ދެކުނު ކޮރެޔާގައި ކުއްލި ޙާލަތު އިޢުލާނު ކުރުމާ ގުޅިގެން އެ ޤައުމުގެ ރައީސް ޔޫން ސުކް ޔޯލްގެ މައްޗަށް އިތުބާރު ނެތް ކަމަށް އެ ޤައުމުގެ ޤާނޫނު ހަދާ މަޖިލީހުން ފާސް ކުރިތާ ދެ ހަފުތާ ފަހުން ރައީސްގެ ޒިންމާތަކާއި މަސްޢޫލިއްޔަތުތަކާ ވަގުތީ ގޮތުން ޙަވާލުވެވަޑައިގެންނެވި ބޮޑުވަޒީރު ހާން ޑަކް ސޫގެ ވެސް އިތުބާރު ނެތް ކަމަށް ޤާނޫނު ހަދާ މަޖިލީހުން ފާސް ކޮށްފިއެވެ.
ޑިސެމްބަރު މަހުގެ 14ވަނަ ދުވަހު ރައީސްކަމުގެ ޒިންމާތަކާއި މަސްޢޫލިއްޔަތުތަކާ ވަގުތީ ގޮތުން ޙަވާލުވެވަޑައިގެންނެވި ހާން މަޤާމުން ދުރުކުރުމުން މީގެ ކުރިން ދިމާނުވާ ފަދަ ބޮޑު ސިޔާސީ ކާރިޘާއަކާ ދެކުނު ކޮރެޔާއިން ވަނީ ކުރިމަތިލާން ޖެހިފައެވެ. ހާންގެ އިތުބާރު ނެތް ކަމަށް ޤާނޫނު ހަދާ މަޖިލީހުން ފާސް ކުރީ 192 ވޯޓާ އެކުގައެވެ. އިދިކޮޅުގެ އަޣުލަބިއްޔަތު އޮންނަ ދެކުނު ކޮރެޔާގެ ޤާނޫނު ހަދާ މަޖިލީހުގެ އިިދިކޮޅު މެންބަރުން ވަނީ ވަގުތީ ރައީސްގެ ޒިންމާތަކާއި މަސްޢޫލިއްޔަތުތައް ހާންއަށް ފުރިހަމަ އަދާ ނުކުރެވޭ ކަމަށް ތުހުމަތު ކޮށްފައެވެ. އޭގެ ތެރޭގައި ވަގުތީ ރައީސްގެ މަސްޢޫލިއްޔަތުގެ ތެރޭގައި ނުހިމެނޭ ކަމަށް ބުނެ އެ ޤަައުމުގެ ދުސްތޫރީ ކޯޓުން ހުަސްވެފައިވާ މަޤާމުތަކަށް ތިން ފަނޑިޔާރުން ޢައްޔަނު ކުރުމަށް އޭނާ ދެކޮޅު ހެއްދެވުން ހިމެނެއެވެ.
ދެކުނު ކޮރެޔާގެ މާލީ ވަޒީރު ޗޮއި ސަންގ-މޮކް މިހާުރު ވަނީ ރައީސްގެ ޒިންމާތަކާއި މަސްޢޫލިއްޔަތުތަލާ ވަގުތީ ގޮތުން ޙަވާލުވެވަޑައިގެންފައެވެ. އޭނާ ވަނީ ޤައުމީ ސަލާމަތީ މަޖިލީހުގެ ބައްދަލުވުމެއް ބާއްވަވައި ޤައުމަށް ދިމާވެފައިވާ އުނދަގޫ ޙާލަތުން އަރައިގަތުމަށް މަސައްކަތް ކުރައްވާނެ ކަމަށް ވިދާޅުވެފައެވެ. ރައްޔިތުން ހާސް ކަމެއްގެ ތެރެއަށް ދިއަ ނުދީ, ޤައުމުގެ ސަލާމަތާއި އާންމު ދިރިއުޅުމަށް ބުރޫ ނާރާނެ ފަދަ ގޮތަކަށް ސަރުކާރުގެ މަސައްކަތްތައް ބައްޓަން ކުރަން ޖެހޭކަމަށް އޭނާ ވިދާޅުވިއެވެ. ނަމަވެސް ސިޔާސީ ތޫފާނުގެ ތެރޭގައި ޤަނޫނު ހަދާ މަޖިލީހުގެ އަމާޒަކަށް ޗޮއި ވުމުގެ ފުރުޞަތު އޮތުމުން އޭނާއަށް ވެސް މަޤާމުގައި ދެމި ހުރެވިދާނެތޯ ވަނީ ސުވާލު އުފެދިފައެވެ.
ހާންގެ އިތުބާރު ނެތްކަމުގެ މައްްސަލައާއި ޔޫން ދާއިމީކޮށް ރައީސްކަމުން ވަކިކުރުމާ ގުޅޭ ގޮތުން ގޮތެއް ނިންމުމަށް ދުސްތޫރީ ކޯޓަށް 180 ދުވަހުގެ މުއްދަތެއް ލިބެއެވެ. ދެން އަޑުއެހުމެއް ބޭއްވުމަށް ހަމަޖެހިފައިވަނީ ޖަނަވަރީ މަހުގެ 5 ވަނަ ދުވަހުއެވެ. އިތުބާރު ނެތްކަމުގެ ވޯޓުގެ ނަތީޖާ ޤަބޫލުކުރައްވައި ހާން ވިދާޅުވީ ދުސްތޫރީ ކޯޓުން އެ މައްސަލަ ވީހާ ވެސް އަވަހަށް ނިންމަން ޖެހޭކަމަށެވެ. ޤައުމުގެ ޙާލަތު އިތުރަށް ގޯސް ނުކުރުމަށް ޤާނޫނާ އެއްގޮތަށް އޭނާގެ ޒިންމާތައް ދޫކޮށްލައްވާނެ ކަމަށް އޭނާ ވިދާޅުވިއެވެ.
ދެކުނު ކޮރެޔާއަށް ކުރިމަތިވެފައިވާ ސިޔާސީ ކާރިޘާގެ ސަބަބުން އޭޝިޔާގެ ހަތަރު ވަނައަށް އެންމެ ވަރުގަދަ އިޤްތިޞާދުގެ ގޮތުގައި އޮތް އެ ޤައުމުގެ އިޤްތިޞާދަށް ވަނީ ބޮޑެތި އަސަރުތަކެއް ކޮށްފައެވެ. ފާއިތުވި 15 އަހަރުގެ ތެރޭގައި ދަށް ނުުވާ ވަރަަށް އެ ޤައުމުގެ ފައިސާގެ އަގު ވަނީ ދަަށަށް ގޮސްފައެވެ. އެ ޤައުމުގެ ސިޔާސީ ޙާލަތާ ގުޅިގެން ދެކުނު ކޮރެޔާއާ ގާތް ގުޅުމެއް އޮންނަ އެމެރިކާއާ ވިލާތުން ވެސް ވަނީ ކަންބޮޑުވުން ފާޅުކޮށްފައެވެ. ހާންގެ އިތުބާރު ނެތްކަމުގެ ވޯޓު ނެގުމުގެ ކުރިން ޗޮއި ވަނީ ވޯޓައިގެން ކުރިއަށް ނުދިއުމަށް ޤާނޫނު ހަދާ މަޖިލީހުގައި އާދޭސް ދަންނަވައިފައެވެ. ހާން މަޤާމުން ދުރުކޮށްފި ނަމަ ޤައުމުގެ އިިޤްތިޞާދަށް ބޮޑެތި ނޭދެވޭ އަސަރުތައް ކުރާނެ ކަމުގެ އިންޒާރު އޭނާ ދެއްވިއެވެ.
ރައީސް ޔޫން ދާއިމީކޮށް މަޤާމުން ދުރުކުރުމަށް ދުސްތޫރީ ކޯޓުން ނިންމައިފި ނަމަ 60 ދުވަހުގެ ތެރޭގައި ދެކުނު ކޮރެޔާގައި ރިޔާސީ އިންތިޚާބެއް ބޭއްވުން ލާޒިމް ވާނެއެވެ. ޤައުމުގެ ކުރިމަގު ބައްޓަން ކުރުމުގައި ޤާނޫނު ހަދާ މަޖިލީހުގެ އަޣުލަބިއްޔަތު އޮތް އިދިކޮޅު ޑިމޮކްރަޓިކް ޕާޓީން އިސް ދައުރެއް ޢަދާ ކުރާނެ ކަމަށް ބެލެވެއެވެ. އޭޝިޔާގައި ޑިމޮކްރަސީގެ ނަމޫނާއެއްގެ ގޮތުގައި ފިޔަޖަހަމުން ދިޔަ ދެކުނު ކޮރެޔާގެ ކުރިމަގާ މެދު އުފެދިފައިވާ ސުވާލުތައް އަދިވެސް ވަރަށް ގިނައެވެ.