އެފްރިކާ ބައްރުގެ ޤައުމެއް ކަމުގައިވާ މޮޒަމްބީކުގެ ވެރިރަށް މަޕޫތޯގައި ހުންނަ މައި ޖަލު ފަޅާލައި 1،500އަށްވުރެ ގިނަ ކުށްވެރިން ފިލައިފިއެވެ.
މޮޒަމްބީކުގެ ފުލުހުންގެ ވެރިޔާ ބަނަންދީނިޔޯ ރަފައެލް ވިދާޅުވީ މަޕޫތޯގެ ޖަލުގައި ހިންގި ހަމަނުޖެހުމުގައި 33 މީހުން މަރުވެ 15 މީހުން ޒަޚަމްވި ކަމަށެވެ. އެ ހަމަނުޖެހުންތައް ވަނީ އެ ޤައުމުގައި އުފެދިފައިވާ ސިޔާސީ ހަމަނުޖެހުންތަކާ ކަމަށް ރަފައެލް ވިދާޅުވިއެވެ.
މޮޒަމްބީކުގައި ބޭއްވި ރިޔާސީ އިންރިޚާބު ކާމިޔާބުކުރީ އެ ޤައުމުގެ ވެރިކަންކުރާ ޕާޓީން ކަމަށް އެ ޤައުމުގެ އެންމެ މަތީ ކޯޓުން ނިންމުމުން އެ ޤައުމުގައި ވަނީ ބޮޑެތި ހަމަނުޖެހުންތަކެއް ހިންގަން ފަށައިފައެވެ. މޮޒަމްބީކުގެ އިދިކޮޅު ފަރާތްތަކުން ތުޙްމަތުކުރާ ގޮތުގައި ވެރިކަންކުރާ ޕާޓީން ވަނީ ވޯޓު އޮޅުވާލައި އިންތިޚާބު ވަގަށް ނަގައިފައެވެ. އެއާއ އެކު މުޅި ޤައުމަށް ހަމަނުޖެހުންތައް ފެތުރި ސަލާމަތީ ބާރުތަކާއި ޢާންމުންނާ ދެމެދު ހިނގި ކުރިމަތިލުންތަކުގައި 130އަށްވުރެ ގިނަ މީހުން ވަނީ މަރުވެފައެވެ.
މޮޒަމްބީކުގެ ފުލުހުން ވަނީ ޖަލުން ފިލި 1،534 މީހުންގެ ތެރެއިން 150 މީހުން އަލުން ހައްޔަރުކޮށްފައެވެ. އަދި ކުރިއަށް އޮތް 48 ގަޑިއިރުގެ ތެރޭގައި އެ ޤައުމުގައި ކުށްކުރުން އިތުރުވާނެ ކަމުގެ އިންޒާރު ފުލުހުން ވަނީ ދީފައެވެ.