޔާސީ ޕާޓީތަކަށް އިލްތިމާސް ކުރައްވައިފައެވެ.
އައު ސަރުކާރެއް ޤާއިމްކުރެވެންދެން، އިންތިޤާލީ ސަރުކާރުގެ އިސްވެރިއެއްގެ ގޮތުގައި، ސޯޝަލް ޑިމޮކްރެޓެއް ކަމަށްވާ ޝޮލްޒް ދެމިހުންނަވާނެއެވެ.
ޝޮލްޒްގެ މައްޗަށް އިތުބާރު ނެތް ކަމަށް ފާސްކުރެވުނީ މާލީ ވަޒީރު ކްރިސްޓިއަން ލިންޑްނަރގެ ފްރީ ޑިމޮކްރެޓުން ސަރުކާރު ހިންގާ އިއްތިޙާދުން ވަކިވުމާ އެކު، މަޖިލީހުގެ އަޣްލަބިއްޔަތު އޭނާއަށް ގެއްލުމުންނެވެ.
ޚިޔާލު ހޯދުމުގެ ސަރވޭތަކުން ދައްކާ ގޮތުގައި، ޝޮލްޒްގެ ބަދަލުގައި ޖަރުމަނުވިލާތުގެ ޗާންސެލަރުގެ މަޤާމަށް ވަޑައިގަންނަވާނީ، ކޮންޒަވޭޓިވް ޕާޓީގެ ފްރީޑްރިކް މަރޒްއެވެ.
މަރޒް މިހާރު ވެސް ވަނީ ކެމްޕޭނު ފައްޓަވައި، ޝޮލްޒްގެ ވެރިކަމުގައި ތަންފީޒުކުރި ހަރުކަށި ގަވާޢިދުތަކުގެ ސަބަބުން ޖަރުމަނުވިލާތުގެ އިޤްތިޞާދީ ކުރިއެރުމަށް ހުރަސްއެޅިފައިވާ ކަމަށް ވިދާޅުވެފައެވެ.