އެމްއެންޔޫއިން ދިރާސާ ކުރުމަށާއި ފޮތް ލިޔުމަށް 14 ފަރާތަކަށް މާލީ އެހީ ދީފި

ދިވެހިރާއްޖޭގެ ޤައުމީ ޔުނިވަރސިޓީން، ދިރާސާ ކުރުމަށާއި ފޮތް ލިޔުމަށް 14 ފަރާތަކަށް މާލީ އެހީތެރިކަން ދީފިއެވެ.

މިގޮތުން ދިރާސާ ކުރުމަށް މަލީ އެހީ ދިނީ ދިހަ ފަރާތަކަށެވެ. ފޮތް ލިޔުމަށް މާލީ އެހީ ދިނީ ހަތަރު ފަރާތަކަށެވެ.

ދިރާސާ ކުރުމަށް މާލީ އެހީ ދެނީ ޔުނިވަރސިޓީގައި ރިސާރޗް މާހައުލެއް ޤާއިމް ކުރުމަށާއި، އެކެޑެމިކް މުވައްޒަފުންނަކީ ރިސާރޗަށް އަހުލުވެރި ބަޔަކަށް ހެދުމަށް އެހީތެރިވުމުގެ ގޮތުންނެވެ. މިގޮތުން 2014 ވަނަ އަހަރުން ފެށިގެން ރިސާރޗް ގްރާންޓް އަންނަނީ ދެމުންނެވެ.

ދިވެހިރައްޖޭގެ ޤައުމީ ޔުނިވަރސިޓީން ވިދާޅުވެފައިވަނީ ޔުނިވަރސިޓީގައި މަތީ ޑިގްރީއަށް ކިޔަވާ ފުލްޓައިމް ދަރިވަރުންނަށްވެސް ފައިސާގެ އެހީއަށް އެދެވޭނެ ކަމަށެވެ. އަދި ރިސާރޗް ގްރާންޓް ދެވޭނީ ހުށަހަޅާ ޕްރޮޕޯޒަލްތައް ރިސާރޗް ގްރާންޓްސް ކޮމިޓީން، ކަނޑައެޅިފައިވާ މިންގަނޑުތަކަށް ބިނާކޮށް، ފެންވަރު ވަޒަން ކުރުމަށްފަހު ހޮވޭ ޕްރޮޖެކްޓްތަކަށެވެ.

ބުކް ރައިޓިން ގްރާންޓްސް އަދި ރިސާރޗް ގްރާންޓްސް ދެނީ ހުށަހަޅާ ޕްރޮޕޯޒަލްތައް ރިސާރޗް އަދި ބުކް ރައިޓިންގ ގްރާންޓްސް ކޮމިޓީން ކަނޑައެޅިފައިވާ މިންގަނޑުތަކަށް ބިނާކޮށް ފެންވަރު ވަޒަން ކުރުމަށްފަހު ހޮވޭ ޕްރޮޕޯސަލްތަކަށެވެ.

ފޮތް ލިޔުމަށް މާލީ އެހީ ދޭ މިންވަރު

* ކުޑަމިންވަރު 10،000 ރުފިޔާ
* މެދުމިންވަރު: 10،000 – 50،000 ރުފިޔާ
* މަތީމިންވަރު: 50،000 – 100،000 ރުފިޔާ

ދިރާސާ ކުރުމަށް މާލީ އެހީ ދޭ މިންވަރު

* ކުޑަމިންވަރު: 10،000 ރުފިޔާ
* މެދުމިންވަރު: 10،001 – 100،000 ރުފިޔާ
* މަތީމިންވަރު: 100،001 – 1،000،000ރުފިޔާ

މިއަހަރުގެ ހުޅުވާލި ފުރަތަމަ ބުރުގައި، އެކި ފެކަލްޓީތަކުގެ މުވައްޒަފުންނާއި ދަރިވަރުންނަށް ދިރާސާގެ އަލީގައި އައު ހޯދުންތައް ހޯދުމަށް ޖުމްލަ 1.8 މިލިއަން ރުފިޔާގެ މާލީ އެހީ ވަނީ ރިސާރޗް ޕްރޮޖެކްޓްތައް ކުރިއަށް ގެންދިއުމަށް ހަވާލު ކޮށްފައެވެ. އަދި ފޮތްތައް ލިޔެ ޕަބްލިޝް ކުރުމަށްޓަކައި ޔުނިވަރސިޓީގެ ބުކް ރައިޓިންގ ގްރާންޓުން ޖުމްލަ 267،500 ރުފިޔާގެ އެހީ ވަނީ ދީފައެވެ.