ޤުދުރަތީ ކާރިސާތަކަށް ވިލުންތެރިވުމަށް ރައީސް ޑރ. މުޢިއްޒު ޚާއްސަ އިސްކަމެއް ދެއްވާ: ނައިބު ރައީސް

ރާއްޖެއަކީ ޤުދުރަތީ ކާރިސާތަކަށް ވިލުންތެރި ޤައުމަކަށް ހެދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްސަ އިސްކަމެއް ދެއްވާކަމަށް ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ 2004ވަނަ އަހަރު ކުރިމަތިވި ސުނާމީ ކާރިސާގެ ހަނދާންތައް ދައްކުވައިދޭ "ވިލުންތެރި 20" މައުރަޒު ހުޅުވުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.

އެންޑީއެމްއޭއިން އިސްނަގައިގެން ކުރިއަށްގެންދާ މި މައުރަޒު ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ވިދާޅުވީ ސުނާމީ ކާރިސާގައި ރާއްޖޭގެ ބޮޑު އާބާދީއަކަށް ވަގުތީ ހިޔާވަހިކަން ފޯރުކޮށްދޭން ޖެހުނު ކަމަށެވެ. އަދި ޤައުމުގެ ތަރައްޤީ އެތައް އަހަރެއް ފަހަތައް ޖައްސާލާވަރުގެ ބޮޑެތި ގެއްލުންތަކެއް ސުނާމީ ކާރިސާގައި ލިބުނުކަން ނައިބު ރައީސް ފާހަގަކުރެއްވިއެވެ.

ނައިބު ރައީސް ވިދާޅުވީ ސުނާމީފަދަ ޤުދުރަތީ ކާރިސާތަކަށް ވިލުންތެރި ޤައުމަކަށް ރާއްޖެ ހެދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްސަ އިސްކަމެއްދެއްވާ ކަމަށާއި އެގޮތުން ދިވެހިރާއްޖޭގެ ކާރިސީ ހިރާސް ކުޑަކުރުމުގެ އިސްތިރާޖީ ޕްލޭން ރައީސުލްޖުމްހޫރިއްޔާ މިހާރު ފާސްކުރައްވާފައިވާކަން ނައިބު ރައީސް ފާހަގަކުރެއްވިއެވެ.

"މޫސުމީ ބަދަލުތަކަށް ވިލުންތެރިވުމުގެ އިސްތިރާޖެއް އެކުލަވާލަމުން ދޭހަކޮށްދެނީ މިކަމަށް ރައީސުލްޖުމްހޫރިއްޔާ ދެއްވާ އަހަންމިއްޔަތުކަން. އަޅުގަނޑުމެން މިތިބީ މޫސުމީ ބަދަލުތަކަށާއި ހާދިސާތަކަށް ވިލުންތެރި ރާއްޖެއެއް ބިނާކުރުމަށް" ނައިބު ރައީސް ވިދާޅުވިއެވެ.

މައުރަޒު ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ނެޝަނަލް ޑިޒާސްޓަރ މެނޭޖްމެންޓް އޮތޯރިޓީގެ ޗީފް އެގްޒެކެޓިވް ޙިސާން ޙަސަން ވިދާޅުވީ މީގެ 20 އަހަރުކުރިން ރާއްޖެއަށް އެރި ސުނާމީއިން ލިބުނު ގެއްލުންތަކުން އަރައިގަނެވުނީ އެދުވަހު ދިވެހިން އެއްބައިވަންތަވެ، ކުރި އަޚުވަންތަވުމުގެ ނަމޫނާ މަސައްކަތްތަކުގެ ސަބަބުން ކަމަށެވެ. އަދި އެ ދުވަހަށްފަހު މޫސުމީ ބަދަލުތަކަށް ތައްޔާރުވުމަށް ސަރުކާރުތަކުން ގިނަ މަސައްކަތްތަކެއް ކުރަމުންދާކަން ޙިސާން ފާހަގަކުރެއްވިއެވެ.

ކާރިސާގެ ވަގުތު ކަންކަން އިންތިޒާމުކޮށް، އެކި ފަރާތްތަކުގެ ޒިންމާތައް ބަޔާންކުރާ ނެޝަނަލް އެމަރޖެންސީ އޮޕަރޭޝަންސް ޕްލޭން މިހާރު ތައްޔާރުކޮށްފައިވާކަން ފާހަގަކުރައްވައި ޙިސާން ވިދާޅުވީ އެ ޕްލޭނާ އެއްގޮތަށް އަވަސް އިޖާބަދިނުމުގެ މަސައްކަތް ރާވާ، އިންތިޒާމުކުރަމުންދާކަމަށެވެ.

"ރަށު ފެންވަރުގައި އަވަސް އިޖާބަ ދިނުމުގެ ކަންކަން ކުރުމަށް ކޮމިޓީތައް އެކުލަވާލެވި، ކޮމިޔުނިޓީ އެމަރޖެންސީ ރެސްޕޮންސް ޓީމުތައް ދަނީ ޤާއިމްކުރަމުން. އެމީހުންނަށް ބޭނުންވާ ވަޞީލަތްތައް ފޯރުކޮށްދިނުމަށް ގިނަ މަސައްކަތްތަކެއްދަނީ ކުރަމުން." ޙިސާން ވިދާޅުވިއެވެ.

ޙިސާންވެސް ވަނީ އަދުގެ ރައީސުލްޖުމްހޫރިއްޔާ، މޫސުމީ ބަދަލުތަކަށް ވިލުންތެރިވުމަށް ޚާއްސަ އަހަންމިއްޔަތުކަމެއްދެއްވާކަން ފާހަގަކުރައްވާފައެވެ.

މިއަދަކީ ރާއްޖޭގެ ޤައުމީ އެއްބައިވަންތަކަމުގެ ދުވަހެވެ. މި ދުވަސް ފާހަގަކުރަނީ 26 ޑިސެންބަރު 2004ވަނަ ދުވަހު ރާއްޖެ ކުރިމަތިލާންޖެހުނު ސުނާމީ ކާރިސާއިން އަރައިގަތުމަށް ދިވެހިން ދެއްކި އެއްބައިވަންތަކަމުގެ އަގުވަޒަންކޮށް، ހަނދާކުރުމުގެ ގޮތުންނެވެ. އެދުވަހުގެ ހަނދާންތައް ދައްކުވައިދޭ މައުރަޒު ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފެވެ. މައުރަޒުގައި ސުނާމީ ކާރިސާ ހިނގި ދުވަހުގެ ޚާއްސަ ބައެއް ފޮޓޯއާއި އެ ދުވަހާ ގުޅުންހުރި ތަކެތި ޑިސްޕްލޭކޮށްފައިވެއެވެ.

26 ޑިސެންބަރު 2004 ވަނަ ދުވަހު 82 ދިވެއްސަކު ދުނިޔެ ދޫކުރިއެވެ. ވީނުވީއެއް ނޭނގި 26 މީހަކު ގެއްލުނެވެ. 1،300 މީހުންނަށް އެކި ވަރުގެ އަނިޔާތައް ލިބުނެވެ. 22،000 މީހުންނަށް ވަގުތީ ބޯހިޔާވަހިކަން ފޯރުކޮށްދޭން ޖެހުނެވެ.